Facebook 出190億美金收購WhatsApp, 香港人除了覺得WhatsApp的38歲老闆庫姆發咗大達，悔限自己當年無讀電腦之外，還關心自己用開的WhatsApp會唔會加廣告阻頭阻勢。
庫姆本來是雅虎的工程師，2009年離開雅虎，他討厭在雅虎的工作要不斷要搵新方法收集客戶資料去賣。庫姆離開雅虎後，集中精神去做一個簡單的易用的通訊工具。庫姆2012年在一個網誌講過，「無人一朝起身就好期望睇到乜嘢廣告，無人上床前會諗吓明天佢地會睇到乜嘢廣告。」所以庫姆的書枱上有一張手寫便條，上書「無廣告!無遊戲!無花招!」(No Ads! No Games! No Gimmicks!)
你也可以想像WhatsApp這家有4.5億用家的公司的功能極其簡單，只有50幾個員工，根本無收廣告的機制。如今Facebook收購WhatsApp後，Facebook主席朱克伯格話無意在WhatsApp落廣告，WhatsApp將來可以由現時4.5億客戶，增長到20、30億，單是收費已足夠。WhatsApp老闆庫姆更加話佢地可以有50億客戶(全球都係得70億人咋喎，會唔會吹得太大呢?)
WhatsApp初時不收費，後來開始對新客收費，第一年免費，以後每年收0.99美元，萬一(只是萬一)WhatsApp真係有30億個客，所有25億新客都要俾0.99美元年費，咁WhatsApp就會多24.8億美元年收入，真係好正，問題係會唔會有咁多客戶增長啫。
在通訊媒介領域，從來都是勝者全勝的世界，目前即時通訊軟件以三巨頭WhatsApp、中國的微信WeChat和日韓合作的Line主導。排第二的WeChat主要在內地稱王，在外國遠未如WhatsApp，所以Facebook落重注在WhatsApp實在有道理，除了消滅了WhatsApp作為一個潛在競爭對手之外，還借WhatsApp在手機端的強勢，加速Facebook在手機平台的壟斷性。
香港用戶不用擔心WhatsApp賣廣告，我看機會極微，除了WhatsApp老細庫姆的堅持外，若WhatsApp一賣廣告，WeChat和Line不賣，WhatsApp的客戶一定會急促流失，相信Facebook的朱克伯格都唔會咁蠢去趕客。
盧永雄
港鐵禍不單行，十日內出現兩單事故。今個月9日，大學站一個架空電纜絕緣體損毀，列車服務停了四小時，粉嶺站的絕緣體昨日(18日)亦出現故障，連架空電纜都斷埋，東鐵綫服務受影響3小時。咁短時間爆兩鑊，搞到搭東鐵的市民大有意見，頻呼有無搞錯。
而家一出事就有人朝向國貨方向去想，以為港鐵用平價國貨搞出事。但想當然未必啱，外國廠的貨也未必正，其實睇你好唔好彩。例如港鐵今次粉嶺站出事的絕緣體，呢一批都係歐洲大廠提供的貨。港鐵高層話絕緣體一般只有20多年壽命，東鐵由80年代中陸續開始運作，到現在已經係時候要更換。港鐵於2011年已經全線更換了新的絕緣體。
據聞絕緣體測試時要整爛晒不能再用，所以不能每件都試，只能抽樣測試。但港鐵都夠晒「黑仔」，呢啲絕緣體抽樣測試時無事，全部過晒關，但裝上去之後卻出事，反而舊嘢仲無事。港鐵發言人指最近兩次出事的絕緣體都係同一批次，相信係該批次的質量出了問題。睇嚟港鐵若想徹底解決問題，可能要從新更換同一批次的絕緣體，避免事故重覆發生。
港鐵行政總裁韋達誠及車務總監金澤培話會聘請外地獨立專家，檢討架空電纜維修及採購程序，確保不會出現長遠問題。問題是否如金先生講的那樣容易解決？港鐵壞車的原因是綜合性的，今次的事故是鐵路系統開始老化衍生出來的問題，鐵路老化壞車係外國最常見的問題，外國鐵路使用量不足，鐵路公司一般都蝕錢，所以無錢更新甚至維修，鐵路系統特別容易老化。港鐵的問題是另一種，雖然賺大錢，系統能夠及時更新，但乘客太多，近年新市增鎮人口不斷膨脹，內地遊客人數不斷上升，負荷量有增無減，班次加到加唔到，對鐵路壓力好大。
另一個造成事故頻頻的是港鐵的「外判制度」，為了減低勞工福利支出，港鐵將部份維修保養的工序外判。外判公司維修出現問題，港鐵唔滿意外判公司的服務水平，由於有合約時間規限，唔可以隨時終止合約，始終不如自己做那樣可以更有效維持服務質素，所以外判雖可省錢，副作用也大。
港鐵的「病」唔易醫，難保事故陸續出現，要面對愈來愈大的公眾壓力。
盧永雄
(後記：港鐵在周四出聲明，指批絕緣體的生產商係英國公司，在內地製造，會同生產商跟進。)
