前主場新聞老闆蔡東豪辭去精電行政總裁之職，外界猜測佢有何去向，其中一個市場傳聞話佢去中國星！
一話中國星，就令人想到向華強太太陳明英間娛樂公司中國星(326)，不過向有關人士查過，話無件咁嘅事喎。
不過有股壇中人話，精電老細高振順最近夥拍傳聞將於明年提前出獄的國美（493）大股東黃光裕，入主中國星文化（8172），黃光裕可能成為中國星文化的大股東，港交所資料顯示，黃光裕及高振順等4人，共斥資5.5億元，認購中國星文化新股及優先股共27.6億股，認購價每股0.2元，較11月21日停牌前股價大幅折讓71%，黃光裕與另一投資者Ma Qing佔股近4億元，持股52.5%，成為單一最大股東；高振順另斥資8,260萬元購入4.13億股中國星文化的新股及優先股，另一投資者余楠亦同樣買入4.13億股中國星文化新股及優先股，高振順與余楠最多持股中國星文化22.5%。黃光裕、高振順等四人有可能合共持中國星文化75%，中國星文化至今未復牌。
股壇中人話，呢隻中國星文化又叫中國星，傳話蔡東豪去中國星，會唔係馮京作馬涼呢？呢隻嘢賣殼，蔡東豪老闆高振順有份搞，會唔會預埋東尼蔡一份入去睇吓場呢?
黃光裕未出獄已經咁大動作，內地文化產業這一塊，睇嚟都好有投資前景喎。
Ariel
** 博客文章文責自負,不代表本公司立場 **
在金鐘清場行動中被捕的壹傳媒集團創辦人肥佬黎，繼上周四辭去《蘋果日報》社長後，上周五再辭去上市公司壹傳媒主席及執行董事職務，不再參與公司管理。
牌面理由是「希望有更多時間陪伴家人並進一步追求個人興趣」。
世事複雜，牌面理由通常都不是真正理由，他若想多點時間陪伴家人，之前都不會日日去佔鐘啦。
倒是人稱堅哥的壹傳媒社長堅哥講得坦白少少，堅哥在自己專欄爆料，話「黎先生一直有叫我返香港幫手睇頭睇尾。我總能找到似是而非的藉口推搪。在他被捕前一晚，他說：『我聽日會被捕，跟住會發生乜嘢事我唔知，大家都唔知。堅哥，我想被捕後，你立即接我香港《蘋果》社長位置……。』臨危受命。今次，我沒有半刻猶豫，成敗亦何怨！」
雖然堅哥話老細：「求仁而得仁，又何怨？」但睇佢引述肥佬黎的說話，肥佬都有少少無奈，怕被政府追殺。政壇中人估計，肥佬黎要為後佔中打算，唔知政府會告佢乜嘢，佢辭去報紙社長職位是怕報紙被封，辭埋上市公司職位係怕俾港交所追殺，怕將來判咗佢有案底時，話佢不適合做管理層，不如自己先行了斷，以免被動。
《蘋果日報》報道老闆呢單辭職新聞時，特別強調肥佬黎在壹傳媒集團持有73.49%股份，話肥佬昨日透過集團管理層表示：「壹傳媒絕對不會賣！」但Ariel睇咗咁耐新聞，慣咗倒轉嚟睇，肥佬黎呢句話有啲此地無銀三百兩。想當日佢都話台灣《蘋果日報》絕對唔會賣，結果就簽約賣俾死對頭旺旺集團蔡衍明有關的財團，搞到本來日日鬧旺旺蔡的台灣《蘋果日報》員週身唔聚財，結果係台灣政府唔批賣唔成。今次又大字標題話《蘋果日報》唔賣，真係惹人暇想喎。
