肥佬黎全辭職怕追殺

在金鐘清場行動中被捕的壹傳媒集團創辦人肥佬黎，繼上周四辭去《蘋果日報》社長後，上周五再辭去上市公司壹傳媒主席及執行董事職務，不再參與公司管理。

牌面理由是「希望有更多時間陪伴家人並進一步追求個人興趣」。

世事複雜，牌面理由通常都不是真正理由，他若想多點時間陪伴家人，之前都不會日日去佔鐘啦。

倒是人稱堅哥的壹傳媒社長堅哥講得坦白少少，堅哥在自己專欄爆料，話「黎先生一直有叫我返香港幫手睇頭睇尾。我總能找到似是而非的藉口推搪。在他被捕前一晚，他說：『我聽日會被捕，跟住會發生乜嘢事我唔知，大家都唔知。堅哥，我想被捕後，你立即接我香港《蘋果》社長位置……。』臨危受命。今次，我沒有半刻猶豫，成敗亦何怨！」

雖然堅哥話老細：「求仁而得仁，又何怨？」但睇佢引述肥佬黎的說話，肥佬都有少少無奈，怕被政府追殺。政壇中人估計，肥佬黎要為後佔中打算，唔知政府會告佢乜嘢，佢辭去報紙社長職位是怕報紙被封，辭埋上市公司職位係怕俾港交所追殺，怕將來判咗佢有案底時，話佢不適合做管理層，不如自己先行了斷，以免被動。

《蘋果日報》報道老闆呢單辭職新聞時，特別強調肥佬黎在壹傳媒集團持有73.49%股份，話肥佬昨日透過集團管理層表示：「壹傳媒絕對不會賣！」但Ariel睇咗咁耐新聞，慣咗倒轉嚟睇，肥佬黎呢句話有啲此地無銀三百兩。想當日佢都話台灣《蘋果日報》絕對唔會賣，結果就簽約賣俾死對頭旺旺集團蔡衍明有關的財團，搞到本來日日鬧旺旺蔡的台灣《蘋果日報》員週身唔聚財，結果係台灣政府唔批賣唔成。今次又大字標題話《蘋果日報》唔賣，真係惹人暇想喎。

Ariel

** 博客文章文責自負,不代表本公司立場 **

中國地產商進軍香港市場愈來愈進取，內地第一大房企萬科，剛剛又入標油塘鯉魚門徑地皮。

萬科總裁郁亮接受傳媒訪問，對佔中這個敏感問題，沒有多大興趣去講，只係話「無論是否佔中，萬科都很有信心」。但講到進軍香港，佢就相當積極，話萬科只是「小學生」，要向各大香港發展商學習。又話香港的定位對中國既獨特又重要，近年越來越多內地房企進軍香港，證明「香港地方好」他們對「大塊、小塊地，我都有興趣！」

萬科是內地房企一哥，今年頭11個月合約銷售高達1,911億元人民幣，今年銷售毫無疑問能突破2,000億元大關。近年已開始進軍香港，兩年前先夥拍新世界合作發展西鐵荃灣西站六區（TW6）項目，學吓嘢先，摸熟個市場。今年4月以8.6億元購入的灣仔聯發街12至24號地盤，每呎樓面地價1.36萬元。到油塘鯉魚門徑地皮招標，萬科亦係獨資入標。

以中資計，中國海外、華潤集團、世茂等早有在港買地起樓，萬科近年亦開始積極，另外保利置業年初亦以逾39億元較高地價，投得啟德地皮。

內地樓市仲係比較呆，所以內房公司想到香港找機會。萬科郁亮話，除了北京、上海外，內地很多城市的樓房庫存壓力仍然很大，正常合理去庫存水平是少於10個月，大部份城市平均需要13個月去庫存，不過中國地價根本沒跌過，房價沒漲，但地價在漲，大家都不敢買，怕賺不到錢。

政府消息人士十分歡迎內房商打入香港，政府想加大樓宇供應，推多啲地，但本地發展商就話建築費貴，只願低價投地，不時有流標事件，亦搞出樓價不斷創新高，但地價賣得低的現象。若多啲內地發展商入香港，他們投地進取，地皮去貨較快，增加競爭，點都係好事。