泛民小心兩邊失票

佔領運動告終，公民黨湯家驊接受電台訪問時話，他在整個佔領時間都感到非常痛心和擔心，憂慮佔領令泛民主派流失中間游離票，尤其是不少市民轉為支持中間建制派如自由黨或新民黨，而泛民亦未能爭取到年輕人的信任，恐怕泛民未來的生存空間收窄，甚至失去議會內的否決權，只剩下民間的激烈鬥爭。

他又希望泛民的不合作運動要適可而止，立法會未來審議公務員加薪和綜援出雙糧的撥款申請，不要太過份，否則只會令社會對泛民有更大反感。

其實好多泛民中人都有此擔憂。佔中不是泛民發動，不能領導運動，卻要泛民找數。他們明知溫和票可能流失，但又怕連年青人支持佔中的票都流失埋，所以上周金鐘清場時，泛民各大黨民主黨、公民黨、工黨、社民連、人力的阿頭，全部走去等拉。

不過佢地呢個動作又太露骨，俾網友笑到面黃，話泛民「堅持到最後一刻……先至出來」，睇嚟俾人拉埋都討好唔到激進派。

若然何韻詩、周永康和岑敖暉到2016年都走出來選，泛民大黨先唔見三席，若走啲票俾新民黨、自由黨，咁就兩面失票，真係無眼睇。

Ariel

** 博客文章文責自負,不代表本公司立場 **

佔中之後，好多建制派都發表聲明，但政壇高人叫Ariel一定要睇睇林建岳個聲明。岳少咁講，「今次非法的佔中行動，反映社會上存在着不滿的聲音，包括年輕人對現狀和出路狹窄的不滿情緒。他認為，政府及社會各界堅決反對非法佔中之餘，應該深思，妥善處理年輕人面對的問題。」

高人話佔中一過，好多建制派又變番「花生友」，評論時事採取一個非常客觀的第三身立場，認真頂癮。

好似藝人何韻詩屬岳少的寰亞集團，傳聞仲有一年合約。當然藝員有其個人自由，老闆管唔到。但高人話如果岳少想了解一下年青人面對什麼問題，有何不滿，佢同何詩詩咁熟，可以搵阿詩飲啖茶食個包，傾吓偈，索吓料，然後報告俾大家聽聽青年人的問題。

高人又提到，岳少又係香港與內地經貿合作諮詢委員會屬下青年工作委員會的召集人，而家青年咁多不滿，佢呢個青年工作委員會又唔知有乜對策?

Ariel聞到少少火藥味，覺得各方人等，都應該諗諗自己可以做乜，先可以幫到個大局。