友乜唔講得｜曾志偉親揭入無綫做總經理兩大原因難忘曾遭子女反對

娛圈事

友乜唔講得｜曾志偉親揭入無綫做總經理兩大原因難忘曾遭子女反對

2025年05月17日 22:00 最後更新：22:45

由阮兆祥、梅小惠及江欣燕主持的《友乜唔講得》轉眼來到最後一集，並於明晚（5月18日）九點半翡翠台播映，而壓軸登場的嘉賓是TVB節目內容營運總經理曾志偉。

同為主持界精英的四人，輪流分享「一起扮嘢的日子」，其中志偉便分享了昔日拍攝《娛樂反斗星》及《娛樂北斗星》時的難忘點滴，節目亦播出了33年前鄭秀文（Sammi）被志偉掟粉刷的有趣畫面予以配合；席間小惠還透露當年拍攝《樂壇插班生》時，獲Sammi無條件借出歌衫。除了大談扮嘢經，志偉還大方分享了接任總經理後的生活變化，節目還讓觀眾了解到志偉如何逐一睇中一眾獎老，及幫忙提拔影視圈台前幕後新人。

點擊看圖輯

最後一集嘉賓係節目內容營運總經理曾志偉。

鄭秀文於1992年在《娛樂反斗星》被掟粉刷的搞笑場面。

溫拿五虎與曾志偉及江欣燕演出趣劇。

梅小惠獲鄭秀文借出演唱會全部歌衫拍攝《樂壇插班生》。

江欣燕大談經典扮嘢角色Maria。

祥仔曾獲已故歌手羅文邀請在演唱會上同台表演。

原來曾志偉做主持鍾意做下靶。

梅小惠與阮兆祥曾跟隨志偉赴外地做慈善騷。

曾志偉入TVB做管理層最唔慣係睇日曆？
由於工作性質關係，志偉多年來生活模式與一般人顛倒，小惠打趣問志偉為何如此熱愛自由及喜歡沒有壓力、會突然180度轉變加入無綫做高層，小惠說：「你（依家）朝早八點幾鐘就返工，打Golf都冇咁早…真係要付出好多喎，點解你當其時咁大膽會接受呢？」志偉即笑言其實高估了自己：「咁我都高估咗我自己嘅，我初初都以為唔使咁辛苦嘅，但原來係唔得嘅。」志偉續指加入TVB其實有兩大原因：「第一TVB可以講得係我成長嘅地方，我對TVB好有感情，第二就係我覺得，如果呢個行業係佢養大我嘅，我有能力嘅話，都希望喺呢個行業度做返啲嘢啦…我記得嗰時搵我（返TVB），我自己都諗咗好耐，亦都有同我啲仔女分享，佢哋梗係反對啦，話『喂依家先嚟咁辛苦？唔使喇啩！』」志偉續指入了TVB當行政人員後，確實有很多不習慣的地方：「最唔習慣係要睇日曆過日子，以前係唔知咩叫做公眾假期。我成日覺得我哋嘅行業冇假期嘅，要做嘢就做嘢，做掂咗就得架喇，做掂咗咪放假囉。」

曾多次計劃不再做獎門人坦言最愛與肥姐合作做主持
說到主持工作，志偉揚言最愛跟已離世的肥姐合作，皆因他喜歡做下靶：「肥姐就係我上靶，我成日特登講啲嘢駁肥姐，佢成日話：『唔好嘈，做乜講啲咁嘅嘢呀，作死呀？』肥姐走咗後，我成日都要做上靶，我最鍾意做人哋叫我唔好嘈嗰個㗎嘛。」談到志偉主持過的綜藝節目，很多人第一時間會想起《獎門人》系列，小惠問到志偉對《獎門人》的堅持，志偉坦言每年都想唔再做：「《獎門人》我當然好想做，啲嘉賓令現場啲觀眾笑之餘，我自己都（覺得）好笑架嘛，又開心又有錢攞，幾開心係咪先？不過我其實年年都想話：『唔做嘞』，因為其實做獎門人就冇機會做第二啲新嘅節目，我成日都想嘗試下唔同嘅嘢。」最後到底是甚麼動力驅使志偉做了一年又一年，密切留意節目。

梅小惠曾獲鄭秀文親借歌衫拍攝《樂壇插班生》

與志偉合作多年的祥仔，在節目中踢爆志偉「通處瞓」背後真相勁洋蔥，祥仔說：「佢每一次都喺唔同嘅地方瞓著，通常佢瞓著嘅原因係咩呢？係因為佢太攰，同埋佢好多時犧牲自己睡眠時間去睇劇本，睇啲新導演或者新編劇嘅劇本，你話佢為咗咩嚟睇？佢係為咗提攜新人，如果佢睇到劇本有咩不足，就會同佢講。」志偉坦言自己當年做導演時，也希望能有貴人幫忙：「我哋後生嗰時，最難搵就係老闆，邊個肯畀錢我拍呢？所以到到我自己有能力，我就幫佢哋搵金主，同時去搵啲有前途嘅新人。」志偉又坦言幫人前有一大宗旨：「除咗佢係新導演同有能力之餘，我最緊要覺得佢人係好先，我唔想為我哋嘅行業帶嚟一個唔好嘅人。」

往下看更多文章

一周星星｜曾志偉總結過去五年在TVB表現只得50分？坦言任內最遺憾是未能做一個香港人都認可的音樂頒獎禮

娛樂訪談節目《一周星星》第五集嘉賓，是在早前舉行的《萬千星輝頒獎典禮2025》中榮獲「萬千光輝榮譽傳奇」獎項、並將於本月21日起，由TVB總經理（節目內容營運）轉任新成立、專責就新節目內容及策略方向向董事局提供建議的諮詢委員會召集人的曾志偉。

