卿姐放軟 棠哥企硬

基本法委員會委員饒戈平日前話特首普選的提委會擴大選民基礎，將公司票轉為個人票的建議仍然有討論空間，昨日民主黨主席卿姐企街站接受訪問時話，覺得饒教授係向正確的方向行，「因為佢開始講、開始鬆動，但要鬆動得足夠，令香港市民覺得有真正選擇，嗰時泛民主派會樂意支持方案。」

卿姐呢個sound bite聽落非常正面，亦係泛民近期講出最柔軟的一個立場，老實講饒戈平講的將公司票轉做個人票，其實一直都有人提，從來都冇人話阿爺一定唔接受。不過，泛民早早就綑綁咗，話任何跟8‧31的方案都不能接受，所以先至冇人講，令人有少少奇怪的係卿姐呢個時候表現出咁樣的柔軟態度，係咪喺6‧17政改方案投票前，真係想同阿爺講吓數。

卿姐講完，工聯會大佬鄭耀棠就潑冷水，話卿姐喺政改方案出爐之後，先傾細節，係冇乜意思，話：「到今日為止我都唔知泛民想要乜，擴大選民基礎，畀咗係咪收貨呢？唔知道。」

政壇高人解讀棠哥的說話，同阿爺的Line to take(發言立場)一致，就係質疑泛民乜都反對，但就無提方案出來，阿爺的講法係，泛民如果能夠提出符合8‧31決定的方案，阿爺並非完全不會考慮，但如果方案提唔到，乜都反對，大家就冇偈頃。

卿姐軟棠哥硬的狀況，似乎亦都顯示出，泛民並非鐵板一塊，但問題係依家唔見到有任何大的力量，可以將泛民拉去同阿爺一齊傾，而且泛民的態度好飄，又綑綁埋一齊，要傾都係高難的事。

Ariel

** 博客文章文責自負,不代表本公司立場 **

專欄作家屈穎妍日前在《頭條日報》發表文章，遭到泛民激進組織「調理農務蘭花系」恐嚇，要將佢滅門，言論相當恐怖，惹起各方關注。

屈穎妍在《從此，不做不錯》的文章中，就警察處理智障男被誤指殺人事件發表評論，旋即受到部份激進泛民人士攻擊，「調理農務蘭花系」主席馬健賢便在臉書專頁寫道：「林超榮（屈穎妍丈夫）屈穎妍一家五口，應當滅門才合道理。滅門，雞犬不留」。

聞說屈穎妍已決定報警，將事件交警方處理。

有泛民人士私下議論，這種言論好差，但他們不會公開批評。

Ariel同法律界人士傾過，佢話呢種做法好危險，唔好以為只是言論，隨時有人跟住做。上次上水燒藥房，也是網上有人號召，就有年青人跟往去做。若有人見到「㓕門」的講法，走去攻擊屈穎硏或其家人，講話的人就是「協助及教唆」他人襲擊。

法律界人士話，呢啲激進言論十分危險，不能助長。