大家可能覺得「香港民意研究社」個名好陌生，但如果話佢前身係「香港大學堂民意研究中心」，咁相信大家就會講，「哦，鍾X耀嗰個『鍾氏民調』」！
「老鍾」，68歲，喺香港土生土長嘅哲學博士，中產，有幾層樓揸手，佢老婆仲要係專業人士，出緊政府糧。
1987年，香港大學堂成立咗個研究中心，搵咗當時讀緊社會科學碩士嘅「老鍾」做助理研究主任。係1991年成立咗「香港大學堂民意研究計劃 」(鍾氏民調)，「老鍾」做研究主任，後來仲做埋總監添。到2019年，「老鍾」退休，並高調宣佈「香港大學堂民意研究計劃」脫離大學，成為獨立機構，改名叫做「香港民意研究社」，更加招攬咗「鍾x華」做副行政總裁。
係2000年發生嘅「政府干預民調風波」，成功捧紅咗「老鍾」，成為「民調」代言人。自此「民調」就大過天，任何人問吓佢哋點做研究，就動不動就話干預學術自由、言論自由！ 不過大家睇完我零零發以下嘅千字文，今時今日再睇返成件事，相信對呢單嘢可能會有唔同嘅體會！
「鍾氏民調」自1992年「肥彭」到任之後，就變得非常活躍，定期進行一啲政府政策，民生議題嘅民調。亦經常係「關鍵時刻」，發表「民調」結果。之前有媒體指，「鍾氏民調」曾多次收受外國機構捐款，就香港政治議題及選舉進行民調。而佢哋過去所揀嘅題目，亦好明顯有意圖進行政治操弄，及一直利用所謂「客觀數據」嘅民調結果，騎劫議題，帶動社會風向，挑撥社會對政府不滿及負面情緒。
傳聞係2004年立法會選舉中，「鍾氏民調」收咗美國國際民主研究院(NDI) 資助。而據高人爆料，「戴妖」分別係2012年3月、8月，搵人搞咗50萬，5萬英鎊同7萬美金俾「鍾氏民調」舉辦「民間全民投票選特首」活動，以及炮製「民意」去左右立法會選舉結果……而係四年後年嘅立法會選舉，「鍾氏民調」再次被揭發收NDI錢進行民調，幕後助攻「戴妖」嘅「雷動計劃」，藉每日發表候選人最新支持率，催谷反對派選民出嚟投票，將佢地嘅人送入立法會！
到2014年「佔中」期間，「鍾氏民調」又再收「戴妖」80萬秘密捐款做「佔中公投」民調，聲稱有九成人支持「佔中」，企圖合理化整個行動，其後個民調被篤爆誇大參與投票人數，又出現重複投票，同埋非香港永久性居民投票嘅亂像……
黑暴期間，「鍾氏民調」更發表「操控民調」結果，話接近2/3受訪者支持示威者，而絕大部分年輕人又支持所謂「反修例運動」咁話，製造「民意」去支持違法暴力！ 喺2020年，就全力協助「戴妖」攪非法「初選」，不但借出自己辦公室舉辦論壇，做點票同傳媒聯絡基地，更負責設計投票系統。到2021年立法會選舉期間，佢竟然喺個民調入面，加入一個選項 - 投「白票」！ 有冇搞錯，一個學術研究組織，踩鋼線咁去煽動市民犯法？！
搞咗咁多嘢，你估「老鍾」唔驚呀！ 所以自從「35+顛覆國家政權案」收網拉人之後，「老鍾」就即刻歸隱。點知佢嘅同宗兄弟，「鍾氏民調」話事人之一，「鍾X華」流亡海外繼續搞事，係國安通緝犯，於是關照咗「老鍾」屋企同辦公室喺1月13日被國安處突擊搜查！「老鍾」再一次出現喺大家嘅雷達，真係多得呢位流亡兄弟唔少喇！
一個月之後，「香港民意研究社」就話，即時無限期擱置所有自費研究，日後將會轉型甚至結業。「鍾氏民調」多年嚟收錢，假借「民調」去激發社會矛盾，攪亂香港，都仲未同佢計數，如果佢而家仲唔摺埋，唔通真係想搏……？！
咁呢個「鍾X華」又係咩底細呢？「鍾X華」65歲，理大前助理教授，曾經係大紀元（法輪功）時報嘅專欄作家，「香港民意研究社」副行政總裁。2022年著咗草去英國。由於佢係2020至2024年間，多次透過不同嘅平台和形式，鼓吹「港獨」及乞求外國對中國同特區政府制裁、封鎖及其他敵對行動，所以俾警方國安處通緝「煽動分裂國家」及「勾結外國或者境外勢力危害國家安全」罪。
