陳健安全新專輯《時間感【遲】》用水講timing 球場噴水柱絕技大派用場

唱作歌手陳健安第5張個人專輯《時間感【遲】》今日（12月19日）推出，他千叮萬囑Fans必須由第一首歌，跟住他精心設計的music flow去聽全碟六首作品。專輯顧名思義探討「時間」，而封面及碟內相集的靚相就以「水」做主題，以不同形態的流動比喻時間。

陳健安推出第5張個人專輯《時間感【遲】》。

封面及碟內相集的靚相就以「水」做主題。

以不同形態的流動比喻時間。

安仔說：「由年頭推出《不遲不早》就想探討『時間』，乜嘢係『遲』？乜嘢係『早』？我諗每個人經歷唔同嘅事，或者去到人生不同年齡、不同階段，對『時間』嘅感覺都會唔同。每個人都有自己嘅感受，係一個頗大嘅課題，衍生咗我想透過呢張專輯同大家探討。」「時間管理大師」非安仔莫屬，他同一天拍攝唱片封面和明年一月個唱海報，但兩邊需要不同髮色，他索性影完演唱會海報，即場在影樓洗手間染髮，還大曬廣告金句：「立即變黑晒，亦得！」

拍攝花絮

專輯相以「水」為主題，帶出碟內探討「時間」的作品，安仔非常欣賞美術總監Victor為他設計不同場景和道具，他說：「流動嘅水、似真亦假嘅水、真正嘅水，亦有由我身上噴出嚟嘅水，水嘅流動其實同時間嘅感覺呼應，你睇到啲水係流動？還是凝固？就由你自己解讀！」其中一個裝置有幾個放大鏡，鐘擺式在安仔身邊擦肩而過，他說：「放大鏡揈嚟揈去好好玩，啲同事玩得好開心。放塊面埋去面容扭曲，而呢個『扭曲』正正代表時間，每個人對時間嘅感覺都唔同，各人有各人嘅扭曲程度，而放大鏡鐘擺式咁喺我身邊擦過，光與影造出唔同扭曲效果。」

拍攝花絮

拍攝花絮

拍攝花絮

造型師Herman準備了一件特別質料的衣服呼應拍攝主題，安仔說：「呢個料可以隨便揸呀、扭呀，佢個質地會有啲停頓，扭曲過程有好多即興嘅嘢喺拍攝入面。」而攝影師HungMC就準備了一個不規則扭曲的透明頭罩，用鏡頭捕捉水從安仔頭頂流過面部的瞬間。安仔說：「因為淋水落我個頭，控制唔到影出嚟嘅效果，呢啲控制唔到就係拍攝時好玩之處。」

拍攝花絮

拍攝花絮

拍攝花絮

最後一個鏡頭，安仔自薦用口噴水，讓攝影師捕捉水花四濺的形態，結果有驚喜。他笑言：「我細個喺球場玩噴水柱，今日終於大派用場，我覺得自己噴得好出色，仲可以俾攝影師選擇細水長流，定係噴射式『隊穿牆』形態。」

拍攝花絮

拍攝花絮

今次專輯封面設計成「相簿」，封面任由歌迷擺布，安仔說：「設計師Sunny，我哋之前喺《PROJECT REJECT》和《Life afteR Life》兩張專輯都合作過，今次佢將專輯封面設計成相簿，入面嘅物件可以郁動，甚至換相，唔想有我個樣就換自己張相入去。至於點解叫《時間感【遲】》？大家聽歌嘅時候感受吓！要由第一首開始聽到尾，我好重視music flow，花咗好多心思去排。當中有一首作品《夜貓子》無派台，我作曲，係有一晚發夢時突然出現呢個旋律而作咗呢首歌，邀請到Jason蔡德才編曲和監製。」

拍攝花絮

拍攝花絮

拍攝花絮

安仔感謝歌迷多年支持他每個音樂企劃，接著他繼續密鑼緊鼓為3個星期後，1月10和11日在西九文化區竹翠公園，舉行首次個人戶外演唱會「陳健安時的狀態演唱會2026」練歌綵排，到時見。

