浸大爭取九龍塘前李惠利校舍地皮，興建中醫藥學院，事件峰迴路轉，發展局將該地皮剔出最新賣地計劃，建議恢復為「政府、機構或社區」（GIC）用地。消息一度令人以為政府終於向浸大讓步，點知買大開細，教育局最後揭盅話考慮將該地發展特殊學校，浸大中空寶之餘，睇而家個局，搶地難度大增，今次浸大校長陳新滋俾教育局長「吳得掂」食住啦。
政府原本想將該地皮拍賣，但浸大由校長陳新滋，帶領全校力量去搶地，要起中醫藥學院，陳新滋更揚言攞唔到地佢辭職咁話。政府被夾之餘，更蒙上「寧起豪宅，不支持大專教育」的惡名，跌落道德低地。
政府如今變招，決定唔賣地皮，唔賺錢，將地皮改成「政府、機構或社區」用地，但也不撥給浸大，用來興建特殊學校。賣地起豪宅，被人話漠視專上教育，今次起特殊學校，仲唔企番上道德高地？政府出到這招，好有玩嘢味道之餘，態度也頗強硬。
吳得掂企得咁硬，宏觀啲講，當然因為政府唔想人人向政府「話要乜就要乜」，此例一開，政府真係唔掂，因為間間機構、個個人都有自己利益，一句辭職就要俾，又真係唔知俾得幾多。微觀去講，教育局亦未係咁充份支持浸大搞中醫院的大計。
吳得掂在電台節目中透露，當局於2011年11月才收到浸大有意於尖沙咀街坊福利會興建中醫院的整體建議書，而浸會有意用前李惠利地皮發展具教學用途中醫院的建議書，是在上月18日才收到。他強調，私人自資中醫院如要政府批地，有既定程序，政府已將前李惠利的北面用地撥給浸大興建宿位和行政大樓，故南面地皮需交回政府作中央統籌。吳得掂等如話浸大「唔跟程序，話要就要」而且係搞「私人自資中醫院」，不單止搞教育。
浸大爭地事件，使筆者想起一些往事。前浸會書院校長謝志偉，在80年代同政府關係非常良好。政府當時推行大學四年制改三年制，中大反對，浸大本來是四年制，謝志偉卻一力支持改制，政府最後成功改制，亦記謝志偉一功，向浸會書院大力放水，並讓它成功升格成大學。大學校長與政府的關係，千絲萬縷，睇陳新滋用辭職方式同政府搶地，不禁讓人有「咁都得?」的疑問。
Ariel
** 博客文章文責自負,不代表本公司立場 **
一隻油老虎(前政治局常委周永康)，搞到內地官場震晒，佢身邊四大秘書又好，幾大愛將又好，全部墮馬，個個受查。喺中央高層身邊工作人員會唔會冇晒士氣呢? 因為跟邊個老細冇得揀，老細叫你辦事，在官場上又點可以推，但佢死時你又一定死，咁點算呢?
油老虎身邊一個小角色就有啲啟示，話說油老虎身邊人被一網打盡，自從佢在去年12月被調查後，貼身工作人員都被帶走，前陣有個小警衛就冇事出返來，令人嘖嘖稱奇。官場分析認為，小警衛平日小心謹慎，老細交代的事，盡心盡力完成，萬一老細叫你去攞貪汚款，千祈唔好自己袋一分錢，佢亦都係咁，過水無濕腳。海中人(即係中南海裡的人)估計，可能係咁，小警衛可以安然放番出來，兼且復職。亦可能係咁，聞說高層身邊工作人員們放心咗少少，同時亦令佢哋修心養性咗好多添。
習大大打老虎冇手軟，領導幹部日子冇以前日子咁好過，但Ariel去京城走一轉，出奇地中層公務員十個有九個叫好，好多人話今年以來肚皮舒服咗好，唔使去應酬，又唔使俾人屈飲酒，以前想推飯局，好驚得罪上司，依家可以振振有詞咁話：我不去了！
講番油老虎案件，都應該到人大政協兩會後才有明朗啲的公布，有個京城笑語話，呢屆啲領導們大力打老虎，因為「沒有兒子坑爹」，現屆高層又真係大多數家中都係生女，「坑爹」係內地近年流行的網絡熱門詞，可以解作呃人等壞事做盡，害埋老豆。
咁又係，油老虎個子周濱，愈揭愈多醜聞，偷呃拐騙，甚至可以話明搶國企資本，話說除了中石油經佢買鑽油器材賺到笑，有啲外國油井項目，中石油同對方傾到七七八八，本來五十億可以買到，但就唔同人哋簽，話要經中間人，呢個中間人其實係周濱，結果上報到中央個項目就變咗一百億，有啲仲離譜到根本冇真實項目，話去探油就照簽。呢個兒子打著老爸喺中石油的影響力，都去到好盡。難怪唔少官場中人都話，無論其身幾正，管唔住子女都幾弊，當然其身唔正，個仔仲衰，咁就更難解救了。
