一隻油老虎(前政治局常委周永康)，搞到內地官場震晒，佢身邊四大秘書又好，幾大愛將又好，全部墮馬，個個受查。喺中央高層身邊工作人員會唔會冇晒士氣呢? 因為跟邊個老細冇得揀，老細叫你辦事，在官場上又點可以推，但佢死時你又一定死，咁點算呢?
油老虎身邊一個小角色就有啲啟示，話說油老虎身邊人被一網打盡，自從佢在去年12月被調查後，貼身工作人員都被帶走，前陣有個小警衛就冇事出返來，令人嘖嘖稱奇。官場分析認為，小警衛平日小心謹慎，老細交代的事，盡心盡力完成，萬一老細叫你去攞貪汚款，千祈唔好自己袋一分錢，佢亦都係咁，過水無濕腳。海中人(即係中南海裡的人)估計，可能係咁，小警衛可以安然放番出來，兼且復職。亦可能係咁，聞說高層身邊工作人員們放心咗少少，同時亦令佢哋修心養性咗好多添。
習大大打老虎冇手軟，領導幹部日子冇以前日子咁好過，但Ariel去京城走一轉，出奇地中層公務員十個有九個叫好，好多人話今年以來肚皮舒服咗好，唔使去應酬，又唔使俾人屈飲酒，以前想推飯局，好驚得罪上司，依家可以振振有詞咁話：我不去了！
講番油老虎案件，都應該到人大政協兩會後才有明朗啲的公布，有個京城笑語話，呢屆啲領導們大力打老虎，因為「沒有兒子坑爹」，現屆高層又真係大多數家中都係生女，「坑爹」係內地近年流行的網絡熱門詞，可以解作呃人等壞事做盡，害埋老豆。
咁又係，油老虎個子周濱，愈揭愈多醜聞，偷呃拐騙，甚至可以話明搶國企資本，話說除了中石油經佢買鑽油器材賺到笑，有啲外國油井項目，中石油同對方傾到七七八八，本來五十億可以買到，但就唔同人哋簽，話要經中間人，呢個中間人其實係周濱，結果上報到中央個項目就變咗一百億，有啲仲離譜到根本冇真實項目，話去探油就照簽。呢個兒子打著老爸喺中石油的影響力，都去到好盡。難怪唔少官場中人都話，無論其身幾正，管唔住子女都幾弊，當然其身唔正，個仔仲衰，咁就更難解救了。
Ariel
** 博客文章文責自負,不代表本公司立場 **
呢排開人大政協兩會，港區的尊貴代表都感受氣氛有變，好多以前阿爺講過話要執正嚟做的事，突然好認真落實，唔再好似以往咁得個講字。
睇吓點打油老虎(周永康)就知，北大人依家好多嘢唔係講笑，隨著案情陸續曝光，佢成個家族已經起晒底，睇怕兩會一開完就嚟料喇。油老虎係前年從政治局常委退落嚟，呢一次打老虎，令所謂「刑不上常委」的神話破滅，京城傳來可能有更多大案，仲講到有四大案分別涉及四個前政治局常委，正在搞緊。
但呢幾個名太震憾，都係唔講好過講啦，總之四個前常委都係有頭有面那一種，唔係講咗你都記唔得那一隻。其中一個仲同香港富豪圈好有聯系，若然同佢家人夾份做緊生意，都要部署吓退路啦。
講真，呢次如果真係打破「刑不上常委」的慣例，殺完周永康後再對其他前常委開刀，對京城政壇的震撼力就好大。
中共十八大後，搞咗一系列學習，本來唔少黨員幹部開始都以為走過場，學習呢家嘢，在內地官場三、五年就搞一搞，之後日子照樣過，油水繼續抽。但有官員就透露，睇咗幾篇習大大的內部講話，好似俾人用針刺落個心咁，點都震一震。聞說，講話中冇咩八股之外，對官場之間各種各類的欺上暪下方式，全部數晒出來，睇嚟習大大對由基層到地方實在好了解。
聞說多番學習大大吹的節約風後，各大部委，開會的形式都轉晒，可以電話會議就電話會議解決，要碰面開會，地點都先揀在部門內部，真係地方唔夠大，要訂外邊酒店時，講明咩佈置都唔要，聞說有啲部委直頭連茶水都自備，齋訂個場就算。啲酒店會所就慘情囉，以前訂個場收你少少錢，就係鮮花佈置、食物餐飲就狂搵一筆，依家租得個吉房，你話食到幾多呀。
所以話，只要喺京城走一走，你就覺，四大案有冇都好，敲山震虎，呢招都唔係得個講字架。