喺「老鍾」協助調查第2日(即2025-01-14)，「鍾X華」就即刻係網上宣佈成立「海內外香港人民意研究計劃」去進行「敏感」項目嘅民調。係2月至4月，已經進行「港人身份認同」及「評價香港自由程度和《香港國安法》生效後對法治的影響」兩次民調。
3月16日，「鍾X華」分別啟動咗 youtube.com/@chungkw1(鍾X華頻道) 同buymeacoffee.com/drchung(眾籌網站)，繼續發表謬論。例如今年4月，佢話中美貿易戰，中國必定處於劣勢！ 最近又發文批評夏寶龍主任關於政商界人士國家責任嘅話題……上星期仲話英國政府背信棄義，出個「10+1」新移民白皮書，乘機慫恿喺英國嘅香港人，要積極保障自己嘅權益咁話！ 你咪以為佢為手足發聲，其實佢都係為自己打算，所以奉勸各位手足，唔好好似黑暴嗰時咁，人哋出口，你哋出手呀！ 如果唔係，你哋俾英國警察人面識別咗，到時無論「？+1」，你哋都一定冇得留底呀！
「鍾X華」咁勤力出post，無非都係要保持曝光率，咁先至有啲傻人繼續泵水養佢！我零零發喺度溫馨提示吓，如果大家參與「鍾X華」嘅討論，而內容係有煽動或危害國安成份，又或者捐錢去佢個眾籌戶口，係有可能觸犯《香港國安法》或《維護國家安全條例》，即使身在英國，將來攞唔到英國護照，都唔敢返香港！
總言之，黐埋「鍾氏民調」孖寶兄弟，係唔會有運行㗎！
鍾情局．零零發
鍾情局
** 博客文章文責自負,不代表本公司立場 **
唔講唔知，2019年黑暴之後，香港市場上有超過4300個職工會登記，係原來數量嘅5倍，大量增生的工會當然和政治搶位活動有關，雖然後來有部份失蹤咗，但係仲活躍嘅都有唔少。
其中一個好出名，成日喺媒體嗶哩吧啦嘅, 就係「香港記怯」，不過佢唔係新工會，係喺1968年成立的老工會，原來嘅宗旨係為咗提高新聞自由，改善香港記者嘅工作條件，同埋解決新聞採訪時遇到嘅障礙。當年記者人工低福利無乜，回歸前「香港記怯」都真係扮演過啲為從業員爭取權益嘅工作，高峰嘅時候有900幾個會員。
但回歸後「香港記怯」就越嚟越政治化，一啲唔太鐘意搞政治的記者就逐漸同個會疏遠。聽聞喺2023年嘅時候，會員已跌到剩返200幾，但成個業界差唔多有成萬人喎？! 政治化令整個組織變質，2019年黑暴發生事件時，「記怯」大力支持。到後來訂立《國安法》，令顛喪的政治夢醒晒，但「記怯」一如既往，自然令正常的記者敬而遠之。而家「記怯」連執委會都萎縮埋，得番8個人，有兩個係外媒嘅員工(其中一個已經被炒咗魷魚，無業)，有3個係「自由記者」，而本地新聞從業員都係得3個……都唔知呢個協會點樣代表本土新聞業界呢？
我零零發上年10月已經講過網媒「Channel Si」，係未經同意下，擅自盜用咗上載係社交平台嘅圖片，又拖欠員工超過3個月嘅糧。當時我話，「記怯」對住無論係新聞操守、營商道德都好有問題嘅「Channel Si」，一直都扮鵪鶉，唔出聲; 「Channel Si」老闆係前生果日報記者，所以「記怯」特別優待佢唔鬧佢？ 最近「Channel Si」個老闆終於出事，佢因為造假賬呃政府「百分百擔保計劃」1,200萬被捕，公司被債權人接管；數十名員工被拖欠薪金及強積金供款，而一直標榜為業界發聲嘅「記怯」，隔咗差唔多成個月，到早兩日先至出聲明話陪咗啲員工去勞工處，但一句譴責「Channel Si」及其老闆嘅說話都冇，仲認為佢哋只係財務管理不善？! 又話媒體因資金被凍結而被逼停運，顯示本地媒體營運空間繼續收窄；又話自拘捕行動後，網絡發佈多個帖文抨擊「Channel Si」，係有組織嘅網絡抹黑行動等等。
