領事無間道

最近係「生果佬」單法庭審訊裏面，揭露咗一個前「大國」駐港領事郭XX，同「生果佬」、「犯民」千絲萬縷嘅關係，加上佢嘅行為，真係完全顛覆咗零零發由細到大，對領事嘅印象同工作嘅認知！ 唔知大家重溫完郭XX喺「生果佬」單案嘅細節之後，會唔會有同感呢？

郭XX在2005-2008年係「大國」駐港領事，之後亦曾經做過「大國」駐聯合國、以色列及阿富汗大使。雖然佢個人離開咗香港，但睇返佢同「生果佬」嘅通訊，佢哋兩個當時喺香港應該都好熟絡，之後應該都經常保持聯繫。好似喺2017年，「生果佬」主動WhatsApp時任台灣省「菜English」嘅左右手，話想介紹郭XX比「菜English」識，希望郭XX可以協助台灣省同「大國」建立更有效率嘅外交渠道、建立更緊密嘅關係……「生果佬」送彿送到西，仲吩咐外國人助手「肥仔Mark」安排及支付郭XX同太太整個旅程嘅費用添！不過，郭XX最後都冇去到！

係2019年3月中，郭XX apps「生果佬」，話係「大國」同阿婆「陳四萬」食過晚飯，佢仲提醒阿婆，要趁今次行程，要求「大國」嘅「國會」同「國家安全委員會」關注香港情況，及提出修訂《逃犯條例》對香港嘅危害等等。郭XX話阿婆帶咗郭x鏗同莫x光一齊去，而郭XX意識到呢兩個「接班人」，好似已經有周詳計劃去求外國勢力，協助對抗中國及反對修訂《逃犯條例》。最後郭XX同「生果佬」講，如果嚟緊要佢幫手，大家可以係4月底再傾。跟住，「生果佬」就將佢同郭XX嘅訊息，轉發俾「犯民」團伙，包括「白頭李」、「AV仁」、李x達同李卓x。另外，郭XX又建議「生果佬」要拉商界同法律界落水，去推動大眾反對修訂《逃犯條例》添！

2019年6月11日(即係黑暴啱啱開始嘅時候)，郭XX就開咗一個WhatsApp群組，成員有「生果佬」、「肥仔Mark」、「白頭李」；期間「肥仔Mark」用呢個群組，報告咗2019年10月「生果佬」將會同一眾「犯民」去「大國」見時任總統或副總統、其他宮內募僚及「大國」媒體嘅行程安排，佢跟著又講自己出席「大國國家安全委員會」會議嘅情況。呢個前領事同「生果佬」、「犯民」元老嘅關係同互信，真係非比尋常！連咁嘅訊息大家都會一齊分享，睇嚟都係同道中人！

而係2019年11月，郭XX更透過呢個群組，建議咗一份「需要做事嘅清單」俾大家，目標係要喺立法會同特首選舉中，從建制派手中搶番啲政治權力。後來「生果佬」覺得自己嘅WhatsApp功能好似有啲唔妥，唔知部手機係咪俾人hack咗，所以係2020年7月，即係立咗《國安法》冇耐之後，佢就刪除所有與郭XX係群組嘅對話，轉去用另外一個通訊平台溝通；「白頭李」仲精甩尾，即刻自行退群添。點解要咁做?！

除此之外，法庭又披露咗係2020年7月，郭XX同埋佢之後幾個嘅前「大國」駐港領事，聯同多名「大國」國務院官員聯署，敦促國會通過制裁香港嘅法案，點解呢啲領事，做咗咁多好似係佢哋職責以外嘅事?！ 而根據網上「領事聽審龍虎榜」報導，「大國」領事館派人去旁聽「生果佬」嘅審訊，重頻密過英角同所有其他國家添！「生果佬」又唔係「大國」公民，點解呢?！

根據《維也納領事關係公約》，領事除咗保護國民係駐在國嘅合法權益，同協助佢地各種福利事務之外，最重要嘅職責，就係要促進同駐在國關係嘅發展，增進相互了解，係搞「聯誼」，唔係「搞嘢」喎！

不過我零零發上官網睇過，發現「大國」領事館有一個新聞文化處，佢嘅主要職能：一是「大國」政府政策的官方消息來源；二是協調「大國」與所駐本地的教育文化交流合作計劃。但係呢個文化處，過去一路都係香港單方面，推展所謂「多元、平等、共融及無障礙」嘅活動，再配合番一啲輿論，藉此吹捧「大國」嘅自由、平等、冇種族歧視嘅價值觀，令一般人以為「大國」嘅政策好正咁！

