律政司司長袁國強與運輸及房屋局長張炳良，與港澳辦官員商討廣深港高鐵香港段的「一地兩檢」安排。會後袁國強指出雙方完全同意朝「一地兩檢」方向進行工作，亦同意在通車前做好包括本地立法及配套等問題，但要先與內地討論一地兩檢涉及的「大議題」，得出共識後可能仍有詳細法律問題及程序，要研究是否微調方案，但就冇透露微調方案的細詳。
據聞依家阿爺同特區政府都係希望沿「一地兩檢」方向努力，咁樣始終係最大的效益，具體方案可以話有N個咁多。
其中一個係早前田二少提議同時引用《基本法》18和20條，由中央授權，委託香港入境處人員，代替內地執法人員，在香港實施內地法例。不過，政壇高人覺得好難落實，好簡單，如果遇上被拒入境內地的人士時，本港的執法人員就要唔俾佢哋上車，呢種狀況社會能否接受呢？
另一個方案係當乘客入閘上車關門後，係咪可以視作為搭客已離開香港境，當車門封閉後，內地執法人員在列車上執行內地法律做邊防檢查，不過，呢個方案操作起來也有困難，列車已封閉在行駛中，遇上違返內地入境規定的情況如何處理。
至於N個方案中亦有建議，旅客在辦理完出境手續，在上車前的閘口，辦理內地入境手續，內地執法人員即時將旅客資料同清關資料，傳送到深圳邊防入境部門手上，由佢哋確認係咪放行，旅客登車之前，如果未能得到確認就不能上車。當然呢個方案仍然有得拗，極端的例子，當旅客登上列車一剎那被發現帶有毒品，到底係執行香港定內地法律？香港販毒唔使死，內地就分分鐘鐘打靶，如果唔傾清楚，執行起來可能產生好多爭拗。
不過，據聞民主黨負責保安事務的涂謹申提出類似方案，政府都覺得起碼有個實質方案研究可行性，係正面方向。其實今次係咪傾出一個兩地法律都可以接受方式，處理一地兩檢，都直接影響高鐵的成本效益。
Ariel
** 博客文章文責自負,不代表本公司立場 **
