創科局2月14死線通過存變數

佔中之後在立法會內第一場大龍鳯，都算係財委會要過「 創新及科技局」撥款建議啦。泛民在財委會內大力發動「拉布」 攻勢，即使沒有爭議性的漁業貸款基金，他們亦準備提出高達600 多項「修訂」，財委會這個財政年度的會期時日無多， 故政府不得不抽調漁業基金等撥款申請，讓路俾創科局撥款。

政府這樣急要盡量先討論創科局的撥款，因為2月14日(下周六) 是本個財政年度立法會財委會最後一次會期， 若然在此之前不能通過創科局的撥款，又要在4月1日下一個財政年度開始之後，重新來過，重新再過立法會。

成立科技局之建議先在2012年特首CY上任時提出， 當年在立法會被否決。到去年施政報告重提設立創新及科技局，同年 10月29日，在立法會以35票贊成、19票反對、1票棄權， 通過設立創科局的決議案。跟住才去財委會申請撥款。 若然本財政年度過唔到， 下個財政年度先要去立法會重新通過一個議案，然後再去財委會， 重新再來，真係搞到人都顛。

而家連開會的時間都唔夠，政府已向張宇人建議加開財委會會議， 可能在下周六加一次會。唔好以為在下周六死線完結前， 財委會一定可以通過創科局的撥款，此事存在變數， 這是佔中之後第一炮，泛民一定全力以赴去搞。 而自由當張宇人到底有幾硬手去剪布，係成件事的關鍵。 你睇上屆財委會主席吳亮星在新界東北撥款時，剪布剪到幾論盡， 就知道宇人哥份工唔易做。

早前一次會議，張宇人突然出招， 只准已舉手的十多名議員最後一輪發問，變相「劃綫」 不讓更多議員發問，泛民大力反彈，最後他們同張宇人火拼半小時。 未來預咗次次開會都要火拼啦。

Ariel

** 博客文章文責自負,不代表本公司立場 **

港大法律學院前院長陳文敏在報章撰文發炮， 指左派報章近期對他作「瘋狂式的攻擊」， 相信原因之一是傳聞他可能出任大學副校長。 他指這是嚴重干預院校自主，企圖遏制言論自由的行為。  

港大有好多個副校長職位， 過去其中一個副校長李焯芬教授和阿爺關係較好，他退下後朝中無人。 傳聞去年有建議陳文敏接任副校長職位，在港大高層已有不同意見， 後來阿爺見到佔中時港大法律學院扮演的角色，自然唔多奶奇。

政壇中人話，左派報章在去年11月已開始向陳文敏發炮， 但他一直忍隱不發，到最近突然高調發炮還擊， 估計和這個副校長的職位角逐有關。

有人將此事件和當年鍾庭耀的港大民調事件比較，話會唔會爆出大鑊 ? 但政壇中人話，鍾庭耀事件有明顯的著力點， 因為事涉特首辦的路祥安，矛頭指向政府， 又涉及受干預的港大校長鄭耀宗，事件一鬧大， 就想拉路祥安和鄭耀宗下台，當然背後是針對特首董伯伯。

佢認為今次陳文敏事件比較難搞大，陳將矛頭指向左報， 但現實上好難話拉左報老總落台，或者叫阿爺問責， 左報隨時可以用「新聞自由」做擋箭牌，唔易入手。加上項莊舞劍， 似乎志在爭位，而唔係搞大件事喎。