世界咁亂，原來你哋有份搞出嚟嘅！

新官上場三把火，連美國總統都唔例外。「侵侵」一上場就搵咗玩具車老闆「馬仔」head 住「政府效率部」，向兩個美國政府屬下嘅組織開刀。佢哋分別喺「美國國際開發署」USAID (開發署)，同「美國國際媒體署」USAGM (媒體署)。

我零零發本來覺得呢兩個組織好官僚，係大花筒，所以都應該要整頓一下，去削減開支同人手。但成件事唔止咁簡單，原來係「侵侵」一個清洗異己嘅行動，而係佢追殺異已嘅過程中，又洩露咗美國多年嚟嘅隱密操作。原來世界咁亂，呢兩個組織有份搞出嚟嘅……

第一刀，先斬美國國際開發署USAID ！

「開發署」喺1960年代初成立，有成萬個員工，其中三分之二喺海外工作，佢哋係60多個國家設有辦事處，並且喺數十個國家開展緊工作。呢個組織2024年嘅總預算達320億美元，薪金支出差唔多成22億美元。網上講「開發署」表面上係所謂「非政府組織」，但「非政府」只係掛名，實情係美國政府一直都操控緊成個組織所有嘅財政、監管、同運作。

高人話，「開發署」係全球各地親美國非政府組織嘅最大金主，以「促進自由」同「人道救援」為幌子，用金錢操控呢啲組織，作為美國喺各地策動顏色革命嘅核心工具。佢哋一方面去唔同國家，炒作不同議題，去煽動當地人民對政府產生仇恨同對抗，引發內亂同令當地局勢陷入混亂，搞到民不聊生；另一方面就扶植當地親美勢力上台，坐收漁人之利。唔信？睇吓以下幾個經典例子:-

2010年代初，「阿拉伯之春」爆發，多個中東國家陷入內亂，政府接連倒台，經濟崩潰，幾百萬人流離失所。其後有媒體爆料，指「開發署」一直假借宣揚民主，教導當地人民參與選舉，實際就透過選舉去挑撥離間多個中東地區群眾，反對當地政府，引發局勢大亂

而於2009年註冊，總部位於瑞士日内瓦嘅「良好棉花發展協會」(BCI)，自稱為世界上最大嘅棉花可持續非牟利組織。呢個組織要求會員必須使用佢哋認為符合標準嘅棉花，先可以使用它們的BCI標籤。2016年，BCI曾經收取「開發署」過百萬美金嘅資助，而喺2021年，喺毫無事實根據下，BCI捏造新疆棉花生產中存在「强逼勞動」嘅謊言，借此封殺新疆棉花，鼓動全球抵制使用新疆出產嘅棉花。

另外喺2022年，印度人民黨揭發「開發署」暗地資助當地一個非政府組織，發佈一個「反印調查報告」，企圖煽動反對派推翻莫迪政府……

而媒體亦曾經爆料，話「開發署」一直透過唔同渠道，去資助美國金融大鱷索螺絲嘅「開放社會基金會」，再利用佢哋做中間人去掩飾資金來源，向全球不同嘅非政府組織泵水搞事。原來香港都有被加持過喎:-

係「生果佬」一案提到反中亂港嘅「重光團隊」，日日喺西方國家嗌制裁中國同香港。根據報道，「開放社會基金會」單單喺2022年至2023年間，就曾向「重光團隊」提供成120萬港元嘅資助。索螺絲為乜俾咁多錢一班不見經傳嘅(o)靚仔? 自己諗下啦!

另一個就係「香港民主委員會」，呢個組織喺美國不斷推動「亂港法案」，仲呼籲制裁中港兩地官員。其中一個極端反華分子，就係國安逃犯郭鳳儀。無獨有偶，佢哋背後嘅資金來源，聽聞就係來自「開放社會基金會」。

所以就連玩具車老闆「馬仔」都公開話:「開發署根本係犯罪組織，必須廢除！」、「開發署用美國人嘅稅款資助生化武器，害死幾百萬人！ 」、「美國唔應該到處推翻別國政權，應該專注管好自己美國嘅事」!

