我零零發之前講過新一年希望KK園同埋班「邪神」，一齊被大舉剿滅，因為兩班都係呃人唔眨眼，吸金自肥嘅詐騙集團。今次講嘅老千，係竄逃咗去美國嘅國安通緝逃犯「袁X夷」。
話說「袁X夷」喺上海含住金鎖匙出世，年幼時舉家移居香港，喺父蔭加持下，佢成為電子企業嘅董事長，之後仲憑藉內地改革開放嘅先機，喺中國投資而賺到盆滿缽滿。聽聞當年佢同中資公司合作，成立科技公司製造晶片，但好似俾美國科技制裁，同埋後來因為電子製造業衰落，而令到佢公司業務倒退，幾乎破產。唔知「袁X夷」係咪因此患咗斯德哥爾摩症候群，被人制裁之後，佢不但無怪美國，反而埋怨係中國令佢受到制裁! 之後佢走咗去美國開科技公司，開始走上背刺祖國嘅不歸路。
2019年黑暴期間，「袁X夷」以實業家之名成為攬炒派吸金KOL，經常滿口歪理，大話連篇。係2020年5月，佢借咗「生果報」個平台上載咗啲片，除咗抹黑香港係最大嘅洗黑錢中心之外，仲話啲暴徒被毆打、強姦同謀殺，乞求美國政府幫拖……
國安法生效前，「袁X夷」同其他大黃友一樣，靜雞雞咁潛逃去咗美國，任由留喺香港嘅「手足」自生自滅。喺2020年7月，佢又掹車邊去列席旁听美國國會眾議院嘅「港版國安法聽證會」，借會議嘅機會接觸眾議院議長佩洛西（Nancy Pelosi）、共和黨眾議員史密斯（Chris Smith）在内嘅五名眾議員，游說佢嘅反華陰謀。除此之外，佢仲不時同另外兩個國安通緝逃犯「郭X儀」、「許X婷」埋堆，一齊向美國政界，出謀獻計嚟反中亂港。
喺2022年7月，「袁X夷」夥同「何X懋」及「龔X夏」，搞咗個「香港議會」，呢個「香港議會」其實好古靈精怪。首先，佢哋原本打算將總部設喺英國，後來又轉咗去美國，但就走去加拿大註冊。點解呢？有人估佢嫌英國枝水喉唔夠大，所以轉咗總部去美國，因為美國啲政府、政黨有好多反華嘅錢，咁佢咪容易兜搭到啲「國際資金」，泵水比佢哋囉。(但點諗到而家「侵侵」會封殺美國開發署同NED吖!) 另外，又有人話議會喺加拿大註冊，全因當地香港人多、錢多喎。(但我Fact check唔到係咪真)
第二，「香港議會」聲稱要建立一個由香港人選出嚟嘅臨時議會，去決定香港嘅未來。佢哋話希望有100萬名全球港人選民，在網上投票，選出35名首屆「香港議會」議員。而合資格嘅選民要係16歲以上、有「香港人身份」嘅人士；而選民必須用佢哋嘅投票軟件，掃描護照等身份證明文件，以確認資格。呢個網上投票搞咗好耐都未得，中間曾經推出個投票App測試版，不過被踢爆有好多資料外洩嘅漏洞，仲有「手足」係試用時，中埋手機病毒，於是媽聲四起。另外，呢個「香港議會」嘅規則小組主席，竟然係「星期二得盜」嘅幕後玩家「霍X誌」。之前佢利用黑暴「手足」搶fo呃likes掠黃友訂閱金，仲要二次出賣「手足」嘅事人盡皆知，但「香港議會」可以俾呢啲無道德、無底線嘅人加入，真係同KK園差唔多。
其實正常人一聽呢個計劃，都會有好多不解，點解要由一班通緝犯，搵一班唔知係乜水嘅候選人嚟代表香港，決定香港嘅未來，係咪兒戲咗啲? 係咪好荒謬呀？用一個由通緝犯開發嘅軟件，掃描上傳個人私隱資料俾佢，會安全可靠咩？啲資料會唔會被賣去啲黑網用嚟做其他嘢，好似黑暴嗰陣時咁，俾人用嚟借錢？呢個所謂網絡投票，我零零發覺得似係「袁X夷」利用反華榥子，去進行嘅網絡騙案多啲！