我零零發又發覺呢個新聞文化處，有好多活動都係以香港嘅學生哥為對象，例如：去學校搞活動、係社交平台提供免費英語學習課程，又年年舉辦香港同美國中學生嘅文化交換計劃，上年佢哋又搞咗個模擬嘅大選競選活動，俾啲香港學生去參與，又叫埋「犯民」元老卿姐出席，宣揚「大國」一人一票嗰套選舉制度。香港班學生哥連自己國家嘅憲法、香港法例、同選舉制度都未必掌握得到，唔知佢哋最後會學到啲咩呢？

仲有啊，自 1940 年起，「大國」就擲錢搞「國際領袖人才參訪計畫」（International Visitor Leadership Program，IVLP），邀請世界各國政府或非政府組織嘅人，去「大國」進行為期1個月嘅參訪，費用全免。參加嘅人全部都係由「大國」派駐各國大使（領事）館推薦先有得去。到而家世界各國已經有超過 20 萬人次，參加過呢個計畫。香港都有唔少政、商界，學術界，NGO參加過。呢啲交流計劃，除咗加深對「大國」政府及社會嘅認識、互相收風之外，仲有冇其他嘢，咁就得當事人先知啦！

總之，我零零發覺得所有嘢都係「漁翁撒網」地，向年輕人及社會各界，輸出西方價值觀同「親親大國」嘅思想囉！

近幾年，「大國」成日公開批評特區政府鎮壓示威者、要求釋放「生果佬」、又話香港法治已經受到侵蝕等等；但係現任「大國」駐港領事，由2022年接位到而家，都不知幾親民，佢不但學講廣東話、去街市買送，睇龍舟比賽，又去黃大仙，食地道牛肉粥、兩餸飯等等，總之俾人嘅感覺係一個友善嘅政客……睇到我零零發有啲迷惘，點解佢老闆一方面成日批評香港，另一方面佢又同我哋懶friend咁，究竟想點啊？想當年肥彭都係靠食蛋撻蠱惑香港人！ 有冇高人可以指點下我零零發啊？

睇完「大國」領事喺「生果佬」單案嘅所作所為，我零零發唔知幾時會有另一個「生果佬」、另一個郭XX出現；不過我好清楚知道，領事三年一任，好似「影帝」係無間道話齋，3年又3年，佢哋會無休止咁，繼續喺香港出出入入。為咗出入平安，大家都要小心啲啊！

鍾情局．零零發

鍾情局

** 博客文章文責自負,不代表本公司立場 **

12月2日，保安局局長根據《維護國家安全條例》將「香港議會」，同另一顛覆組織「香港民主建國聯盟」(「建國聯」) 列為「受禁組織」，禁止佢哋喺香港運作。任何人以受禁組織幹事或成員身份行事、參與組織活動或集會、煽惑他人成為組織成員、提供任何形式援助、或牟取會費或援助等，即屬犯法，最高刑罰為罰款100萬元及監禁14年。睇返資料，呢兩個海外顛覆組織19名核心成員，已被香港特區政府懸紅通緝，並刊憲列為「指明潛逃者」。

我零零發之前都有提過「香港議會」，係由國安通緝犯「袁X夷」、「何X懋」同「龔X夏」，喺2022年7月於海外成立嘅反中亂港組織。「袁X夷」喺黑暴期間，一早投靠西方國家，鋪定路吸金，據聞佢孖住美角前國務卿搞一場反中亂港講座，袋咗成100萬美金；另外又公然拍片要求「侵侵」制裁中國。2019年黑暴平息後，「袁X夷」知道已經無空間喺香港，繼續佢嘅反中亂港圖謀，所以就諗到喺海外成立所謂「香港議會」呢條「屎橋」，喺海外聚集一班黃人手足，延續抗爭情緒，繼續宣揚反中、顛覆國家政權嘅思想，企圖將反華意識形態持續倒灌返香港。

「袁X夷」成立「香港議會」之初，已經開宗明義要推動「自決」，又制定「香港憲法」同發表所謂《自由香港宣言》，揚言要「滅共」，目的好明顯係想用非法手段，去推翻國家政權同破壞國家憲法。佢亦搞咗個所謂選舉，聲稱要選啲「議員」代表香港人，但呢個選舉明顯係鬧劇一場，完全無代表性。「袁X夷」由2022年提出會搞選舉，但因無人參選及技術問題一拖再拖，到2025年5月先勉強搵到19個「候選人」去爭15個議席。後來其中5個「當選人」怕繼續參與所謂「議會」會犯法，於是急急跳船，剩返10個人宣誓就任。呢班所謂「議員」不但毫無議政經驗，而且個個都騎騎呢呢、骨格精奇，講個名、俾埋幅大頭相你睇，都唔會知道係乜水。