第二刀，再斬美國國際媒體署USAGM !

美國另一隊國家PR team，叫美國國際媒體署USAGM。網上資料顯示，「媒體署」於 1999年10月成立，喺2023年已經擁有3384名員工，並申請咗9.5億美元預算。據悉，「媒體署」係受美國政府直接資助，旗下宣傳喉舌包括「美國之音」、「自由亞洲電台」等。聽聞佢哋制作咗63種語言嘅節目，係全球100多個國家播出，覆蓋約4.2億人口。呢啲組織表面上係宣傳所謂「民主」、「自由」等美式價值觀，但實際就係藉此滲透各國，操控輿論、製造假新聞、抹黑其他國家。

今年3月，「侵侵」出手簽咗行政命令，直接斬斷「媒體署」水喉。話口未完，「美國之音」就即刻停運，而「自由亞洲電台」就奄奄一息。所以「自由亞洲電台」台長「貝貝」好嬲咁話：「斷咗「自由亞洲」條水喉，等於送咗大獎俾中國！」點解「貝貝」會講啲咁嘅嘢？乜媒體唔係應該中立咁報道事實嘅咩？點解會有針對中國立場嘅？點解講到「自由亞洲電台」好似一件「武器」去攻擊中國咁嘅?! 佢呢句回應，簡直係鬼拍後尾枕，間接承認「自由亞洲電台」係一個專門攻擊中國嘅工具!

而據美媒爆料，「媒體署」係2019黑暴期間，都曾經透過一個美國基金會，泵出幾百萬港元，為香港暴徒研發加密通訊Apps，以逃避警方追查!

雖然「侵侵」借「政府效率部」，將一的喺2019年搞到香港立立亂嘅組織進行大清洗; 但大家咪咁開心住，美國嘅反華路線係唔會變㗎! 「侵侵」只係要佢使嘅錢，符合其「侵侵優先」嘅立場，所以呢的手起刀落嘅行動，唔代表華府唔再去繼續美國嘅霸權。「侵侵」只係換個班底、換把刀，用更赤裸裸嘅手法去反華咋!!!

鍾情局．零零發

鍾情局

** 博客文章文責自負,不代表本公司立場 **

大埔宏福苑發生五級大火，導致超過150人不幸離世，當中包括一名英勇殉職嘅消防英雄。零零發同全港市民一樣，感到無比心痛同悲哀，願逝者安息，生者如斯。

大火發生之後，成個政府總動員，消防人員不眠不休，無畏無懼面對火場幾百度高溫全力撲救，希望救出更多生還者，救護及警方就全力配合，盡量減低傷亡。一救熄火之後，警方災難遇害者辯認組 DVIU就即刻爭分奪秒，進入仍然有危險嘅災場去搜索遺體殘骸，DVIU隊員不但面對惡劣嘅情況，亦要強忍悲痛和淚水，目的只係希望可以儘快確認死者身份，等家人可以同佢哋正式道別。至於其他政府部門，就將支援災民嘅配套及物資，迅速安排到位，而全港各界及市民不但捐贈善款，亦作出各方面嘅配合，體現了官、商、民同心協力，解決災民燃眉之急。

特區政府除咗全力救災同支援災民即時所需之外，喺事件發生唔夠24小時，就宣佈已經籌組成立3個工作組，包括「調查及規管工作組」、「緊急支援及募捐工作組」及「應急住宿安排工作組」，全方位協調安頓災民嘅需要。警方及廉署亦即時展開相關刑事調查，將懷疑涉事嘅工程承辦商人員拘捕，全速努力查找事故原因，希望還死傷者及家屬一個真相。而為咗確保全港其他棚架及建築物料嘅安全，相關部門亦立刻巡查全港所有正在進行大型維修嘅屋苑。

正當社會萬眾一心集中賑災善後嘅時候，零零發就留意到有一小撮別有用心嘅人喺呢個時候，借頭借路挑起事端，真係令人好氣忿!咁呢班無恥之徒究竟做咗啲咩呢?

