博客文章
香港人真係好鍾意排隊。
繼必理痛同蓮花清瘟膠囊之後，最新任務係排隊買錶。話說OMEGA同Swatch首度合作推出史上第一隻生物陶瓷錶「Moonwatch」（戴咗係咪識moonwalk）今日開賣，喺旺角朗豪坊外，就有市民冒雨通宵排隊，當中尤以南亞裔人士為主。睇嚟大家為咗隻錶，都唔怕食599G。
不過，霸戲哥今日聽到最多嘅並唔係隻Moonwatch有幾好，定喺carousell度有炒價，而係開售安排極之混亂。聽聞有人排排吓隊但舖頭突然取消開賣，但轉個頭又派番籌，彈出彈入好難捉摸。
呢件事又令我諗起星爺套《破壞之王》，星爺為咗媾鍾麗媞，通宵排隊買學友演唱會飛，飛就買唔到，但學友私人醒佢兩張，真係只要有恆心，鐵柱都磨成針。《破壞之王》攝於1994年，黃牛就當然有啦，但就未有南亞幫噃。
查實早兩日豬視妹都同霸戲哥講，話隻粉紅色Moonwatch好靚，已經落定柯打要我買，但要我晨早排隊就咪搞嘞。同埋，有朋友八到，嚟緊好快就有大貨，根本唔使食炒價。
早買早享受唔一定啱嘅。
霸戲哥
** 博客文章文責自負,不代表本公司立場 **
先恭喜許冠文先生，成為第四十屆香港電影金像獎終身成就獎得主。
我諗唔使點介紹許冠文對香港電影業有幾大貢獻，由佢1972年開始拍攝《大軍閥》到依家，合共參與超過35套電影，由導演、編劇、演員到監製個個崗位都做過晒。
1981年，許冠文自編自導演演嘅《摩登保鑣》，以1700多萬票房三度衝破香港票房紀錄，更奪得第一屆香港電影金像獎影帝。適逢今屆係第四十屆，頒終身成就獎畀佢可謂別具意義。
許冠文嘅一輪嘴機關槍說話方式別樹一格，連環堆砌嘅笑料打破舊有喜劇固定模式，配上地道市井嘅對白，對推廣粵語文化功不可沒。許冠文出品嘅電影亦唔係只得啖笑，往往反映當時社會面貌同時弊，譬如《半斤八両》講打公仔畀老闆剝削、《賣身契》就揭示電視台嘅無情。齣齣睇完都發人深省，亦影響呢一代人嘅價值觀。
霸戲哥有幸訪問過許冠文先生，當時佢幫電影《一路順風》做宣傳。佢除咗喺鏡頭前展示睿智同自信，亦喺鏡頭後示範謙恭同個人修養——就係對訪問佢嘅人予以尊重。我敢講，許冠文先生係我接觸過咁多明星之中，最humble嘅一個。
許冠文係真正嘅喜劇之王，沒有之一。
