反對派正磨拳擦掌，在9月立法局選舉力爭超過半數議席，由戴耀廷導演的新東初選武大會前晚（4月14日）召開，協調新界東參選事宜。新界東共有9席，2016年民主派獲6席，建制派獲3席，經過連串DQ及補選後，現時民主派有4席，建制派有3席，有2席從缺。
前晚有16隊出席會議，反對派在新界東約有45萬票，建制派有30萬票，今年坐6望7。泛民政黨大佬認為，如果全部16隊齊齊入場參選，會分薄票源，想獲得第7席有難度。所以要先篩選出6隊參選，另加一隊後備，亦所謂6+1。不過，篩選的準則有待商討，但明眼人一看，便知有大黨背景的，必然優先，那麼沒有大黨背景的素人，自然會有反對聲音。
雖然有報道話，當晚大會「席間唯一表明反對初選方案的只有自稱獨立本土派的素人鄒家成」。但有線人話其實有幾個素人都有意見，唔止鄒家成一個。
鄒家成在facebook出帖回應。
後來鄒家成在facebook出帖作了回應，他都講得比較客氣，話「我係對參選前只舉行有約束力初選嘅方案有保留，但會積極考慮會議上提及嘅其他方案。」
鄒家成特別針對在「選舉提名期結束之前」得出初選結果名單，並將民主派參選人限制喺名單入面，認為係相當危險的做法，咁做無異於協助政權揀選DQ目標。而2016同2018年的經驗，亦反映政權DQ參選人其實係無數量上的限制，佢鍾意DQ幾多個就DQ幾多個，所以呢個唔係話我地喺事前預計佢會DQ再派多一兩條名單做保險，就可以解決得到。
鄒家成又為政治素人發聲，覺得上述初選方案對於素人並唔公平。過往當選的素人（例如, 劉小麗）普遍都需要到競選後期（可能8月），先能夠攞到足夠的曝光率宣揚政治理念，因此喺6、7月就舉行初選，對於素人參選人絕對係唔公平。
他又引述早前民間記者會嘅民調結果，普遍香港人都期望優先推動本土派或素人參選，以避免傳統政黨不積極作為的情況。在咁樣情況之下，希望最後能夠得出一個符合公眾期望，同時有利大家公平、積極競爭的初選方案。
而另一位不願透露姓名的素人則表示，如果泛民有16隊人參選，可能真的太多，有一個約束力的初選，似乎是合理的，不過篩選的準則如何可以做到公平？其實都頗為複雜，或者這個初選會選出一些勝算比較高的候選人，防止太多參選隊伍會分薄票源，如果是這樣，他個人是會接受戴耀廷教授的安排。
但亦有與會者認為，整個遊戲規則對素人極不利，咁快就叫人投票，排在名單較後的機場大叔陳振哲、立場姐姐何桂藍、素人呂智恒、羅庭輝、鄒家成等，普通泛民選民而家有邊個聽過佢地個名 ? 公眾根本無認識佢地的機會，等如「未跑先選」，素人當然死梗啦。佢話應該用分位制，例如分番兩個位俾素人，讓素人有機會當選，而不是舊人霸晒啲位。
2016年民進黨讓岀5席，讓時代力量入立法院。
他舉2016年台灣立委選舉為例，民進黨專門讓5個位出來，俾在太陽花學運中冒起的時代力量素人，有機會入立法院。如果台灣當日搞香港泛民而家的初選，時代力量可以全數出局。香港的泛民點解唔可以每區讓兩個位俾新人？
Ariel
** 博客文章文責自負,不代表本公司立場 **