首先喺大火發生當日，不少媒體都有轉載甚至直播事件，當時有相信係身處宏福苑嘅居民或者佢哋嘅家人，透過直播頁面留言發放求救訊息，以及列出被困/失聯家人身處住宅單位嘅位置，希望救援單位可盡快提供協助。但就有啲無恥之徒，竟然喺留言區瘋狂洗版留言，不斷重複呼籲「立法會選舉投票」、或者強調要「支持某一建制派政黨」；呢啲留言內容同方式，好明顯有別於正常嘅選舉宣傳及拉票訊息，而數量比起火災發生前突然大幅上升幾倍有多，喺一個咁唔合理嘅時間點不斷重覆「選舉信息」，加上大部份留言都係來自匿名帳戶，呢啲手法同啲網軍打手非常相似。好明顯，呢啲留言者係故意搗亂，目的就係要令人誤信「建制派不顧災情，只顧宣傳選舉」，同埋對立會選舉產生負面印象。佢哋咁做隨時影響咗求救訊息嘅發放，令到命懸一線被困嘅居民失去被救嘅機會。

而喺事發後嘅一兩日，社署等部門、關愛隊及不同民間社福機構都疲於奔命進行首階段支援災民嘅工作。呢個時候，又有啲別有用心嘅人散佈謠言抹黑關愛隊搶物資、報警驅趕派物資嘅義工等等。民青局隨即澄清，更嚴正指出呢啲係無中生有嘅事，完全無發生過，警方亦無收過有關嘅報案。另外，網上又出現有人以匿名方式，聲稱自己係消防員，話政府無提供膳食支援俾消防，要義工送飯先有得食，仲話連基本嘅消防救火及保護裝備都唔夠，更有人散佈假消息，話警方會出動6000防暴警、配備步槍及裝甲車，鎮壓清場民間物資站等等，呢啲人企圖透過發佈不實嘅消息搞分化，令人覺得政府嘅工作唔到位，去挑動市民憎恨政府……呢啲好明顯又係黃人一貫作風。

當政府喺記者會上交代跟進檢視嘅工作，包括同業界研究，如何在合適工作環境下，推進金屬棚架取代竹棚架的可行性，以提升工程安全嘅時候，就俾人上綱上線，炒作所謂「竹棚無罪」，之後網上陸續出現與竹棚相關嘅圖片同抹黑政府嘅不實言論，企圖將批評嘅矛頭指向政府；及後係災場附近，更有戴黑口罩人士，向途人展示有關標語。另外，又有人喺網上搞聯署，提出所謂「四大訴求」，再印成傳單攞去災場附近四圍派，實行線上線下挑動市民對政府不滿，影響特區政府嘅救災工作。以上種種手法熟口熟面，都係2019年「黑暴」嘅套路，不禁令零零發懷疑搞事嘅人背後嘅動機。

除此之外，正當社會各界紛紛向災民伸出援手之際，騙徒卻利用今次大火，伺機招搖撞騙，包括假扮義工使用虛假嘅「大埔宏福苑災民登記表」混水摸魚，去騙取受影響居民銀行及信用咭號碼等個人資料；亦有市民收到假冒慈善機構籌款嘅釣魚短訊，訛稱為大埔災民醫藥費籌款，誘使點擊附帶嘅惡意連結，進入虛假籌款網站。呢啲擺明就係呃錢，趁火打劫嘅行為。

呢場火災令全港每一位市民都感到震驚同悲傷，雖然整個社會正經歷艱難時刻，但政府亦都實實在在做咗唔少救災同善後嘅工作，所以呢個時候，大家好應該團結一致，齊心協力處理災後工作。但係無論大家想表達一份心意，又或者出一分力去幫助災民，都要小心判斷資訊嘅真確性，千祈唔好信埋啲無名無姓嘅所謂訊息，就盲舂舂跟人去衝，到時幫唔到災民，仲要添煩添亂，又或者令自己誤墜法網……

所以大家去幫人嘅時候，記住長善之餘，亦都要長智！

鍾情局•零零發