談到擔任了五年總經理，志偉竟以「得不償失」形容，不過志偉口中所謂的失，是指失去了很多他理想中的六十歲理想退休生活：「得係得到好多嘢嘅，都學到嘢嘅，原來做管理層係咁嘅；得到大家嘅肯定啦，最開心係街見到好多陌生人，三唔識七要行番轉頭搵我話：『多謝你呀曾生。』『多謝我咩呀？』『好好睇呀依家啲節目』，即刻成個人冧晒。」、「失係咩呢，我最記得我60歲生日嗰時，我猛咁同人講黃金十年呀，我呢十年要好好享受人生，趁行得走得wet得樣樣都得嘅時間…無端端臨尾仲要走番嚟TVB捱騾仔喎，又未做過喎最慘。」志偉續指，做電視圈、尤其TVB，是「冇得停架喎」：「好似做完港姐咁，聽日台慶又嚟喇，做完頒獎典禮又嚟喇，無止境地…不停度嘢諗嘢。」

嘆開會責任壓力重大致睡眠質素變差

談到芷珊指他白頭髮變多，志偉搞鬼笑指只是因為「沒時間」：「初初入TVB嘅時間哩，都染吓（頭髮）啦，後尾都費事染，多得滯，我睇番返嚟嗰張相（啲頭髮）全黑架。」雖然白頭髮變多與健康無關，但志偉坦言擔任總經理期間身體確有變差，而其中一個源頭竟是因太過擔心開會遲到：「我最唔想開會，我最驚，責任好大，一定要較鬧鐘。因為你唔喺度啲會開唔成，我會好內疚，（變相成日）七點幾要起身，嘩！好大壓力。」、「唔夠熟睡個人精神會好差，以前我哋自然醒架嘛，邊使較鬧鐘！」

而談到過去五年在職期間對於推動節目內容創作的表現，志偉只給予自己50分！「盡力就100分，好唔好可能得五十分啦。我未做到要放棄一啲嘢，因為我哋人手有限，我都冇諗過有啲同事嚟辭職話，『你返嚟真係做死人，我過隔籬啲電視台好得閒，一年可能做一個節目架咋，你哋係不停手』，我先知道自己太癲，原來我哋度咗過千個節目，邊用得晒！」

志偉又坦言五年任內確有「還剩一件未做的事」：「呢樣我覺得最遺憾，其實我自己最想做番一個，我哋香港大家都認可嘅音樂頒獎典禮，但始終我返嚟呢幾年都仲未做到。因為頒獎典禮必須有一個大家都好認可嘅音樂榜，我哋未夠時間去做好咁多音樂上嘅嘢，呢個係我唯一嘅遺憾，其實我唔止想做香港，我想做成個大灣區嘅音樂頒獎典禮，其實有籌備過，我都同好多大灣區唔同電視台開過會，但未喺我任期發生到。」

對於不少同事認為他是節目內容創作的「定海神針」，志偉謙稱自己最重要的責任其實是有承擔：「我哋做呢個位最緊要我哋有承擔，做得唔好要出嚟承擔，因為你知架喎，你畀佢哋做架喎。」、「就算有啲你真係唔知，你都要話OK，你要幫下面啲人孭先得嘅，同埋好多大膽嘅嘢我哋要去做，未必一定得，但都要試。」志偉續指20？年讓周奕瑋一人主持整個《萬千星輝頒獎典禮》，便是其中一個十分大膽的嘗試。

望真正退休後學中醫增值

至於辭任總經理後的打算，志偉笑言最開心是可以零企業包袱地回歸幕前：「我最想返嚟做咩？做港姐！問港姐問題。」志偉又指當初殺入無綫做管理層時，普遍不被看好：「全世界睇死我一定唔夠一年，『佢個人係咁，三分鐘熱度』，『好難得啦佢做五年』。」活到這個年紀仍熱血滿腔、充滿拼勁的志偉，透露真正退休後能抽空讀書增值自己：「因為我鍾意不斷有新嘢，其實我有好多嘢好想學，我報咗兩次名去學中醫，結果都係冇返到學。」

談檢討會真正重要性：就算成功都要搵到好嘅原因，先至可以做得更好。

回顧過去多年的主持工作及參與綜藝節目，志偉坦言對自己影響最大的，確是《獎門人》：「邊有人做一個節目做三十年？同埋對我嚟講係自己最滿意嘅一件事，獎門人先至係我一個親力親為嘅節目，每條題目都係我自己起，每個環節都係我自己諗咁滯。」、「我（嗰時）每晚做完都請食宵夜檢討，啲人問『咁成功都檢討？』『成功先要檢討…點解好睇？點解上個禮拜唔夠好睇？因為多咗啲乜嘢？點解請呢啲人好玩？邊個好玩？佢有幾識玩？好玩在邊度？』其實檢討唔係話做差咗要檢討，做好都要檢討，點解好咗？！你搵到好嘅原因，你先至可以做得更好。」

親揭最愛與已故藝人肥姐合作原因：卒之有個人可以喝住我

志偉又謂最後悔的一件事，是曾於節目中因貪好玩向汪明荃阿姐「飛拖」，結果遭肥姐沈殿霞鬧爆「想死呀你」，志偉：「所以我點解話我最鍾意拍肥姐，係卒之有個人可以喝住我…最開心可以做小子，做小子可以講嘢當開玩笑呀嘛。」志偉又指即使做了多年主持兼大騷經驗豐富，但出台前還是免不了緊張：「係TVB先有咁多Live Show，全世界都冇，所以啲主持真係驚心動魄，明明去完洗手間，臨出都要再去一次，我個人冇手汗，但做主持臨出場會有手汗，你驚出錯吖嘛，係冇得返轉頭。