有好多學者同政治評論員分析2019年黑暴，都話咁大規模同有組織嘅暴亂，係美角幕後操弄嘅「顏色革命」；而呢啲「革命」運動，一直都利用年青人入世未深，喜歡挑戰同冒險嘅性格，不斷荼毒佢哋嘅思想，又煽動佢哋去參與違法、暴力嘅行為。
我零零發今次講吓一個大好青年，點樣喺呢啲所謂「革命」氛圍荼毒下，成為後起之獸 ！
「張昆羊」，家中獨子，喺香港長大，讀Band One 中學，分別喺兩間大學讀過中國研究及政治。16歲嘅時候就黐埋「黃痴瘋」參加反國教運動；讀大學時係學生會幹事，於是更加全程投入當年嘅非法佔中同埋黑暴。雖然佢出得嚟(遊)「行」，但就冇預咗去「還」，係2020年8月，佢靜雞雞拋底手足，走咗佬！ 黃圈線人話，佢而家起碼係3單案嘅通緝犯。
講返「張某」嘅黑歷史，佢係2015年做大學學生會幹事嘅時候，就話「六四燭光晚會」冇抗爭色彩，加上佢唔認同自己係中國人嘅身份，所以唔會支持支聯會「建設民主中國」嘅理想……咁嗰年佢間大學就無參加「六四晚會」，亦因為咁，令到「學聯」係26年嚟第一次，唔可以用聯會名義出席晚會。不過到2020年，由於疫情關係，無曬啲遊行集會可以搞事，所以「張某」就「今日嘅我打倒昨日的我」，不但去參與未經批准嘅「六四晚會」，仲煽惑其他人去參加。
係大學期間，佢又以學生會名義，不停組織一班本地反中亂港學者同埋台獨份子，宣揚「革新保港」、「民主自治」、「民主回歸論」等等港獨理念。
2019年黑暴，當班手足喺度衝、週街掟汽油彈嘅時候，英角非政府組織「香江監察」就安排咗「張某」同通緝犯邵嵐，以「香港大專學界國際事務代表團」嘅身份，係8月至10月去咗美角、英角、袋鼠角等世界各角抹黑香港人權狀況，同埋游說制裁香港，「張某」更在「生果佬」陪同下，見咗美角共和黨參議員……
當啲黃人、逃犯出走香港，繼續蒙住面係西方國家遊行示威，或者online講埋曬啲低呢嘢嘅時候， 「張某」已經轉咗條叛國跑道！ 佢拎獎學金讀書，係智庫出糧做研究，咁「筍」嘅工係邊度搵？
話說「張某」2020年著草英角，潛伏一年之後，就去投靠美角，並且成功申請到政治庇護，仲入埋名牌「XX霍普金斯大學」讀碩士，主攻軍事戰略研究，跟著就加入多個智庫做研究員，正式啟動所謂「知識份子」嘅人設，成為另類賣國賊！
網傳今年3月張出席完「台灣島人權大會」與前台灣領導人合照。
高人爆料，話「張某」加入咗「特別競爭project｣，呢個反華智庫主要係關注人工智能與國家安全，以及點樣加強美角長期嘅競爭力。「張某」又係「2049研究社」嘅研究員（中國成立一百年就係2049）。呢個係一個反華、親台、受美角NED資助嘅組織，主要聚焦台海問題，主張美角應該對台灣省同埋櫻花角出售更多武器。另外，「張某」亦加入咗「James墩」基金會，傳聞呢個智庫係「終情局」控制嘅組織，成員係出自情報、軍事系統嘅人。呢幾年「James墩」網羅咗一批香港同台灣省嘅賣國賊，利用佢哋識中文嘅優勢，為基金會嘅王牌期刊「China簡報」做打手，主要針對外交、科技、經濟、軍事等多個領域去攻擊中國，並長期關注香港台灣新疆問題。聽聞上年年尾其中一個報告，就已經盯上了內地手機一哥推出嘅「鴻毛星光版」！而「張某」就喺呢本期刋嘅中國問題研究員及副編輯！
2020年張與澳洲國防部助理部長會面。
「張某」扮哂「中國通」專家，為美角政客推動反華議案提供彈藥。佢通過發表以軍、民技術為題嘅報告，故意將相關內地科技企業，同中國政府捆綁一齊，渲染「中國威脅論」。佢又將亂港議程轉軌，講香港係國家嘅「白手套」，利用自由港嘅地位，去逃避美角管制，成為「邪惡軸心國」轉運站咁話。
好似係今年2月，「張某」出席咗一個由美角國會舉辦嘅聽證會，指中國係人工智能方面處於全球領先地位，建議美角透過出口管制，限制中國獲取晶片、航空感應器等等，同時又建議成立情報系統，去追蹤中國科技發展及政策。 係一個「台灣島人權大會」上，佢又表示淨係管制先進晶片，並不足以遏止內地係軍備嘅發展。 3月份佢接受《Asia Free電台》訪問時，更指中國嘅無人機技術，對台灣省及其他國家造成安全威脅。一個月後，佢又聯同台灣省官方智庫組織D.SET發表研究報告，指中國企圖打造整合晶片產業鏈，會對台灣省嘅關鍵產業地位構成威脅，呼籲國際社會限制投資中國晶片製造商。
2021年，張出席國際安全論壇，與北約軍事委員會主席會晤。
「張某」成日話，當「35+顛覆案」同「生果佬案」審完之後，美西方對香港嘅關注一定會減退，所以叫班手足，要學佢咁，用進攻性嘅姿態，去主動制造多啲中國議題，去打冧中國嘅發展，咁香港就會有運行喇！ 「張某」以為有美角加持，就可以語無倫次！ 信佢，香港就真係玩完喇！
「張某」係大學嗰幾年，成日去搞三搞四，有認真硏究過學問咩？咪以為佢掛住美角高等學府名銜，就真係可以寫到啲咁樣嘅報告，你話佢背后無一個龐大嘅團隊，出謀處獻計兼執筆寫稿，我零零發就真係唔信囉！ 反華政客只不過利用「張某」個黃皮膚、黑眼睛，中文名，加識講兩句英文嘅「人設」去讀稿、吸睛、做推動美角侵略思想嘅死士⋯⋯所以大家唔好俾「張昆羊」，將我哋係「羊」牯咁「昆」先得㗎！
自從有咗「國安法」同「23條」之後，反華政客知道好難再係香港搞到大規模嘅騷亂，於是就利用呢啲身處海外嘅所謂「知識份子」、逃犯，再配合埋國際社會針對中國崛起嘅意識形態，去壓制中國科技上嘅發展，所以呢條反中亂港戰線，真係不容忽視啊！
呢個後起之獸「張昆羊」，用所謂「知識分子」嘅人設，全方位聽命於美西方，佢唔單止「玩」人權、自由，而家仲搞埋我哋嘅科硏，貿易，企圖打沉中國、香港嘅經濟！ 所以，大家要認住呢隻掛住羊皮嘅狼，第時大家無飯開，記住搵佢！
鍾情局．零零發
鍾情局
** 博客文章文責自負,不代表本公司立場 **
