陳健安推新專輯「PROJECT：REJECT」 學習拒絕不再取悅世界

陳健安今日（12月12日）推出第四張個人專輯「PROJECT：REJECT」，以「拒絕」為主題。

陳健安（安仔）坦言作為藝人和家中孻仔，自小習慣跟著前人步伐，不懂得說「不」，漸漸失去自我，近年學習誠實地面對自己的喜惡，跟別人坦白感受。而唱片包裝設計亦非常有心思，用撕開方式打開才可取得CD，寓意打破既有框框。

陳健安推出第四張個人專輯「PROJECT：REJECT」。

「今次嘅課題係點樣面對『唔啱聽』或者『反對』嘅聲音，學習拒絕。以前我都係嗰種唔容易開口say NO嘅人，慢慢唔知道自己嘅喜惡，直至近年，工作或做人開始識得去選擇，亦學識話俾身邊嘅人知道，我其實唔喜歡乜嘢。對自己又好，對身邊人又好，都係好重要嘅坦白，係成長嘅階段。」安仔坦言以前很想取悅世界，尤其是他是家中孻仔，很多事情都要跟著哥哥或家姐的選擇去生活，直至近年他自己做音樂和生活，跟別人合作得多，體會坦白的好處。

安仔坦言以前很想取悅世界。

安仔說：「要多謝容祖兒，因為之前喺網上睇到一條片，佢講咗一句『唔可以』啟發咗我，要好多勇氣，呢件事埋咗喺我心內面。我覺得做藝人唔容易say NO，好似所有事都『好，無問題』、『我做到嘅』，但事實上唔係，慢慢會無咗自己。於是我從《唔明你講乜》開始，決定全張專輯嘅主題：如何好好地say No？如何坦白地做自己？」

安仔透露是容祖兒一句「唔可以」啟發了他。

造型師Herman與安仔再度合作，他將歌曲的精髓加入服飾，有鴛鴦鞋、藥水膠布手袖和貼滿封箱膠紙的褲等。安仔說：「好多部份都係Herman創作和人手造，獨一無二。我著晒六首歌上身，《唔明你講乜》、《戀愛腦之死》、《我很不愛你》、《心裡尚有象牙白》、《當我們返回現世》和《我違和但我不糾正》，我唔會講邊度代表邊首歌，大家感受吓啦！」

安仔與造型師Herman再度合作。

將歌曲的精髓加入服飾。

此外，安仔還邀請了插畫師Pen So參與，將六首歌曲的元素透過插畫滲透於專輯內，安仔說：「剛才聽Pen So講解，佢用心嘅程度實在令我太驚喜。」創作總監Oscar與安仔合作無間，安仔揚言：「Oscar對我say No多啲，有時我對一首歌有好多唔同嘅諗法，佢會幫我篩選，No呢個No嗰個，剩低最適合嘅。而我從來都無改過佢嘅歌詞，佢好明白我嘅諗法，合作愉快！」

安仔還邀請了插畫師Pen So參與。

將六首歌曲的元素透過插畫滲透於專輯內。

陳健安的歌迷會「本原族」與樂隊Nowhere Boys的歌迷會「Nowhere Boys & Girls」，日前在大埔的燒烤場舉行「2026圍爐BBQ暨Fans Gathering」，這是第二次聯合party，他們與本地及世界各地過百Fans玩遊戲、抽獎和燒雞翼比賽。去年Nowhere Boys主音Van全程煮私房菜給Fans，今年放下鑊鏟，專心享受被Fans餵食。當眾人專心BBQ時，安仔突然驚喜宣布《流星劃過富士山》演唱會版MV 在YouTube首播，全場尖叫並一同倒數，欣賞自己與安仔在片中大銀幕出現的美好回憶。安仔更即興伴唱走勻全場握手，連場外客人亦變成Fans，一起揮手吶喊，彷彿「穿越」年初演唱會現場，非常熱鬧。

陳健安的歌迷會「本原族」與Nowhere Boys的歌迷會「Nowhere Boys & Girls」，日前在大埔燒烤場舉行第二次聯合BBQ派對，過百粉絲參與。

眾人玩遊戲、抽獎、燒雞翼比賽，氣氛熱鬧。

安仔說：「今日真係好開心，見到有啲Fans第一次嚟，同唔相識嘅圍埋一爐，眼神尷尷尬尬。」他喜見Fans之間建立友誼，相約食飯、唱K、搞應援。其中有一枱Fans因為安仔新歌《梨子》製作梨子頭飾，安仔亦玩埋一份。他說：「好開心因為我哋嘅音樂，令佢哋連埋一齊。」Van說：「因為佢哋鍾意我哋嘅音樂，都係同一個energy 。上年聚會我掛住專心煮嘢畀大家食，同Fans之間隔住幾個煲，無機會傾偈。今年我決定打破隔膜，唔煮嘢食，逐張枱坐埋去同Fans傾偈、一齊BBQ，感覺好溫暖，好開心！最神奇係作為樂隊，Fans通常嚟睇我哋開騷唱歌，但今日冇表演只有BBQ，佢哋都肯嚟一齊玩，我哋關係已經變成朋友！」

安仔突然驚喜宣布《流星劃過富士山》演唱會版MV在YouTube首播，全場倒數尖叫。

他更即興伴唱走勻全場握手，連場外客人也變成粉絲，彷彿重現年初演唱會現場。

安仔悉心安排這晚在YouTube 首播演唱會版《流星劃過富士山》，因為片中的演唱會舞台上大銀幕，播放大量他和fans的合照，與BBQ現場氣氛互相呼應。他說：「呢首歌係我翻唱少爺占隊band『YEAHS』嘅作品，係講人與人之間嘅緣份，好難先至會遇上，好似我同你哋或者同歌迷之間，經歷過好多嘢至會遇到。咁啱今日BBQ現場音響又播到，支咪又幾好聲，我喺上面疊住唱，突然變咗演唱會咁，氣氛非常好。」Van表示希望舉辦郊野音樂會，與Fans一齊露營，由夜晚玩到天光。

Nowhere Boys主音Van今年放下鑊鏟，逐枱與粉絲傾偈BBQ，感覺溫暖。

安仔感動表示：「好開心因為我哋嘅音樂，令佢哋連埋一齊。」

鼓手Nate今年第一次參與BBQ聚會，被發現捧住一大疊格仔餅密密燒，原來他誤食fans的格仔餅，所以親手燒去氹fans作為補償，果然寵粉。而低音結他手Hansun自爆鍾情「獨食」，說：「平時我真係好鍾意一個人打邊爐同埋燒肉，如果見到我一個人出沒呢啲餐廳，唔需要驚訝！不過今日咁多人一齊BBQ好開心、好溫暖，我個心都融化咗，人係要有啲群體活動。」琴鍵手漁佬笑言：「夾咗咁多年band，我都係啱啱先知Hansun鍾意一個人打邊爐。」至於結他手Ken是素食者，Fans擔心他不夠飽，不停為他煮各色各樣蔬菜，令他感到好幸福。