小香港死咗大半

特首 CY在南沙籌建「小香港」的構想曝光，特區政府昨日上下午的回應口徑不一，惹起關注。Ariel八過之後，發覺內中有文章。

《蘋果》昨日爆出政府去年11月一份文件講到小香港構想後，政府在上午11時55分透過新聞處回應，指不會在南沙或橫琴實施香港法律，亦沒有租借南沙或橫琴的構思。特首梁振英其後在中午出席活動時，更直指報道「與事實不符」。但政府下午的取態有變，新聞處在5時許又再出稿，承認特區政府曾在內部提供資料文件作討論之用，但表示經研究後認為大部份構思並不可行，包括在當地租借土地及實施香港法律。

前一份稿予人的感覺是否認有其事，後一份稿的感覺是曾討論其事但已否決。兩份稿側重點有別。Ariel 八完之後發覺係咁，政府出第一份稿時有少少「興」，覺得《蘋果》爆料是想搞瓜件事，所以專挑報道中錯誤的地方來否認，多少有點「你講錯」的心態。但第一份回應其實都無否認整個意念是存在的，只是在技術層面上否認。

過了6小時後，消息曝光的損害已很清楚，都計到數了，「小香港」概念都搞到死死地了，再出稿承認有此概念，不過「經研究後認為大部份構思並不可行」，這亦等如順水推舟，你想搞死佢，就當佢死咗好了，首先免了將來政府俾人話隱暪事實。

客觀點講，小香港概念未成熟就曝光，令好多在內地遊說的工作變得不可行，已經死咗大半，但又唔好以為一定死晒，我估話佢仲有「一線」咁多希望，都未為過啩。

Ariel

** 博客文章文責自負,不代表本公司立場 **

Ariel同一個官府中人食飯，佢見到維基日日開記招，嘢嘢打通訊局，有點沒好氣地問Ariel，「你知唔知王維基想做乜?」我答佢:「做電視囉!」官府人話從未見過有人想做電視的人咁樣日日鬧管電視業的公務員。

官府中人話最近睇番《倚天屠龍記》，諗起一個情節同而家有少少似，金毛獅王謝遜要追殺成崑，搵唔到成崑，就死要同少林方丈空見大師對打，金毛獅王用七傷拳一拳拳咁打落去，最後打死了不肯還手的空見大師。而七傷拳呢種功夫，打人好傷，但自己都內傷。

佢話表面睇維基好似好古惑，唔係幾似謝遜，但維基而家真係好似打緊七傷拳，佢日日開記者會出招，傷人之餘，自己亦重傷。維基攞住啲錢將來無論要搞電視抑或搞電訊，都要受通訊局規管，維基咁樣日日單挑通訊局的公務員，將來要面對佢地規管時，真係唔知點算。聞說通訊局而家已經唔接維基電話，港視有乜嘢就寫信入嚟啦，通訊局會搵律師回答。

官場中人話，維基應該搵成崑，唔係日日叫少林方丈同佢隻揪。當然，通訊局官員唔係好似空見大師咁好相與，任維基打，反而係招招還拖，拳來腳往，一招都唔輸。日日打大交，睇到成崑掩住半邊咀笑。

我唔知呢個官話邊個係成崑。但係維基咁日日打交，打到大家都get lost就係事實，佢有咁技術得咁技術，大家唔知佢想講乜，或者佢咁做係為乜? 慢慢唔知佢仲係唔係想搞電視。

好似今日記招尾聲，有記者問維基有乜可行方案? 維基話「無乜可行方案，當局行使酌情權，讓港視可以「入屋」。」通訊局都講到明唔俾佢入屋啦，維基答咗等如無答。佢想做乜，仍是一個謎。事件發展到今天，就算特首CY 向通訊局下一個死命令叫佢地俾王維基的港視入屋以平息爭拗，我估官員啋CY都傻。