博客文章
霸戲哥早排寫John Woo先提起《賭俠大戰拉斯維加斯》，點知畀我開口中，TVB翡翠台今晚8點半將會重播，到時又可以跟萬梓良一齊嗌「吹What！」，不過唔知spring pocket嗰part有冇被cut走呢？
疫情搞到香港人愁眉苦臉，所以TVB早排開始推出《周末笑一笑》系列，重播喜劇電影，上個禮拜播出劉鎮偉套《猛鬼差館》，結果意外錄得15.6點收視，於是食住條水，加碼推出更多喜劇，排住隊嘅有《賭俠大戰拉斯維加斯》、星爺嘅《月光寶盒》同《仙履奇緣》、黃子華嘅《亞李、爸爸兩個大盗》、《我愛HK開心萬歲》、《慳錢家族》同埋《92黑玫瑰對黑玫瑰》。
問豬視妹最想重播邊套笑片，佢係朝偉fans，答嚟答去都係《中環英雄》、《沙灘仔與周師奶》，冇嚟新意。霸戲哥就最想TVB重播張家輝「化骨龍」時代嘅戲，好似《娛樂之王》、《黑馬王子》、《流氓師表》是但一套，諗起都笑餐懵。
今晚睇住《賭俠大戰拉斯維加斯》先。「誓要去～入刀山～」
霸戲哥
** 博客文章文責自負,不代表本公司立場 **
先恭喜許冠文先生，成為第四十屆香港電影金像獎終身成就獎得主。
我諗唔使點介紹許冠文對香港電影業有幾大貢獻，由佢1972年開始拍攝《大軍閥》到依家，合共參與超過35套電影，由導演、編劇、演員到監製個個崗位都做過晒。
1981年，許冠文自編自導演演嘅《摩登保鑣》，以1700多萬票房三度衝破香港票房紀錄，更奪得第一屆香港電影金像獎影帝。適逢今屆係第四十屆，頒終身成就獎畀佢可謂別具意義。
許冠文嘅一輪嘴機關槍說話方式別樹一格，連環堆砌嘅笑料打破舊有喜劇固定模式，配上地道市井嘅對白，對推廣粵語文化功不可沒。許冠文出品嘅電影亦唔係只得啖笑，往往反映當時社會面貌同時弊，譬如《半斤八両》講打公仔畀老闆剝削、《賣身契》就揭示電視台嘅無情。齣齣睇完都發人深省，亦影響呢一代人嘅價值觀。
霸戲哥有幸訪問過許冠文先生，當時佢幫電影《一路順風》做宣傳。佢除咗喺鏡頭前展示睿智同自信，亦喺鏡頭後示範謙恭同個人修養——就係對訪問佢嘅人予以尊重。我敢講，許冠文先生係我接觸過咁多明星之中，最humble嘅一個。
許冠文係真正嘅喜劇之王，沒有之一。
