後佔中時代．政策急出台

佔領最後據點銅鑼灣尋日清場，算係暫時落幕，就輪到政府推出多項民生政策文件。清場唔夠48小時，已有數項關乎民生政策出台。特首CY喺行會亦話，處理政改同佔領之餘，亦要不遺餘力搞好經濟同民生。

昨日銅鑼灣馬路中午一開通，食物及衛生局局長高永文下午就開記招，公布自願醫保文件。醫保傾咗多年，好鬼複雜，未必一時三刻睇得明，但同大家健康同荷包有關，真係要好好關心吓。

點知朝早瞓醒報紙都未睇得切，行會就通過咗兩電出年的加電費決定，今次加的幅度唔算高，港島電費一向貴啲的港燈仲凍結唔加添，呢啲民生事務，加幾多好多市民關心，今次的結果聽落都唔會引起太大反感。

呢頭食飽飯，張炳良又拖埋副手出嚟，公布長遠房屋策略，話要增建房屋，未來10年，每年額外增加1000個單位供應，全數係做出售資助房屋。似乎回應社會上，尤其係年青人對現時樓價高企、無從安居的不滿。

睇嚟踏入後佔中，政府急急推出多項政策同諮詢，希望在民生事務事上攞番啲分，都算係撫平傷口的其中一招。CY今早仲預告埋，已經收到獨立專家小組有關高鐵工程報告，睇怕嚟緊，政府仲有大把嘢要公布囉！

Ariel

** 博客文章文責自負,不代表本公司立場 **

報業公會轉眼走過六十年，值得賀一賀，傍晚舉行酒會，好多官商名流出席。特首CY都有出席兼致詞，佢話自己同報業好有聯繫，因為細個時阿爸叫佢睇多啲報紙學認字，睇工商日報，有兩個專欄，一個山川人物，一個花鳥蟲魚，大個少少就投稿去報館，賺啲稿費，後來從政，同報館亦好有聯繫。

CY仲話對報業公會60周年好有感覺，自己都60歲，同報業公會同齡。

話鋒一轉，就講到比較嚴肅的內容啦，講到佔中，是幾個月的考驗，話非法佔領依家已經過去咗，即將開展政制諮詢，佢又特別提到拉布，令政府工程造價用多13億，借機都插下拉布，Sell吓硬嘢喎。

同場，唐唐都有出現，但唐唐早走咗，所以兩人碰唔到面啦。