馬時亨力駁高鐵方案「糖衣毒藥」講法

馬時亨未上任做港鐵主席，已遇著高鐵的大頭佛，港鐵同埋政府搞出為高鐵融資的方案，建議港鐵派每股＄4.4的高息，為高鐵超支填數。講白啲係由庫房找數，港鐵小股東得利，換取小股東同意港鐵作出為高鐵包底的承諾。

高鐵超支咁多預咗社會上有不少批評聲音，無論什麼方案都會挨鬧，不過，相信政府中人都無想過鬧得最勁的不是泛民議員，而係建制派經民聯議員張華峰，佢在報章撰文狠批港鐵玩弄巿民和議員，若非「暗騙」即是「明搶」，佢認為派高息利誘小股東，希望他們「見利忘險」，猶如糖衣毒藥，形容方案「搵笨」之至。齋睇文章用詞都好厲害，唔睇署名，相信好多人都以為係泛民議員的意見。

接咗個盪手山芋的馬時亨今朝連走多個電台，似有反擊之意，回應被批評派發特別股息是「糖衣毒藥」的講法，話政府就高鐵造價封頂，代表港鐵要包底，小股東要承受的風險增加，而風險與回報是相對，港鐵要給予小股東特別股息，作為相應的回報。

佢又話依家每項香港大型工程差不多都有超支，連自己住所的裝修工程都超支，不認為當年港鐵估算高鐵造價為650億是預算錯誤。

政壇中有人估計，馬時亨的政治手腕一向不弱，佢有份幫手度出呢個方案，唔知事前估唔估到，最勁的批評竟係來自金融服務界的建制派議員，今朝聽時亨哥反駁「糖衣毒藥」批評，就似乎特別嚴肅肉緊啦。

來年2月後高鐵方案上立法會，惡戰連場，政府搵到馬時亨做港鐵主席，都算多個「戰將」啦。

Ariel

** 博客文章文責自負,不代表本公司立場 **

港專前身係旺角工人夜校，2001年開始開辦多個經本地評審的專上課程，開始蛻變，2001年成為可開辦全日制高級文憑課程專上院校，去年更成為可以頒授學位的院校，包括社會發展研究（ 榮譽）社會科學學士課程，可以話係連番大變身。

 

港專有咁大發展，校長陳卓禧居功至偉，今日港專在馬鞍山的賽馬會本科校園舉行開幕禮，政商界都好俾面，中聯辦主任曉明哥、署理特首林鄭作主禮嘉賓，捐助咗$4, 480萬元俾港專發展本科教育的馬會，副主席周永健亦有到場。

 

Ariel亦去咗湊熱鬧，發覺港專的校舍相當不錯，簡約實用， 陳校長發揮八面玲瓏的功力， 拉到不少熱心捐助的團體為新校舍出力， 好似慧妍雅集就支持佢哋改建校園的學生活動中心， 最特別在學生活動中心旁邊竟然有間好有英國牛津feel的caf é，原來係同一班年青商界人士合作，由佢哋出資搞的，請咗三位想開café 的年青人打理，仲會請港專同學做兼職，等讀相關課目的同學有實戰機會。

 

Ariel聽聞港專除了開辦課程方面落功夫，亦都同商界聯絡，希望為同學將來就業打下基礎，亦有些新的合作模式傾緊，睇嚟都想再有進一步發展。

 

Ariel同一些聘用了港專畢業生的僱主傾過， 他們話傳統地以為幾間主要大學的畢業生思辨能力高，做嘢會好得。但後來發現港專畢業的技術能力高，而且更重要的是工作態度踏實，所以希望港專努力搞下去，可以為社會訓練更多實幹人材。