膠仔屋企住近香港其中一條最繁忙嘅馬路，晚晚啲車嘈到我一定瞓得唔好。有時同朋友聚會夜咗返屋企，就更加唔夠瞓，第二日返工真攞命！小弟暫時無能力換過間屋，唯有諗方法瞓得好少少，於是參考咗外國一位專家建議。
First Psychology Scotland心理學家及臨床主任Ewan Gillon教授喺網上寫咗篇文，話瞓教時環境愈黑愈好，因為光會影響抑制「褪黑激素」分泌，降低睡眠質素。另外大家平時應該要好好控制咖啡因攝取量，盡量避免喺下晝三點後飲咖啡、茶同埋汽水。另外適量運動亦會令人瞓得更香甜。
阿教授仲特別提醒，瞓之前一定要放鬆個人，睇書、聽歌或者沖個涼都係好選擇，更重要係放低部電話，因為曾有研究話電話發出嘅藍光會令人身心不寧。如果嗰日好多嘢諗，試試用紙筆列出自己煩惱嘅事情，咁樣有助你放低件事。
睇完佢介紹，坦白講我覺得都係廢話多，問題在於都市人願唔願意實行。膠仔工作壓力唔大，個腦空盪盪，亦唔鍾意飲咖啡汽水同埋茶，只係真係好難捨得放低部電話唔撳。另外香港市區永遠都光撑撑，膠仔望住屋企出邊塊五光十色嘅廣告牌，心情有點灰喎。
至於教授篇文呢，原文如下：http://www.huffingtonpost.co.uk/professor-ewan-gillon-/sleep-deprivation_b_8121296.html?utm_hp_ref=tw
神州快訊
** 博客文章文責自負,不代表本公司立場 **
