港視流動電視牌照風波再起，維基在昨日記者會大呻政府搬龍門，搞到佢哋唔可以如期開台，仲攞住一個接收器，話係上一手做流動電視的中移動，都係用呢個接收器，俾客戶駁去電視機睇節目啦。
維基在記者會上一表演，馬上有電視業人士提出，過去一直有留意中移動搞流動電視，從無聽過佢搞過接收器入屋，質疑維基在記者會上展示的所謂「中移動接收器」，只係「鴨寮街貨色」。
我地就維基哥係唔係攞住「鴨寮街貨色」話係中移動接收器呢個問題，向港視求證，港視發言人話以前喺香港中移動的官方網頁，有列出適用的電視型號。我地叫佢俾部接收器我地睇睇，睇吓有無中移動Logo。港視發言人承認個接收器上沒有中移動的Logo，但就堅持話的而且確係從中移動度得來，可以駁入電視機中。
有接近中移動的消息就指，中移動話冇研發過呢種接收器，佢哋冇賣。但就知道在內地有得賣，主要裝喺啲旅遊巴上，可以接受到流動電視的訊號，但質素有幾好，坐過長途車的朋友都知道，估計鴨寮街應該有得買。
今次真係羅生門喇，不過，羅生門仲未完，維基就話港視從無話過提供入屋電視服務，但有網民就話喺香港電視的官方Facebook專頁，早在去年12月20日上載了題為「如何收看HKTV香港電視的方法」合共十一張相片。
圖片來源：香港電視Facebook專頁圖片
其中一張相片仲話香港電視可支援的裝置包括手提電視、智能電視、流動電話、個人電腦、手提電腦、平板電腦和智能電話。有圖文並茂（下圖紅框示）講解如何將接收器接駁電視，再透過流動電視無線電頻譜接收港視的直播頻道煲劇同其他節目。
圖片來源：香港電視Facebook專頁圖片
港視發言人回應指，圖中所示並非直接用大廈公共天線入屋，與免費電視不同。發言人補充問政府，若果使用政府話可以用的歐洲DVB制式，日後電視機加了接收器，收到香港電視的訊號，港視是否又要更換制式或再申請牌照？發言人說，根本的問題是大廈公共天線過濾器的管制，如果做好了，港視用甚麽制式，住戶也不能透過公共天線接收得到。
睇完回應有啲一頭霧水，咁即係維基想唔想港視入屋呢? 有業內人士就提，其實所謂DVB係內有文章，DVB分幾類，通訊局建議港視用的係DVB-H，即係DVB制式中，專門俾流動電視用，DVB仲有DVB-T、DVB-C、DVB-S三個類別，多咗三個英文字母喺尾大不相同，分別俾免費電視、有線電視同衛星電視用的制式，所以通訊局應該唔會籠統白紙黑字話港視可以用 DVB制式喇。
Ariel
** 博客文章文責自負,不代表本公司立場 **
網股熱炒，網股公司賣盤或出售部份股權的消息不絕，之前Facebook用190億美元(1470億港元)收購Whatsapp，早兩日又傳出騰訊用16.7億港元加注入電商業務、入股內地購物網站京東商城15%股權，計起上嚟京東成間公司估值275億港元。此前已經有好多人慨嘆，環球及大陸網股至有價，香港網站就賣唔起價。
唔係唔係，香港科網公司都有價。就係上星期，內地網站雲遊咪用5.4億元入股開發《神魔之塔》網上遊戲的本地公司Magic Feature的21%股權，雖然啲錢係注入公司之內，唔係兩個股東曾建中及曾建豪袋走，但雲遊用呢個價錢入股，即係成間公司作價25.8億，咁仲持有79%股權的曾氏兄弟，只計手持股份已值20.5億啦。雖然佢地俾人話抄外地遊戲「抄出個未來」，又有人話唔知雲遊入股《神魔之塔》做乜，但呢個係炒作世界，乜都要快，雲遊夥拍《神魔之塔》擴展去大陸以外的市場，既賺咗時間，又可以炒吓股，雲遊亦有雲遊條數架。
Ariel的科技界老友爆料，原來搵工網站JobsDB.com年幾前都賣咗盤，傳聞仲賣到32億的好價。追查一吓JobsDB的開發商JDB Holdings的動向，原來由2010年至2012年底，已經分三次全部將JobsDB賣咗俾一家在澳洲網上招聘公司Seek，牌面計三次交易價加埋係28億港元，但可能有些匯價差異，走出32億呢個數。
雖然JobsDB聲稱在亞洲有生意，但主要仍係在香港做，咁就賣咗32億，在香港做網的朋友真係要努力呀。JobsDB原來的老細亦係搞搵食網站《開飯啦》的公司，Ariel都係做網，好阿Q咁講，做網好似有前途喎。