陳健安

陳健安的歌迷會「本原族」與樂隊Nowhere Boys的歌迷會「Nowhere Boys & Girls」，日前在大埔的燒烤場舉行「2026圍爐BBQ暨Fans Gathering」，這是第二次聯合party，他們與本地及世界各地過百Fans玩遊戲、抽獎和燒雞翼比賽。去年Nowhere Boys主音Van全程煮私房菜給Fans，今年放下鑊鏟，專心享受被Fans餵食。當眾人專心BBQ時，安仔突然驚喜宣布《流星劃過富士山》演唱會版MV 在YouTube首播，全場尖叫並一同倒數，欣賞自己與安仔在片中大銀幕出現的美好回憶。安仔更即興伴唱走勻全場握手，連場外客人亦變成Fans，一起揮手吶喊，彷彿「穿越」年初演唱會現場，非常熱鬧。

陳健安的歌迷會「本原族」與Nowhere Boys的歌迷會「Nowhere Boys & Girls」，日前在大埔燒烤場舉行第二次聯合BBQ派對，過百粉絲參與。

眾人玩遊戲、抽獎、燒雞翼比賽，氣氛熱鬧。

安仔說：「今日真係好開心，見到有啲Fans第一次嚟，同唔相識嘅圍埋一爐，眼神尷尷尬尬。」他喜見Fans之間建立友誼，相約食飯、唱K、搞應援。其中有一枱Fans因為安仔新歌《梨子》製作梨子頭飾，安仔亦玩埋一份。他說：「好開心因為我哋嘅音樂，令佢哋連埋一齊。」Van說：「因為佢哋鍾意我哋嘅音樂，都係同一個energy 。上年聚會我掛住專心煮嘢畀大家食，同Fans之間隔住幾個煲，無機會傾偈。今年我決定打破隔膜，唔煮嘢食，逐張枱坐埋去同Fans傾偈、一齊BBQ，感覺好溫暖，好開心！最神奇係作為樂隊，Fans通常嚟睇我哋開騷唱歌，但今日冇表演只有BBQ，佢哋都肯嚟一齊玩，我哋關係已經變成朋友！」

安仔突然驚喜宣布《流星劃過富士山》演唱會版MV在YouTube首播，全場倒數尖叫。

他更即興伴唱走勻全場握手，連場外客人也變成粉絲，彷彿重現年初演唱會現場。

安仔悉心安排這晚在YouTube 首播演唱會版《流星劃過富士山》，因為片中的演唱會舞台上大銀幕，播放大量他和fans的合照，與BBQ現場氣氛互相呼應。他說：「呢首歌係我翻唱少爺占隊band『YEAHS』嘅作品，係講人與人之間嘅緣份，好難先至會遇上，好似我同你哋或者同歌迷之間，經歷過好多嘢至會遇到。咁啱今日BBQ現場音響又播到，支咪又幾好聲，我喺上面疊住唱，突然變咗演唱會咁，氣氛非常好。」Van表示希望舉辦郊野音樂會，與Fans一齊露營，由夜晚玩到天光。

Nowhere Boys主音Van今年放下鑊鏟，逐枱與粉絲傾偈BBQ，感覺溫暖。

安仔感動表示：「好開心因為我哋嘅音樂，令佢哋連埋一齊。」

鼓手Nate今年第一次參與BBQ聚會，被發現捧住一大疊格仔餅密密燒，原來他誤食fans的格仔餅，所以親手燒去氹fans作為補償，果然寵粉。而低音結他手Hansun自爆鍾情「獨食」，說：「平時我真係好鍾意一個人打邊爐同埋燒肉，如果見到我一個人出沒呢啲餐廳，唔需要驚訝！不過今日咁多人一齊BBQ好開心、好溫暖，我個心都融化咗，人係要有啲群體活動。」琴鍵手漁佬笑言：「夾咗咁多年band，我都係啱啱先知Hansun鍾意一個人打邊爐。」至於結他手Ken是素食者，Fans擔心他不夠飽，不停為他煮各色各樣蔬菜，令他感到好幸福。