霸戲哥之日常#064 │ 母愛

喺電影世界入面，我哋見到嘅母親角色，通常都被塑造成堅強勇敢，對兒女付出無私無限嘅愛。

但你我都知，呢個只不過係主流觀眾或俗世一廂情願對「母親」嘅刻板詮釋，而唔係事實。真相係，母親可以疏忽照顧子女，可以對丈夫不忠，可以拍拍籮友拋棄成頭家。

Maggie Gyllenhaal執導嘅《The Lost Daughter》（失去的女兒）就係一齣咁另類嘅電影。故事講述大學教授Leda（Olivia Colman）去希臘海邊渡假，喺沙灘遇到一對母女，勾起佢廿年前不堪回首嘅記憶。隨住劇情一層一層咁揭示Leda嘅過去，觀眾得悉原來當年佢為咗完成學業同不堪壓力，不惜賴低兩個女，就算之後返回兩女兒邊，都冇辦法彌補呢個傷痕，同忘記呢份罪疚感。

或者有觀眾會覺得套戲跳tone，唔明白Leda嘅情緒變化因由，但呢個其實正正喺年輕母親嘅複雜情緒，既要兼顧學業，又要撐起頭家，真係做人阿媽甚艱難。《The Lost Daughter》喪失嘅唔係個女，而係阿媽嘅自由、光陰同人生。套戲講中好多母親無法說出口嘅真實心聲。

Olivia Colman同Jessie Buckley分別扮演唔同年代嘅Leda，前者不嬲神級演技無可挑剔，後者居然有驚喜，尤其處理年輕媽媽對住女兒嗰種束手無策，同喺家庭、現實作出抉擇，嗰種複雜情感演繹得淋漓盡致。霸戲哥認為今屆奧斯卡最佳女配角非佢莫屬。

《The Lost Daughter》喺Netflix有得睇。

霸戲哥

** 博客文章文責自負,不代表本公司立場 **

香港人真係好鍾意排隊。

繼必理痛同蓮花清瘟膠囊之後，最新任務係排隊買錶。話說OMEGA同Swatch首度合作推出史上第一隻生物陶瓷錶「Moonwatch」（戴咗係咪識moonwalk）今日開賣，喺旺角朗豪坊外，就有市民冒雨通宵排隊，當中尤以南亞裔人士為主。睇嚟大家為咗隻錶，都唔怕食599G。

不過，霸戲哥今日聽到最多嘅並唔係隻Moonwatch有幾好，定喺carousell度有炒價，而係開售安排極之混亂。聽聞有人排排吓隊但舖頭突然取消開賣，但轉個頭又派番籌，彈出彈入好難捉摸。

呢件事又令我諗起星爺套《破壞之王》，星爺為咗媾鍾麗媞，通宵排隊買學友演唱會飛，飛就買唔到，但學友私人醒佢兩張，真係只要有恆心，鐵柱都磨成針。《破壞之王》攝於1994年，黃牛就當然有啦，但就未有南亞幫噃。

查實早兩日豬視妹都同霸戲哥講，話隻粉紅色Moonwatch好靚，已經落定柯打要我買，但要我晨早排隊就咪搞嘞。同埋，有朋友八到，嚟緊好快就有大貨，根本唔使食炒價。

早買早享受唔一定啱嘅。