濠賭股大升，銀娛（027）及嘉華（173）大老闆呂志和身家暴漲，佢接受《蘋果日報》訪問時提到，做大富未必安樂。佢話錢愈多，反而愈唔開心，成日身不由己，又話「情願好似舊時咁，得閒就湊吓啲仔女去吓旅行、游吓水，咁就最開心，又冇人睇我。你而家出到嚟，個個啄鬼住你，煩呀。」
http://goo.gl/BdPqly
小市民聽到呂志和咁講，會覺得佢口講唔開心，其實講緊風涼話，只係「晒命啫」。
不過，據陸羽仁接觸過的唔少超級富豪，又發覺佢哋的確唔係一般人所想咁開心。呂志和近年在富豪榜急促爬升，可能仲會興奮少少，其他早已排在富豪榜前列的鉅富，連這種刺激感都冇埋。
一般人想像富豪最正的生活，錦衣肉食，巨宅美人，遊艇飛機，但呢啲嘢嘆得幾嘆就麻木，正所謂娶咗香港小姐對住佢10年，佢都變番普通人。但富豪卻有好多小市民無的煩惱，唔純係「身不由己」，陸羽仁觀察佢地唔happy的原因有三大個。
首先係擔心地位受到挑戰。大家唔好以為只有普通一個二打六，至會爭上位、爭升職，擔心飯碗俾人搶走。其實超級鉅富，尤其係排在富豪榜前列的，一樣驚事業俾人過頭，排名俾人搶走，面對的壓力同普通打工仔沒有分別，都唔好講有時會如新地郭氏兄弟咁惹上官非嘞。
第二個煩惱係年華老去，時不我待。做到超級富豪，無80，也有70，人生都走咗一大段。即使叻到好似剛剛過身的邵逸夫爵士，107歲，都係只有20、30年貨仔，更何況有幾多人可以有107歲呢！
有網友問陸羽仁，佢現在31歲，打份工，一事無成，非常無癮。我嘅回答係，你而家咁後生，青春無限，已經好過癮啦！網友以為我咁講係玩佢，佢仲年輕，唔知青春的價值。恆基（012）主席李兆基去年年中講過，「用百分之九十九的身家換30年青春更加化算。」如果真係得嘅，我相信所有富豪都會即刻換。一個富豪有1000億身家，而家86歲，若得番10億身家，變番56歲，佢真係會制，得番1億都可能制，得番1000萬佢或者要諗諗(我估都會制)，由此可見年少多好。你無論有幾咁多錢，諗起人生就快玩完，又點會開心呢？後生，才是最happy嘛。
插一隻《年少無知》俾大家聽聽。http://goo.gl/cMNTX8
鉅富最後一個煩惱，係最擔心子女爭產。呂志和提到，「自己錢唔係咁多」，但亦承認「個個家庭都有呢個問題。」我就話普通家庭過年一家人坐埋食飯，嘻嘻哈哈，樂也融融。大富之家就唔同啦，人人勾心鬥角，諗緊嘅嘢好可能係「老竇幾時死？會分到幾多？」咁又點會開心呢？
陸羽仁唔係喺度安慰大家，冇錢都好掂。而係話第一，年少多好。第二係建議爭取做小富唔使做大富，目標係退休時有過千萬現金，財務自由，一家人開開心心就OK啦！
陸羽仁已開設Facebook專頁，快啲去Like：
https://www.facebook.com/pages/%E9%99%B8%E7%BE%BD%E4%BB%81/204865603047048?hc_location=timeline
陸羽仁
** 博客文章文責自負,不代表本公司立場 **
最近有朋友發短訊問我隻禾賽科技(2525)仲有無得升，佢舊年11月底睇完我個專欄話可以趁低吸納禾賽，朋友一睇完就落手，在147元買咗，估唔到一買完過兩日就一直升，而家仲升番上213元的水平，個幾月升咗45%，佢問我好唔好沽。
禾賽上市至今股價圖。
禾賽主要做激光雷達，產品用於高級駕駛輔助系統、自動駕駛系統及機器人身上，是內地激光雷達市場的龍頭大哥。佢公布去年第三季業績都相當唔錯，純利2.6億元人民幣，創單季新高。但當時禾賽股價相當唔得，去年9月上市時招股定價212.8元，但11月一度跌到116.3元低位，比招股價差不多跌咗100元。
陸羽仁當時覺得禾賽基本因素好好，但招股時反應良好，公開發售接獲169倍認購，街貨好散。大戶要炒，都要沽吓佢先，等佢跌吓才可以收貨，但係事前都估唔到佢跌到116元咁誇張，跌到咁低時，散戶借孖展買都要打靶，所以覺得可以低吸。
其實近日大行都睇好禾賽前景，中金發表報告指，禾賽2025年全年交付量超160萬台，截至1月5日公司已獲24家主機廠超120個車型的量產定點。禾賽規劃年產能將由2025年的200萬台提升至2026年的400萬台、實現翻倍增長，禾賽預計泰國曼谷伽利略工廠將在2027年初投產。中金認為，公司在手訂單充沛、國內外產能拓展積極，有望帶動未來出貨量及收入高增。
中金指，禾賽近日展示最新激光雷達技術成果，並更新交付量、產能規劃、戰略合作等經營情況。量產交付能力領先行業，國內外產能穩步推進。輔助駕駛L3車型禾賽獲工信部准入許可，激光雷達交付數量有望提升。Robotaxi、機器人等下一代物理AI浪潮襲來，激光雷達成關鍵引擎。中金維持對禾賽2025年營收預測不變，上調2026年營收預測6.4%至45.3億元，首次引入2027年營收預測60億元。該行維持禾賽「跑贏行業」評級，考慮到智駕及機器人板塊估值中樞上移，上調禾賽目標價至241.1港元。
禾賽在今日(1月9日)上午收213.4元，升番上招股價212.8元以上水平。朋友147元入貨，已升45%。雖然陸羽仁覺得禾賽在年初仍有一波升浪，會炒至3、4月，但朋友賺價已多，可以先沽一半食一半糊先，留一半可以睇中長線。
(如想睇多啲陸羽仁分析大市貼股票，即訂閱「石榴台」，逢周日至周五，日日睇陸羽仁專欄，吼實有乜好股可以投資！)
