成軍10周年全新音樂企劃啟動 Nowhere Boys化身郵差叔叔以作品鼓勵樂迷

寰亞樂隊Nowhere Boys成軍10周年，以全新創作音樂企劃做紀念，過往的作品主要寫他們的故事和想法，今次決定以別人的故事為創作藍本，他們化身郵差叔叔，以作品鼓勵樂迷。首支作品《給失敗者的一封信》MV，就在布置成郵局的場景拍攝，他們更玩繞口令「郵差叔叔送信純熟迅速送出」，考起番書仔鼓手Nate，他以英語版反擊。

Nowhere Boys推出全新創作音樂企劃的首支作品《給失敗者的一封信》。

齊齊化身郵差叔叔。

觀看相關影片按連結：https://youtu.be/UZ4pEHCdHCw

新歌《給失敗者的一封信》由Nowhere Boys包辦作曲和監製，他們與新晉樂隊Turbulent的主音Zackery一同編曲，而Oscar擔任填詞及MV導演。主音Van說：「雖然新歌係『給失敗者』，但訊息係正面、鼓勵。喺某一個範疇唔成功，有可能因為唔適合、或者遊戲規則唔啱玩，可以去試吓其他地方。只要一日仲有生命，仲未斷氣，都唔應該謝幕，都可以試新嘢！」

鍵琴手漁佬、吉他手Ken、主音Van、鼓手Nate、低音吉他手Hansun

Van

今次音樂企劃共有4首歌，第一首《給失敗者的一封信》已上架，之後的作品主題取決於樂迷的故事。Nowhere Boys將設郵箱收集信件，以決定餘下3封「信」的主角。Van說：「我哋邀請大家親筆寫信畀我哋『Nowhere郵局』，睇吓大家有咩要幫忙、想要咩能量，再決定下首歌嘅對象。今年我哋10周年，為答謝身邊支持我哋咁耐嘅樂迷，今年所有歌都為大家寫。同時我哋亦學習放下自我，透過旋律、歌詞和訊息直接將能量交畀樂迷。」

Nowhere Boys將設郵箱收集信件，之後的作品主題取決於樂迷的故事。

MV圖片

MV圖片

MV圖片

提到親筆寫信，Nate表示旅行時寫名信片，而低音結他手Hansun透露學生時代與「筆友」通信。其實他們經常收到樂迷親筆信，Van說：「去年演唱會完咗，我哋收到好多fans嘅信，寫嘅說話都好warm、好鼓勵。」

MV圖片

Van

Nate

Hansun

漁佬

Ken

寰亞樂隊Nowhere Boys前晚（1月30日）在中環AIA嘉年華大帳幕舉行JamNgok 2026 Live at the Big Top《Letters of Nowhere - The Concert》，作為成軍十周年音樂企劃壓軸兼重頭表演，座無虛席，反應熱烈。期間，演唱《天外飛仙》時全場勁high，觀眾一齊揈毛巾又一齊跟歌詞跳起。但當主音Van跳起落地時左腳拗柴，失平衡跌倒地上狀甚痛苦，他堅持站起來繼續唱，隊友漁佬立即上前一邊拉小提琴一邊讓出膊頭給Van攙扶，結他手Ken和Bass手Hansun亦上前傍住他繼續表演，Van強忍痛楚叫觀眾「你哋幫我跳」，觀眾跟住一齊唱一齊跳起。

之後Van原地休息鬆鬆腳，咬緊牙關說：「Show must go on!」並堅持站起來繼續演唱《最後的搖滾》，全場振奮吶喊。Van由隊友攙扶走勻三面與觀眾大合照，然後他坐在地上，隊友都陪他坐下演唱《我在》，觀眾揮動手機燈和大合唱，一片星海，場面感人。

Nowhere Boys

完騷Van立即接受在場救傷隊治療，然後坐輪椅返回舞台與到場嘉賓好友們合照，期間有說有笑。Van憶述受傷一刻：「今日唔知幾時，舊患（右腳）突然好痛，用另一隻腳頂住，可能承重太多，兩隻腳唔同位置係咁抽筋、不停震，我好驚，真係企唔到，一企就仆低，唔知點算。好彩你哋（隊友）扶住我，當我企又企唔到就會好揗，又要唱緊。其實唱《天外飛仙》尾段我唔知發生緊咩事，係咪唱到好亂？」身旁Ken說：「我都唔係好記得，但其實幾好，好似耗盡最後一滴，感覺良好。」

鼓手Nate心痛Van受傷，對Ken說：「你就感覺良好，佢（Van）好痛！」Van說：「我好似靈魂抽離！」當時其他隊友上前陪Van，Nate原位繼續打鼓，但一臉擔心，他說：「我要keep住個beat都係一種幫手，我停埋就真係寡架啦！」Ken說：「Nate當時對眼係咁碌，諗緊『點算？點算？』」漁佬笑說：「今日如果拍低咗Nate眼神，可以幫佢打字幕，應該有幾千字嘅文章！」

Nowhere Boys

Nowhere Boys

離場時，Van在車上等候隊友執拾樂器，他說：「今日打攪咗好多人，要大家照顧我，原本依家我一齊執緊嘢。」其實音樂會中段眼濕濕，他坦言看到觀眾揮手燈大合唱時好感動，說：「我唔想個人情緒影響表演，嗰度搞掂，諗住忍到，打完大佬順利過關，點知隻腳出事，其實唔係好記得之後發生咩事，好似靈魂出竅咁！」

Nowhere Boys成軍十周紀念，去年初展開「Nowhere Post Office」企劃，由填詞人Oscar創意擔當，以《給失敗者的一封信》、《給受困者的一封信》、《給夢想家的一封信》和《給勝利者的一封信》等四首作品、布置成郵局的pop-up store、周邊、推出專輯和不同演出等，為面對不同狀況的樂迷帶來能量和鼓勵。

Nowhere Boys

音樂會捧場嘉賓有張繼聰與太太謝安琪、黃淑蔓（Feanna）、陳健安、蔡穎恩（Eveyln）與老公譚運佳、麗英、蔡浩然（Scott）、連家穎（Vian）、Winka@COLLAR與男友朱芸編、泳兒、吳家熙（Cheronna）和張惠雅（Regen）等。Nowhere Boys演唱與Winka合唱的《異人之野望》Rock版，還有他們為泳兒擔任作曲、編曲、監製（與 Adrian Chan 合作）及Rap詞創作的歌曲《撞到正》，觀眾席上的Winka和泳兒都表現興奮，一齊又唱又跳。

Van台上表示特別多謝張繼聰，他說：「大家有冇睇《金童》？（台下歡呼）先唔講套戲有幾好睇。套戲講打不死嘅故事，同我哋做band仔好似，而最啟發我，係張繼聰用咗好多唔同方法去宣傳套戲，親力親為，甚至自己去舉牌叫人入場睇戲。我覺得為咗一套戲、一隊band、音樂，都要有呢個膽量。喺呢個騷開賣飛嘅時候，我被佢啟發，為咗要畀人知我哋有呢個騷，我乜都做齊。今日好叻仔呀，好多人嚟睇！」

然後唱《票房毒藥》，Van說：「我會一直都唱呢首歌，唱到有一日，我哋一開賣就會賣晒啲飛！」全場歡呼，當他唱到歌詞「誰會買飛」，台下觀眾大叫「我哋會買呀」，Van感動背向觀眾抹眼淚。而Ken說：「有位大師講過，只要每步都當第一步就唔會攰。我哋夾band攰唔攰？唔攰！因為我哋每去一個場，我哋都當係第一場表演咁看待！」

Nowhere Boys