「香港議會」呢班國安通緝犯，除咗不斷喺網上搞直播講廢話、唱衰中國同香港特區政府之外，仲成日「鬼打鬼」。其中一個匿喺澳洲嘅當選人「黃X和」，近日拍咗幾條片，唱大檔話「香港議會」班人唔做嘢兼無能、運作不透明、搞小圈子。 「黃X和」話自己因為加入「香港議會」而被通緝感到不值，覺得被拖累。不過大家都咪咁天真信佢(哋)，好明顯成班人都只係利用所謂「香港議會」平台，拎政治名氣，呃金主泵水，氹黃人科水支持佢哋咋!！

其實，早前有位19歲女生，因為幫「香港議會」拍攝宣傳影片，煽動他人參與非法選舉而做咗炮灰被拘捕，最終判囚一年。喺求情時，佢提到跟咗前男友「香港議會」成員「林X淦」潛逃至楓葉角生活，但去到無人無物，又唔識英文，要靠向家人借錢渡日都不特止，「林X淦」更以佢名義向友人借取巨款，搞到佢負債纍纍，所以唯有返嚟香港，點知又被「林X淦」唆擺，為「香港議會」助選拍攝影片招至刑責。最慘係當佢被捕之後，一班「香港議會」骨幹成員以及「林X淦」都從未為佢發聲，好明顯，由始至終，佢哋都只係當個女生係一件「工具」。

「香港議會」害人害物嘅例子又點止咁少吖！「香港議會」另一著草骨幹，假牧師「姜X偉」，早前肆意抹黑香港立法會選舉，更喺網上煽動他人投白票或者唔投票而觸犯《選舉條例》。佢被廉政公署通緝係咎由自取，不過就「關照」咗轉載佢帖文嘅網民被人拉咗，「姜X偉」名符其實係「叫人衝、自己鬆」，真係害人不淺。

其實呢個「姜X偉」黑暴走咗去台灣之後，係2024年11月成立咗一個「港獨」組織，叫做「香港民主建國聯盟」(「建國聯」)，當中6名成員同時都係「香港議會」嘅成員，所以兩個組織嘅關係可謂千絲萬縷。

翻查資料，「建國聯」以推動「香港獨立」及「香港議會」為宗旨，聲言要制定所謂「香港憲法」、創立臨時國旗國歌、建立軍事力量，並計劃培訓海外港人「重返香港」從事顛覆活動。呢個組織喺今年年頭，更曾經喺台北舉行「快閃升黑旗」活動，期間更加踐踏國旗及區旗、升起「黑洋紫荊旗」、播放有「港獨」意味嘅歌曲，大肆宣揚反中亂港訊息。

「建國聯」自成立以來，於網上大肆鼓吹分裂國家思想，發佈「港獨」帖文向年輕人進行洗腦，煽動佢哋做出違法行為。早前就有4名呢個組織嘅在港成員，受到網上煽動帖文所影響，參與「建國聯」嘅活動，因而涉嫌違反顛覆、分裂國家罪而被捕。當中包括一名犯案時得15歲嘅學生，計下數，呢個同學仔喺2019年黑暴時只得10歲，好難想像一個本應天真瀾漫嘅小朋友，被人荼毒產生極端思想而走上歪路，佢12月15號就因為呢單《串謀分裂國家罪》判刑42個月。大家唔好諗住未夠秤(不足16歲) 犯咗國安法嘅罪行可以警司警誡 ，或者上兒童法庭受審，國安case係冇呢支歌仔唱㗎！而呢班身在境外嘅亂港分子就置身事外，隔岸觀火，不斷喺網上大放厥詞，繼續煽動本地年輕人犯法，為佢地政治圖謀付出代價。
雖然「香港議會」及「建國聯」核心成員已被公開懸紅通緝及列為「指明潛逃者」，但呢班人未有收斂，自恃喺海外就可以肆無忌憚搞亂香港。佢地持續倡議推翻國家政權，又公開呼籲國際社會制裁特區官員，近日更借立法會選舉同宏福苑大火大搞抹黑煽動，可謂無所不用其極咁去危害香港社會安定繁榮。特區政府今次將呢兩個組織列為「受禁組織」，切斷其對香港嘅影響，可謂有絕對必要！

我零零發都唔止一次提醒大家唔好信佢哋講嘅嘢，更加唔好轉載佢哋嘅文章，或者以任何方式支持、參與、資助佢哋搞嘅活動，否則，隨時會成為下一個國安罪犯！

所以大家與其擔心條紅線係邊，不如小心唔好踩到條黃線仲緊要喇！

鍾情局•零零發