政事
大家睇刑事案問起啲法律問題，話有啲被告判咗刑，等候上訴期間，有無機會保釋外出等候上訴?
Ariel問過法律界人士，佢地話大案判刑之後，可能等兩三月先可以排到期申請保釋，但千祈唔好以為一定可以保釋外出等上訴。法庭俾唔俾保釋，除咗考慮被告棄保潛逃的機會大唔大之外，主要睇刑期長唔長，以及上訴推翻定罪的理據夠唔夠。理念係如果定罪犯人判監刑期短、而上訴理據又強，等得上訴嚟都坐完監，咁對犯人唔太公平，就會批俾佢保釋外出等候上訴。
所謂刑期短的是兩三年以下，所謂上訴推翻定罪的理據強機會高，情況件件案唔同，但係如果你中幾條不同罪名，要推翻晒所有罪名的機會好細，但如果只中一條罪，上訴成功的機會較大。
結論係連中多條罪、判刑又長的被告，即使上訴，都好大機會要服刑等上訴，無得保釋出來。
Ariel
** 博客文章文責自負,不代表本公司立場 **
新地案終於落幕，許仕仁被判入獄7年半，相當慘情。
許仕仁律師話，許因為怕凍，要求懲教處共提供了9張被，但他冚被後仍然雙手雙腳冰冷，不能入睡。
人人都知老許身子弱，佢係有錢仔出身，身子唔壯，非常怕冷，大熱天時都著棉衲，而家仲要日日食中藥。入咗獄無暖氣，床又凍，自然係蓋9張被都頂唔順。
不過法官麥機智判佢入獄7年半，其實都判得較輕。法官在判刑時對許的評價幾高，形容若非本案，他已成為歷史上本港近年最好的政務司司長，但他為咗維持高尚生活而犯案，令許的歷史蒙上陰影。
麥官指許仕仁05年出任政務司司長，大家都知道佢係有謀略、有能力的人，在香港艱難時期上任，備受尊重。量刑時考慮到許仕仁過往在政府努力工作、對香港有極大貢獻，特別是前特首曾蔭權為佢求情，以及許98年在香港貨幣市場「打大鱷」，品格一直良好及成就大，因此扣減部分刑期，所以都算判得輕。
7年半刑期對老許嚟講都好難挨啦，上訴亦都唔知走唔走得甩。