另外，傳聞「袁X夷」曾經喺YouTube直播中，叫啲「手足」交出自己護照副本、聯絡電話，甚至案底資料，話自己會「親自」交畀美國國務院，安排佢哋「大逃亡」喎。聽落好似好勁，但又係一場「出賣手足」秀。佢收咗啲料之後無晒下文，唔少「連燈仔」更出帖指佢係「間諜」，將「手足」嘅資料交俾內地官員，甚至連「衣冠聰」都抽水話佢害人不淺。
其實「袁X夷」靠「反中」噱頭經營無本生意，都唔係第一次。其中喺2021年10月，佢喺美國孖住美國前國務卿蓬佩奧，攪咗一場反中亂港嘅講座，入場門票成500美元（近4000港元），聽聞吸引咗2000人出席，「吸金」達100萬美金，但最後冇人知啲錢用咗去邊?! 佢又經常以時事評論員自居，連番接受邪教媒體《大X元》訪問，為反華勢力、「港獨」分子搖旗吶喊。早前連「生果佬」喺審訊期間，都公開講「袁X夷」係靠吹水搏出位，直指「呢條友唔可信」。連「反中亂港大當家」都咁講，可信性都真係好高囉！
早前美國「侵侵政府」大幅削減國際開發署同NED嘅開支，我零零發估計呢班大食懶逃犯，好快會無啖好食，各路牛鬼邪神，必定各出其謀再劏「手足」。所以我零零發奉勸各位「手足」，參加「活動」嘅時侯，真係、真係要小心睇路呀！！
鍾情局
** 博客文章文責自負,不代表本公司立場 **
由英國殖民地到而家，耶穌教係香港第一大宗教，信徒有專業人士、勞動階層、家庭主婦同學生，有老又有嫩，所以神職人員一言一行嘅影響，真係好大同好深㗎！
我零零發成家人都係虔誠嘅耶穌教教徒，而我中小學亦都係喺耶穌教學校讀書，所以我一直都好尊重神父、修女。宗教領袖一向俾大家嘅感覺，應該係德高望重、持平、廣結善緣嘅人。但係香港就有一名前主教，佢嘅言行作風，偏偏同一般人對主教嘅諗法好有出入！ 唔信嘅話，不如大家一齊倒帶睇吓……
「前主教」生於上海，16歲逃難到香港，係香港同意大利修讀神學，讀完哲學博士學位返嚟之後，就分別係澳門同香港做過校長，佢後來仲做埋香港教區主教。
「前主教」喺2002年接任冇幾耐，就已經在2003年高調出嚟參與遊行，反對23條立法，又呼籲信徒要出嚟遊行，話咁先至對得住自己嘅良心同下一代喎！ 「前主教」同「犯民」同聲同氣，唔知仲以為佢係「犯民」代言人添！ 點解一位宗教領袖對一條保護香港、維護國家安全嘅法例有咁大反應嘅？ 其實佢有幾了解條法例呢？
係2004年7月，教統局通過「校本條例」，目的只係要全港津貼學校，增加學校各方「持份者(stakeholders)」嘅參與，優化學校管治咁簡單。但「前主教」又斷章取義話「校本條例」會影響教育團體辦學理念同自由，所以用教會名義控訴「校本條例」違反《基本法》，雖然政府最後都打贏官司，但都糾纏咗成6年！ 而期間不幸有兩個教師因為個人工作壓力自殺，「前主教」又魚目混珠亂嗡話政府害死呢兩位教師，點解神職人員會咁講嘢㗎？！
2014年「佔中」事件中，「前主教」就好大力支持「佔中三丑」，話公民抗命係爭取普選嘅好方法，佢不但到金鐘現場支持學生罷課，仲發表公民抗命嘅「穢論」……不過佢每次發表完「穢論」之後都好識得包底，話自己反對暴力㗎，更做樣祝福維持秩序嘅警務人員。後來事件演變成動亂，佢就卸責話班學生騎劫咗個運動，又指責政府清場，佢仲話警方施放催淚彈對班學生嘅「小兒科暴力」，係小題大做咁話。唉！又係「前主教」你當日去宣揚公民抗命呢個歪理，又係你鼓動學生與政府對抗，到後來失控，你又撇清責任，乜你冇估計到個結果㗎咩？
