政事
政治好多時係做騷，學民仔絕食，唔少建制派議員走去慰問，有示威者冷言冷語招呼佢地，話佢地博出鏡，但商界人士同樣媽叉，話佢地唔知係乜嘢界別的政黨，去為乜人講說話。建制派政黨中人去探絕食者博出鏡，可以話係豬八戒照鏡，兩面不是人。
Ariel收到幾個商界、政界朋友傳咗條片俾我，係一個基層團體去李四叔的恒基樓盤示威。一個叫「關注基層住屋聯席」團體，周五到恒基長沙灣數盤曉悅設於尖沙嘴美麗華商場內的售樓處，拉横額示威，條黃色橫額，有雨傘標記，上書「我要有屋住」五隻有大字。示威者不斷叫「官商勾結」、「基層無屋住」、「還地於民」、「還我住屋權」、「地產霸權」等口號，現場職員亦好慶，話「要有屋住去房協示威，房協賣緊樓（指喜盈），去房協。」
商界中人亦好勞嘈，示威搞到去賣樓處，往後好易搞佔領，佔到地產商做唔到生意。自由黨是工商界政黨，佢地唔出聲反駁，同一日田北俊和鍾國斌就走咗去探絕食的黃之鋒，好做唔做，呢個世界真是瘋了。下次再有政黨嚟叫捐錢，會問清楚佢地代表邊個，先至決定捐唔捐。
Ariel
** 博客文章文責自負,不代表本公司立場 **
佔中發起人戴耀廷自首完無被拘捕，帶去警署的膠樽無所用，返屋企得閒又寫稿，去美國《紐約時報》，篇文題為「What Next for Hong Kong？」（香港何去何從？），他一方面叫人結束佔領運動，另一方面又叫人唔交稅、延遲交公屋租等，都唔知呢啲行為合唔合法。
戴耀廷話，佔領運動漸漸失去民意支持，市民並非不支持真普選，而是參與者質疑長時間佔領道路的成效；加上部份示威者偏離非暴力公民抗命的本意，警方又暴力打壓，繼續佔領已成「高風險低回報」的行為。他認為雨傘運動並非一無所獲，因為運動能夠喚起年輕人一代政治覺醒，所得的已經比預期多。
他認為是時候結束佔領，重新思考新策略，走入社區，傳遞真普選的訊息，並爭取更多市民支持，透過拒絕交稅、延遲繳交公屋租金、在立法會拉布等不合作運動，堵塞政府運作，逼使政府回應訴求，比起堵塞道路來得有效。
高人話，戴耀廷呢啲書生論政，憑空想像，脫離現實，試過佔中呢一舖之後，大家好唔好再跟佢，真係要諗諗。佢叫人唔交稅，話唔交1蚊罰唔多，但萬一發動唔起幾萬人來拒交，只有幾百人唔交，人少政府就郁你啦，唔止罰款仲全部告上法庭，話呢班人有組織地拒絕交稅想嚴重「堵塞政府運作」(犯罪意圖講到明)，全部人告入，留埋案底點算? 你問戴生，佢又會話估唔到件事反應咁差，話個運動就由一個拒交稅的不合作運動，幾日內變成一個完全失敗的逃稅行動，同佢原意唔同咗，咁大家咪暈咗喺地？
當然你熱烈擁護戴生發起的行動，唔止唔交稅，仲去稅局門口抗議，意外地同稅局保安推撞起上來，戴生更加會話「我唔識你」，你唔係我運動的成員，我組織的義務律師有選擇權，佢地一定唔會幫你。
高人話，一個法律系副教授，成日教人做埋啲自己都無想清楚的犯法嘢，咁算點呢？