What？ 「記怯」你知唔知佢個老闆係做假脹，呃納稅人錢，係刑事案嚟㗎？點解講到佢好似好無辜咁嘅？究竟係你哋水平唔夠，唔識解讀件事，定係喺度妖言惑眾，轉移視線呢？網絡發帖評論吓又變成「有組織嘅網絡抹黑行動」，講吓都唔得，仲有無言論自由呢？呢啲唔係正正係你哋「記怯」成日話香港言論自由空間收窄囉。相信「記怯」只係支持有你講無人講嘅言論自由。
「記怯」主席「鄭X如」對「Channel Si」觸犯法律，損害大眾利益，對被欺壓、需要援助嘅記者，選擇視而不見；但對於爭取自己利益卻非常積極，鍥而不捨都要告《華X街日報》炒咗佢，點解人哋冇糧出就只係出少少力，自己被炒就出大大力去爭取呢？！
而嗰個自稱「自由記者」嘅副主席「梁X聰」，就自由到冇咗影，冇人知佢為業界做過乜，分分鐘佢嘅正職唔係記者都唔出奇！
至於「記怯」前主席「陳X昇」，平時就好巴之閉，唔知係咪因為自己係「Channel Si」高層，所以唔敢搞自己人，唔幫啲記者出聲？
咁呢個「記怯」其實過去做過乜？不如快速倒帶睇吓喇：
2019年黑暴喺香港大是大非嘅年代，8月13日《環球時報》記者付國豪喺香港機場被示威者綁住手腳毆打，「記怯」有遣責過暴徒嗎？8月31號謠傳太子地鐵站死咗好多人，咁大件事，「記怯」有做「領頭羊」嘅角色，去調查真相嗎？ 事後證實「太子站打死人」只是謠言，「記怯」有譴責過半句造假的人嗎？ 當時有個良心電視台出去採訪，就會俾暴徒圍住，甚至被破壞攝錄器材，「記怯」有為被恐嚇的記者出過聲嗎？ 個陣時有好多暴徒，會用幾十蚊去買個「記者證」，一遇到警察，就用嚟做護身符，自稱係「自由記者」，阻撓警方執法，而「記怯」就會即時彈出嚟，誣蔑警方打壓新聞自由！「記怯」當時咁大聲，同而家「Channel Si」高層騙案成個月先出嚟，細細聲嗡兩句，簡直有天淵之別！
疫情嘅時候，有個傳媒屈政府，話封區強檢時派發嘅罐頭冇罐頭刀，居民開唔到嚟食! 原來呢間媒體係專登唔影罐頭頂部嘅拉環，去砌政府生豬肉，於是引起社會各界嘅抨擊。但估唔到呢個堪稱專業嘅「記怯」，明知呢個媒體係做緊假新聞，竟然唔出嚟譴責，仲話成件事係「政治抹黑」! 有冇搞錯？我哋香港市民係純啫，但唔係傻㗎！
舊年「記怯」特登開記招，聲稱有記者同佢哋啲屋企人受到滋擾，企圖營造有傳媒被打壓嘅假象。後來話有幾個報咗案，而其中一個報案人係facebook 聲稱，自己報案之後入境，俾海關針對截查，跟住仲話俾人電話滋擾，佢係咪諗多咗呀？雖然唔知而家成件事發展成點，不過如果件事有料到，佢哋仲唔大鑼大鼓咁走出嚟亂吠咩？
近年「記怯」極度政治化，對本地真正嘅新聞自由、新聞從業員嘅保障，不聞不問；但外國一有風吹草動唱衰香港，佢哋就會即刻鋪橋搭路，齊齊助攻，好明顯係好有「國際視野」，識得「聯通世界」啦! 但係，當外國嘅新聞自由受到扞擾，佢哋又玩選擇性睇唔到。無論係2022年《半島電視台》一名記者，喺報道以色列軍隊掃蕩巴勒斯坦難民營嘅時候，喺鏡頭面前被殺，當場死亡；又或者係「侵侵」因為《美聯社》唔肯將墨西哥灣改為美國灣，一度被禁止進入白宮採訪，「記怯」都一樣係唔會出聲! 所以「記怯」個名真係好，係怯懦個「怯」；不過如果佢哋改名，叫「國際記怯」，應該更加貼切！
我零零發都唔知「記怯」呢個組織有咩存在價值，摺埋就應該係「最佳選擇」！但係佢哋死唔斷氣，嚟緊6月會選新一屆執委，唔知邊個會接呢個爛攤子做爛事呢？
鍾情局．零零發