到2019年發生黑暴事件，「前主教」不時都會到場，撐著黃傘，豎起大姆指，向騷亂嘅人群吶喊支持，鼓動信徒去立法會外唱聖詩，又分發食物，開放啲教會地方俾班「暴力示威者」換衫，做佢哋嘅後援。其後「前主教」更有份成立「碌柚葉基金」，美其名就話幫啲「暴力示威者」提供醫療、心理同法律支援，等佢地冇後顧之憂，實質背後目的咪支持佢哋去延續黑暴囉！ 當年8月係黑暴如火如荼之際，佢被人映到係中環一間餐廳，同「生果佬」、「陳四萬」、「白頭李」、「AV仁」及一名美國國家安全顧問克里斯蒂安．惠頓（Christian Whiton）坐埋一齊，惠頓曾是美國小布殊政府的特別顧問。成班人同「外國勢力」坐埋一齊，談笑風生，佢哋究竟喺度搞緊乜？！
「前主教」除咗對社會議題非常狂熱之外，佢仲有兩件好吊詭嘅事，我零零發想同大家分享吓。 係2011年，據一份維基解密文件中顯示，「生果佬」係2005 至2010年，一共俾咗2000幾萬「前主教」，當年香港耶穌教教區已經否認教區有收過呢筆巨款，「前主教」就吚吚哦哦，話呢筆錢係用喺一啲唔方便用教會經費嘅事喎，例如:捐款俾內地地下教會啦、捐錢俾海外天災嘅人道救援、同小朋友旅行、參加聖誕聯歡會…… 仲有，因為自己年紀大，要買商務客位機票去羅馬等地參加宗教會議咁話！真係人唔笑、狗都吠啦！
首先，點解要俾錢內地地下教會？咁咪破壞緊中國與梵蒂岡教廷之間嘅關係？抑或想顛覆中央政府政權？ 佢身為香港教區嘅主教，究竟佢係為「生果佬」定「梵蒂岡教廷」服務㗎？ 除咗資助內地地下教會之外，點解本地教會唔可以堂堂正正收呢啲捐款去做「前主教」口中講嘅事？ 再者，點解「生果佬」自己唔去做「前主教」口中嘅事？ 有得威之餘，又可以出名，點解要俾個光環你呢個白頭主教？！另外，最近法庭係「生果佬」單案提及，「生果佬」係2013年，即係佔中前一年，又分兩次入咗350萬俾「前主教」，唔知佢打算幾時出嚟交代呢350萬又用嚟做咗咩呢？總之，我零零發覺得成件事就古靈精怪，偏離咗一個正常嘅神職人員操守！
主教係教區內最高牧者，負責管理、訓導同聖化天主子民嘅職務，亦要培育教友的信仰及道德生活，推行傳播福音嘅工作。除此之外，主教另外一個重要任務就係同其他地方教會及普世教會保持連繫，維護教會嘅共融團結。作為香港教區嘅主教，唔知佢履行咗幾多呢啲正正經經的職責呢？
我零零發從細到大，無論係耶穌教嘅家人或者係學校嘅老師，都係教我哋向善、做好人、做好事。 我從來只知道作為一個教徒要奉獻，但從冇諗過作為一個教徒，仲要係一個教區嘅話事人，係可以去收錢搭飛機坐商務位嘅！ 一個退休主教要咁多錢做咩呢？喺道德標準上，係咪同一個宗教領袖有好大落差呢？
一個神職人員，咁過份參與政治、咁過份同反政府嘅「犯民」埋堆，又有咩目的呢？雖然佢好似冇直接鼓吹暴力，但係喺宗教上有咁崇高地位嘅人，佢應該義無反顧咁，反對任何形式嘅暴力！ 但佢冇，佢反而喺度曲線咁支持呢啲暴力行為！！ 我從來冇諗到一個宗教領袖係會做呢啲嘢，我真係唔希望佢嘅個人行為同操守，影響晒成個宗教嘅清譽！！！！
披著紅衣神袍嘅主教，冇好好利用信仰去感化眾人，反而利用宗教身份、平台去誤導信徒同年青人，所以我零零發認為與其稱呼佢係前主教，不如叫佢做披着紅衣嘅「犯民大教主」更加貼切！
鍾情局．零零發
