早前講到年青人得到父母的支持, 畢業後的第一份工不需要去打工磨練學習, 而是做一個老闆,就算是虧本, 家人還是繼續支持,根本就沒有失敗的成本。
退休公務員M君睇完打來俾我,話我out啦, 仔女肯創業父母支持,即使明知佢輸都要俾佢試吓, 皆因這種仔女已經算有大志,而家愈來愈多小朋友根本胸無大志, 做嘢都算俾面啦。
佢講起一個真故事,佢朋友的個仔在理工大學畢業, 當朋友期望個仔出來搵份好工,有美好前途之際, 佢發現兒子並不積極搵工。現今社會怕俾孩子壓力,怕他們做傻事, 所以爸爸從無俾孩子壓力,在搵工一事也不例外,讓他慢慢搵吧。
有一天孩子告訴他要返工了,老爸很高興,問「到那裏上班?」 孩子話:「到樓下的茶餐廳做侍應。」老爸頭腦一陣暈眩, 有點轉不過來的感覺,以為孩子做住散工先,怎料孩子話「做長工」 ,老爸再問:「為何去做侍應?」個仔答,「返工近嘛。」
如此這般,呢個大學畢業生就做咗侍應,而且長做下來,「返工近」 呢個答案,都算相當精警啦。
M君嘗試解讀朋友孩子的心態,可能搵唔到好工,好煩。 日日落樓到茶餐廳食飯,見佢請緊人做待應,都有成萬蚊收入, 絕對唔差過大學生的人工。再睇睇,份工無乜壓力,都係早餐、 中午時間多少少人,其他時間都好靜,返工有一半時間玩吓手機, 幾正。仲有,飲食業難請人,夥記惡過老細,唔使受老闆氣, 唔鐘意就走,一點壓力都無。反正日日自己都落那間茶餐廳食飯, 不如返工啦。
我話返工總好過唔返工。但大學一年收5萬元學費,但每個學位成本 20萬(醫科生更要100萬),社會津貼咗15萬一年,4年60 萬,若學生畢業後不做事,或不投身要大學培訓的行業, 這些金錢就浪費了。當然,還有爸媽的苦心。唉, 做人父母甚艱難呀。
黃毅力
** 博客文章文責自負,不代表本公司立場 **