最近黃圈中人不斷提醒手足，要小心一個鬼怪組織--｢ 香港議會｣。呢個組織究竟係乜料，點解連黃人都唔係好「落疊」?!
今年初，我零零發講過「香港議會」，係喺2022年7月，由兩個國安法通緝犯「袁弓夷」、「何良懋」同「龔X夏」成立嘅組織。佢哋聲稱要建立一個由香港人選出嚟嘅臨時議會，去決定香港嘅未來。佢哋又話希望有100萬名全球港人選民，用佢哋設計嘅投票軟件，掃描護照等身份證明文件，去進行網上投票，選出35名首屆「香港議會」議員。
一般正常選舉講求「公平、公開、公正」，而呢個所謂選舉，由始至終都係一場鬧劇，皆因佢係「三無」選舉--無公信力、無代表性、無認受性。
首先，無公信力，所謂選民登記，居然由頭到尾都無公佈過選民登記人數，亦無選民登記冊俾公眾查閱。而個選舉嘅提名同投票期，一改再改，由原定2023 年底舉行選舉，就攪到今年3月先接受提名，投票期就改爲今年5月5日至30日，不過而家又好似話延長投票期到6月15日喎! 吓? 乜一場選舉可以咁兒戲，任意修改投票規則同時限?
第二，無代表性。起初「袁弓夷」希望選出35名「議員」，但最後得18個「騎呢怪」參選，個個骨格精奇，就算講個名出嚟，俾埋張相你睇，都未必知道佢係邊位?不過聽黃圈啲線人講，呢18個參選人，全部都「三尖八角」，個個都唔喺香港嘅，而且有超過一半係曾經犯過刑事案或者係俾人通緝緊。而個個都無議政經驗，仲話要代表香港，真係笑大人個口。明眼人都知佢哋只係想借選舉契機「搏上位」，增加知名度，撈返啲政治油水喇。
參選人個個骨格精奇。
好似有個「姜X偉」，22歲嗰時已經冊封自己為牧師，喺香港要做到牧師至少需要經過十年訓練及工作，根本無可能咁後生做到，可想而知佢講嘢嘅水份有幾高喇! 而最近班參選人，又成日話接到「恐嚇短訊」，俾人威脅，個個都話被逼害，無非想吸睛，攞多啲選票，所以唔講「被人恐嚇」嗰個就笨喇! 我零零發覺得呢啲所謂「恐嚇」係一種競選宣傳手段，多過係真實事件，你話呢？ 至於嗰班潛逃海外、較為有名嘅反中亂港分子，好似「衣冠聰」、「許至瘋」嗰啲就全部冇參選，就連原本話玩嘅「鄭X傑」，最後都無聲氣，反映選舉完全缺乏號召力，連黃人都唔睇好。
網上流傳疑似被外洩的香港議會投票人護照資料。
第三，無認受性。選舉聲稱籌備咗兩年，又搞咗唔少宣傳，但網上投票程式顯示，到5月9日只有206個聲稱係港人嘅選民投咗票(平均每日都係得嗰40人投票)，5月10日之後仲冇更新過投票數字，唔係只有200幾人投票啩?我個屋村選法團都多人投票過佢喎，仲叫自己做「香港議會」?得咁少人投票，話自己代表香港，點會有認受性？而最近網上有消息爆出，個投票系統懷疑俾黑客入侵，搞到選民護照資料全部外洩！俾人用啲外洩資料，呃咗錢都仲係小事，如果啲資料落咗去國安處度，班黃圈手足真係多得佢唔少，因為投咗票嘅手足，好明顯已經犯咗《國安法》，所以班手足個個而家騰騰震，怕將來返香港睇醫生時，俾警察拉埋喎!
