許老爺等判無胃口只喝湯

前政務司司長許仕仁涉貪案，陪審團退庭商議咗兩日一夜都未有結果，陪審員就有司法機構提供的午飯，其他涉案人士點解決呢？

今日中午，人稱許老爺的許仕仁和律師黃國基，一齊去咗金鐘香格里拉酒店的lobster Bar食晏，代表許老爺的大律師蔡維邦亦有到場。許老爺似乎胃口麻麻哋啦，只係點咗$170的海鮮魚湯，仲叫咗杯英式茶，$60。而大狀胃口好啲，鋸咗扒。

有週刊許老爺好折墮要食30蚊叉燒飯，呢啲又係搵嚟講，佢申請緊破產，但而家仲咬緊政府長糧，而且即使判咗破產，佢老婆都係退休高官亦咬緊糧，請佢去酒店食$170蚊海鮮湯仲食得起。

 

20141217_PO_許仕仁_香格食飯 (3)_750

佢地食食吓，有記者追到lobster Bar，當然唔放過機會影相同拍片，餐廳經理將通去露天餐廳的玻璃門鎖上。

為咗避開記者，許老爺同律師大狀最後都轉場，在酒店經理安排下去到酒店地下低層的中菜夏宮貴賓廳，避開記者鏡頭，等法庭通知。

Ariel

** 博客文章文責自負,不代表本公司立場 **

佔中之後，阿爺都未郁手，《蘋果》已經動作多多去應變，《蘋果》老細肥佬黎除了辭去壹傳媒集團和《蘋果》的主要職務外，還公告咗一條「河蟹路線」，連《蘋果》中人都睇到眼反反。

事緣《蘋果》昨日有報道提到新社長的葉一堅的講話，堅哥提到他和肥佬黎接觸時，肥佬黎覺得報紙有可改善空間，有時予人覺得太過偏向一邊、一面倒，可以向中間靠攏多一點。堅哥引述肥佬黎指，現時社會因藍、黃絲分裂，傳媒有責任不應令社會分裂，希望社會和諧；有讀者亦指出有類似問題，報紙不能自己想做甚麼便做甚麼，要看社會和讀者需要，「是收起激情，多些智慧的時候」。

聞說連《蘋果》中人見到肥佬黎講呢個「河蟹論」(即是和諧論)，都打咗個突。熟知內情人士話，肥佬黎講乜，堅哥本來唔使在報紙上寫出來公告天下，但如今咁樣公開晒，即係想外面的人都知，有個「保留紀錄」的意思。事關佔中爆咗無耐，肥佬黎覺得佔旺黑打黑好似過咗火位，想叫人收細佔領範圍，但自己報紙前線的小朋友啋你都傻，唔係你老闆話叫我放就放，收就收，報紙上寫的東西一啲都無收，肥佬黎都吹唔漲(雜誌好似緊跟老細路線多一點)。

如今堅哥引述肥佬黎咁講，等如批評份報紙在佔中時太偏、令社會分裂。當然，講衰啲肥佬黎如令一度被捕，將呢的內部矛盾公開，又有少少「份報紙寫乜都唔關我事，我都管佢地唔到」的味道。

知情人士又話，《蘋果》老細沙膽虹在佔中旺季中頸痛放咗個幾月假，回來後以身體理由，向肥佬黎請辭，在這個《蘋果》多事之秋，肥佬黎唔做《蘋果》社長交俾堅哥接棒，自然都會挽留沙膽虹，沙膽可能留任副社長，咁總編輯個位又吉咗出來，要找接班人。肥佬黎講明份報紙要「中間一點」，等如向總編接任人落咗個條件，你食得起做中間報先好做。

在如今紛亂的社會，有狂派又有博派，有忠亦有有奸，要做「忠報」容易，要做「奸報」容易，要做「忠奸報」，有啲難度噃，係唔係又變咗「又要威，又要戴頭盔」呢？