政事
機管局主席羅康瑞行將在月底卸任，下月到貿易發展局出任主席， 離任見記者講述機場北區的發展大計。 已過世的前機管局主席張建東當日和羅康瑞就此地塊的用途曾激烈爭拗。
記者問起羅康瑞做機管局主席的感受，他提到北部地塊要好好用，當日好勞氣，如今氣氛好正面。 佢自己今個月底走，過去無謂再提。當日只是覺得若浪費了機場北的土地好嘥。
康瑞哥如今不斷唱好，話自從新行政總裁林天福上任後，「 好咗好多」，同事間氣氛好好。
佢五月一做完機管局，下月就到貿發局返工，中間唔放假，仲話而家一日只瞓5個鐘。佢下月一上任貿發局後，在7至11日帶 團外訪，今次特首CY也會隨團，去年佔中特首無得跟貿發局出訪，今年就會跟住去啦。
Ariel
** 博客文章文責自負,不代表本公司立場 **
基本法委員會委員饒戈平日前話特首普選的提委會擴大選民基礎，將公司票轉為個人票的建議仍然有討論空間，昨日民主黨主席卿姐企街站接受訪問時話，覺得饒教授係向正確的方向行，「因為佢開始講、開始鬆動，但要鬆動得足夠，令香港市民覺得有真正選擇，嗰時泛民主派會樂意支持方案。」
卿姐呢個sound bite聽落非常正面，亦係泛民近期講出最柔軟的一個立場，老實講饒戈平講的將公司票轉做個人票，其實一直都有人提，從來都冇人話阿爺一定唔接受。不過，泛民早早就綑綁咗，話任何跟8‧31的方案都不能接受，所以先至冇人講，令人有少少奇怪的係卿姐呢個時候表現出咁樣的柔軟態度，係咪喺6‧17政改方案投票前，真係想同阿爺講吓數。
卿姐講完，工聯會大佬鄭耀棠就潑冷水，話卿姐喺政改方案出爐之後，先傾細節，係冇乜意思，話：「到今日為止我都唔知泛民想要乜，擴大選民基礎，畀咗係咪收貨呢？唔知道。」
政壇高人解讀棠哥的說話，同阿爺的Line to take(發言立場)一致，就係質疑泛民乜都反對，但就無提方案出來，阿爺的講法係，泛民如果能夠提出符合8‧31決定的方案，阿爺並非完全不會考慮，但如果方案提唔到，乜都反對，大家就冇偈頃。
卿姐軟棠哥硬的狀況，似乎亦都顯示出，泛民並非鐵板一塊，但問題係依家唔見到有任何大的力量，可以將泛民拉去同阿爺一齊傾，而且泛民的態度好飄，又綑綁埋一齊，要傾都係高難的事。