其實經「袁弓夷」外洩手足資料，已經唔係第一次喇，話說黑暴期間，有傳「袁弓夷」曾經係直播中叫黑暴手足交啲護照及個人資料出嚟，佢聲稱會交俾美國國務院，安排班手足逃亡，但之後無咗下文，班黃人都覺得「袁」好鬼，驚佢賣手足啲資料嚟賺錢，連「衣冠聰」都係網上提醒手足，唔好將護照影印本俾陌生人，小心避免洩露個人資料咁話!
另外「生果佬」喺佢單案審訊自辯嘅時候，都直言同「袁弓夷」相處後覺得周身唔聚財，同埋唔相信「袁」所講嘅說話，認為「袁」想利用佢嘅人脈，拓展勢力，又覺得對方背後有不明動機……我零零發覺得，黃人陣營真係各懷鬼胎囉。
「香港議會」喺黑暴初期，拋咗呢個「偉大構思」出嚟，要成立影子議會接管香港，亦暗示背後有美西大佬支持，呃咗唔少黃人落疊，擸咗一大舊錢，不過，而家就好似「侵侵」啲大話一樣，越講越穿崩，更有人話佢哋為咗錢已經做咗雙面人，出賣自己友，所以今次嘅選舉，就已經俾人話充滿伏味！
每個人對呢個｢ 香港議會｣會有唔同嘅解讀，用零零發正常人嘅視角去睇，就算唔講呢班人呃神騙鬼，嗰班參選人根本係無名、無姓、無人識得嘅卒仔，竟然咁大想頭話去接管香港，憑咩呀？至於從手足的視角去睇，我哋係黃啫，唔係傻㗎。你話係咪?!
鍾情局
** 博客文章文責自負,不代表本公司立場 **
大家可能覺得「香港民意研究社」個名好陌生，但如果話佢前身係「香港大學堂民意研究中心」，咁相信大家就會講，「哦，鍾X耀嗰個『鍾氏民調』」！
「老鍾」，68歲，喺香港土生土長嘅哲學博士，中產，有幾層樓揸手，佢老婆仲要係專業人士，出緊政府糧。
1987年，香港大學堂成立咗個研究中心，搵咗當時讀緊社會科學碩士嘅「老鍾」做助理研究主任。係1991年成立咗「香港大學堂民意研究計劃 」(鍾氏民調)，「老鍾」做研究主任，後來仲做埋總監添。到2019年，「老鍾」退休，並高調宣佈「香港大學堂民意研究計劃」脫離大學，成為獨立機構，改名叫做「香港民意研究社」，更加招攬咗「鍾x華」做副行政總裁。
係2000年發生嘅「政府干預民調風波」，成功捧紅咗「老鍾」，成為「民調」代言人。自此「民調」就大過天，任何人問吓佢哋點做研究，就動不動就話干預學術自由、言論自由！ 不過大家睇完我零零發以下嘅千字文，今時今日再睇返成件事，相信對呢單嘢可能會有唔同嘅體會！
「鍾氏民調」自1992年「肥彭」到任之後，就變得非常活躍，定期進行一啲政府政策，民生議題嘅民調。亦經常係「關鍵時刻」，發表「民調」結果。之前有媒體指，「鍾氏民調」曾多次收受外國機構捐款，就香港政治議題及選舉進行民調。而佢哋過去所揀嘅題目，亦好明顯有意圖進行政治操弄，及一直利用所謂「客觀數據」嘅民調結果，騎劫議題，帶動社會風向，挑撥社會對政府不滿及負面情緒。
傳聞係2004年立法會選舉中，「鍾氏民調」收咗美國國際民主研究院(NDI) 資助。而據高人爆料，「戴妖」分別係2012年3月、8月，搵人搞咗50萬，5萬英鎊同7萬美金俾「鍾氏民調」舉辦「民間全民投票選特首」活動，以及炮製「民意」去左右立法會選舉結果……而係四年後年嘅立法會選舉，「鍾氏民調」再次被揭發收NDI錢進行民調，幕後助攻「戴妖」嘅「雷動計劃」，藉每日發表候選人最新支持率，催谷反對派選民出嚟投票，將佢地嘅人送入立法會！
