政事
肥佬黎先後辭任《蘋果日報》社長同壹傳媒（0282）集團主席與公司執行董事，引發內外關注。
今期出版的《東周刊》報道，內部都會大執位，聽講佢地諗緊由現任《蘋果》社長葉一堅由台灣回香港坐，副社長就由總編輯張劍虹接任，而佢現在管的動新聞及港聞就由林平衡負責，而市場達人兼作家徐緣，據聞會負責蘋果副刊。
報道指堅哥將會睇得好緊，將報紙內容重新執過晒，而張劍虹早排抱恙，有頸痛，最近放病假放咗個幾月，至今個月月底至返工。報道又引述線人話，傳聞係堅哥的愛將陳沛敏有機會接任總編輯，不過現在未最後決定，要由堅哥定奪。
嘩，係真唔係，又多一位女老總上位囉。亦有傳聞話件事未最後決定，肥佬黎亦想搵前有線副總裁(新聞)馮德雄做老總，阿馮係經驗豐富的新聞人，9月離開有線後未聽聞有特別動向。
Ariel搵阿馮求證，佢斷然否認話：冇咁事。仲話自己依家好享受悠閒，兼職教書都幾好。
睇嚟佔中過後，政局點發展未明朗，蘋果先來大執位先喎，都波及傳媒界猛人喎。
Ariel
** 博客文章文責自負,不代表本公司立場 **
報業公會六十周年舉行酒會，唐唐都有出席，佢話好不幸佔中令社會好撕裂，兩方面意見都好強，希望可以彌合到兩種意見啦，暫時睇都有啲困難，好似自由黨呢啲中間啲的政黨，依家比較難有市場，遲啲希望可以好一些。
佢又話希望自由黨同經民聯可以合併，但睇嚟暫時做唔到。
唐唐冇佢老友田少咁樂觀喎，田少接受星島日報訪問時就話，自由黨向來支持功能組別與地區直選同時參與，要面向全港選民，認為今次政改波瀾後，自由黨的中間路線更廣闊。田少話佔中後，不少本身是專業的中產，不滿公民黨知法犯法；新民黨葉劉因是行會成員及要參選特首，又變了「超級梁粉」，佢相信若今天就是投票日，自由黨的勝算大增，只是兩年後真的選舉時，不知選民取向。
田少又話CY若要改善管治，就應主動與泛民改善關係，否則難以實現他的鴻圖大計。他又認為，若政府選擇以強硬手段對付泛民，香港只會更不和諧，商界更難做生意。
政壇高人就覺得，田少的想法同現實可能有啲距離，香港研究協會在清場前做咗個民調，訪問咗1112人，15個擁有立法會議席的政團支持度評分幾乎全線下跌，泛民政黨都算跌得幾慘烈，其中街工同職工盟跌得最勁，似乎應驗咗佔中運動愈激烈，泛民政團真係要找數。建制派方面，自由黨、經民聯同工聯會都下跌，反而喺佔中期間比較鮮明反佔中的民建聯同新民黨支持度評分有輕微上升。
呢個結果都幾有趣，對各政團應該有啲啟示啩，由結果來睇，田少話的中間路線似乎唔係咁易喎。
