周融網報籌備大半年

反佔中大聯盟發言人周融籌辦一個名為《獨立網媒》的網上報章， 將於周三(5月6日)面世，聞說份嘢籌備咗大半年， 周融有備而來，不是即慶而作。

周融搵咗傳媒人林雲生出任總編輯一職，有人收到林雲生咭片， 又發現佢份嘢中英文名好似無乜聯系。中文名《獨立網媒》(個名有 少少似另一個網媒《香港獨立媒體》)，顧名思義都知佢想講乜。 而英文名叫《HKG》。周融有對外解釋《HKG》是香港的簡寫， 亦可以解作「Hong Kong Good」(香港好)或「Hong Kong Great」(香港偉大)。周融未對外講個中文名， 唔知個名定實咗未。

 

周融對傳媒話，他的網報和facebook專頁會於6日正式「 開張」，口號是「獨立網媒，為港發聲；正論博客，剖析新聞； 獨立思考，傳正能量」，主打政治新聞，除了有評論文章外， 也邀來數十位博客定期寫文章，預計每日發布20至30條新聞。

周融解釋，網報的目標讀者是30歲以上網民， 特別是佔領運動後才開始上網的網民。他強調，現時網上有大量「 黃絲」網媒，但年長網民未必支持，所以「HKG」 要填補這個空缺。

知情人士話，而家搞份網媒少少地都要幾百萬一年， 特別係要做新聞，唔係齋吹水，因為請人做嘢好貴，有得10個、8 個全職員工，無幾百萬落唔到樓。而周融係有備而來， 聞說佢去年下半年已有此構思，拍板後開始籌備， 搞到而家先至出世。佢份網報周三出世，政改方案6月底才投票， 睇嚟周融都想在政改爭議上有所作為。

Ariel

** 博客文章文責自負,不代表本公司立場 **

呢個五一黃金周訪港旅客下跌情況比較突顯，旅遊業界事前由酒店訂房都估計到，所以搞咗個大型優惠救亡行動，優質旅遊服務協會聯同全港逾一萬間商戶，一周前開始，一連五周推咗個「開心著數大行動」，全港不同景點、零售店同餐廳有不同優惠，希望吸引旅客同本港居民消費。

不過，計劃推咗一周，睇新聞報道，原來唔少來港遊客根本聽都未聽過有著數計劃，零售店店員亦無主動向客人講解有優惠。例如有化妝品店買滿100元送30元現金券，以及可半價換購山頂蠟像館門票，有深圳來的遊客去幫襯時話，在內地都無聽過有呢個優惠計劃的宣傳，認為「但你不主動說，好像做了等於沒做一樣。」另外本地購物者亦話，無聽過呢個計劃。

有參與的百貨店亦無貼出參與咗計劃的標誌，客人主動問到時店員先答嘴，而一啲參加咗的連鎖店主動向顧客介紹信用卡折扣優惠，但相關活動優惠詳情則在店內角落處以單張展示。

過萬間商戶參與的著數優惠，本來都應該搞到興烚烚先啱架，但計劃最想吸引的內地旅客以及本港年輕購物者就好似唔多知道，正如遊客所講宣傳不足，真有啲「雷聲大、雨點少」的情況，難得有咁多商戶參與，搞手都應該再度吓橋，在未來四個星期，大力啲、聚焦啲谷吓個活動，至緊要係宣傳訊息去到最想吸引的人群。