到2014年「佔中」期間，「鍾氏民調」又再收「戴妖」80萬秘密捐款做「佔中公投」民調，聲稱有九成人支持「佔中」，企圖合理化整個行動，其後個民調被篤爆誇大參與投票人數，又出現重複投票，同埋非香港永久性居民投票嘅亂像……
黑暴期間，「鍾氏民調」更發表「操控民調」結果，話接近2/3受訪者支持示威者，而絕大部分年輕人又支持所謂「反修例運動」咁話，製造「民意」去支持違法暴力！ 喺2020年，就全力協助「戴妖」攪非法「初選」，不但借出自己辦公室舉辦論壇，做點票同傳媒聯絡基地，更負責設計投票系統。到2021年立法會選舉期間，佢竟然喺個民調入面，加入一個選項 - 投「白票」！ 有冇搞錯，一個學術研究組織，踩鋼線咁去煽動市民犯法？！
搞咗咁多嘢，你估「老鍾」唔驚呀！ 所以自從「35+顛覆國家政權案」收網拉人之後，「老鍾」就即刻歸隱。點知佢嘅同宗兄弟，「鍾氏民調」話事人之一，「鍾X華」流亡海外繼續搞事，係國安通緝犯，於是關照咗「老鍾」屋企同辦公室喺1月13日被國安處突擊搜查！「老鍾」再一次出現喺大家嘅雷達，真係多得呢位流亡兄弟唔少喇！
一個月之後，「香港民意研究社」就話，即時無限期擱置所有自費研究，日後將會轉型甚至結業。「鍾氏民調」多年嚟收錢，假借「民調」去激發社會矛盾，攪亂香港，都仲未同佢計數，如果佢而家仲唔摺埋，唔通真係想搏……？！
咁呢個「鍾X華」又係咩底細呢？「鍾X華」65歲，理大前助理教授，曾經係大紀元（法輪功）時報嘅專欄作家，「香港民意研究社」副行政總裁。2022年著咗草去英國。由於佢係2020至2024年間，多次透過不同嘅平台和形式，鼓吹「港獨」及乞求外國對中國同特區政府制裁、封鎖及其他敵對行動，所以俾警方國安處通緝「煽動分裂國家」及「勾結外國或者境外勢力危害國家安全」罪。
喺「老鍾」協助調查第2日(即2025-01-14)，「鍾X華」就即刻係網上宣佈成立「海內外香港人民意研究計劃」去進行「敏感」項目嘅民調。係2月至4月，已經進行「港人身份認同」及「評價香港自由程度和《香港國安法》生效後對法治的影響」兩次民調。
3月16日，「鍾X華」分別啟動咗 youtube.com/@chungkw1(鍾X華頻道) 同buymeacoffee.com/drchung(眾籌網站)，繼續發表謬論。例如今年4月，佢話中美貿易戰，中國必定處於劣勢！ 最近又發文批評夏寶龍主任關於政商界人士國家責任嘅話題……上星期仲話英國政府背信棄義，出個「10+1」新移民白皮書，乘機慫恿喺英國嘅香港人，要積極保障自己嘅權益咁話！ 你咪以為佢為手足發聲，其實佢都係為自己打算，所以奉勸各位手足，唔好好似黑暴嗰時咁，人哋出口，你哋出手呀！ 如果唔係，你哋俾英國警察人面識別咗，到時無論「？+1」，你哋都一定冇得留底呀！
「鍾X華」咁勤力出post，無非都係要保持曝光率，咁先至有啲傻人繼續泵水養佢！我零零發喺度溫馨提示吓，如果大家參與「鍾X華」嘅討論，而內容係有煽動或危害國安成份，又或者捐錢去佢個眾籌戶口，係有可能觸犯《香港國安法》或《維護國家安全條例》，即使身在英國，將來攞唔到英國護照，都唔敢返香港！
總言之，黐埋「鍾氏民調」孖寶兄弟，係唔會有運行㗎！
鍾情局．零零發
