政事
佔中之後，好多建制派都發表聲明，但政壇高人叫Ariel一定要睇睇林建岳個聲明。岳少咁講，「今次非法的佔中行動，反映社會上存在着不滿的聲音，包括年輕人對現狀和出路狹窄的不滿情緒。他認為，政府及社會各界堅決反對非法佔中之餘，應該深思，妥善處理年輕人面對的問題。」
高人話佔中一過，好多建制派又變番「花生友」，評論時事採取一個非常客觀的第三身立場，認真頂癮。
好似藝人何韻詩屬岳少的寰亞集團，傳聞仲有一年合約。當然藝員有其個人自由，老闆管唔到。但高人話如果岳少想了解一下年青人面對什麼問題，有何不滿，佢同何詩詩咁熟，可以搵阿詩飲啖茶食個包，傾吓偈，索吓料，然後報告俾大家聽聽青年人的問題。
高人又提到，岳少又係香港與內地經貿合作諮詢委員會屬下青年工作委員會的召集人，而家青年咁多不滿，佢呢個青年工作委員會又唔知有乜對策?
Ariel聞到少少火藥味，覺得各方人等，都應該諗諗自己可以做乜，先可以幫到個大局。
Ariel
** 博客文章文責自負,不代表本公司立場 **
歌手何韻詩拋開在金鐘站到前排被捕，「踢保」後昨日凌晨獲釋。她認為香港需要有新世代政黨，為政壇帶來新氣象，更表示她自己會認真考慮參選立法會。
何詩詩早兩日已講過，今次佔領運動反映現時立法會的政黨與社會脫節，無法與運動相呼應，希望年青一代為議會注入新血及新景象。
被捕後她再話要有新世代政黨，對佢自己參選的問題，就由「可以考慮」，變成「認真考慮」，佢話最重要是考慮個人能力，演藝事業是其次，鼓勵所有新世代同路人集思廣益。
政壇人士估計，何詩詩講政黨與社會脫節，可能唔止話建制派政黨，仲話埋泛民政黨，否則都唔使話要組新世代政黨。她這樣行出來對泛民不是助力，而是競爭。
何詩詩早前指出本港政壇「要有新氣象，如果真係冇人選，真係好需要我，我可以考慮」。之後馬上有人在facebook設立咗一個「十萬人齊撐何韻詩參選立法會議員」，到今早已經有逾9,460個like，更有人留言話阿詩應該選埋特首。
佔中之後，先有一個何詩詩話出來想選立法會，唔知學聯周永康和岑敖暉到2016年會唔會選。香港政壇真係愈打愈人多，政府當然受靶，但傳統泛民都會被人搶位噃。
