回歸以來，香港搞發展阻礙重重，近年難得掃走晒班專門「拉布」嘅牛鬼蛇神，經濟先至見到啲起色，點知偏偏又有個做本土研究嘅組織走出嚟，每次都同香港發展唱反調，雞蛋裡挑骨頭，我零零發今日就同大家介紹吓呢個專拖香港後腿嘅「本港土地研究社」。
講「本港土地研究社」，就不得不提佢地嘅核心人物「層劍清」。心水清嘅讀者應該會記得佢就係當年「土地正X聯盟」、「新界東北發展關注組」嘅成員，呢兩個組織嘅大佬係邊個？咪就係「朱廸廸」囉！「朱廸廸」又係邊個？咪係衰咗「35+顛覆案」坐緊監嗰個囉！ 「層劍清」同「朱廸廸」直頭friend過打band，咩場合都見到佢哋孖住一齊，除咗積極參與唔同嘅「反發展」行動之外，當年「反國教」、「反菜園村清拆」、「保衛皇后碼頭」等等嘅示威行動，十次有九次都一定會見到佢地兩個。
「層劍清」可能知道以前嗰套咁激嘅手法無乜市場，所以就轉型，以文青搞學術嘅方式，嚟經營「本港土地研究社」。個組織名聽落好似好正面，同研究、社區規劃、發展有關咁，但其實就正正相反，佢地成日借住市民對大自然嘅關愛，向唔同嘅「媒體」、「居民權益」、「政治」組織去借題發揮，打住環保旗號嚟混淆視聽。睇番啲舊聞，「本港土地硏究社」喺2019 黑暴期間，就同個班「反國教」、「雨傘運動」餘孽搞嘅「香港眾志」，去咗英國做所謂「香港前途硏究計劃」；而「層劍清」同「黃痴瘋」更被視為香港「社運新星」，一齊接受《NY時報》訪問。話時話，「黃痴瘋」最近俾國安處拉咗「勾結外國勢力」，唔知仲會拉幾多黨羽呢？
「本港土地研究社」最拿手嘅就係「反發展」，你話發展郊野地方，佢就即刻彈出嚟話候鳥會偏離航道、魚塘啲魚會冇晒；重建舊樓，佢又話要保留啲乜乜記憶，唔可以拆；搞生態旅遊，轉頭又話你其實係想起私樓發展，基本上係見縫插針，有位就入，永遠都係企喺道德高地，將自己立於不敗之地。講真吖，呢廿幾年嚟，借環境保育為名，都窒礙咗好多發展！ 好似當年佢哋反高鐵、反港珠澳大橋、反機場三跑，都唔知浪費咗幾多錢同機會？ 淨係港珠澳大橋，都最少拖延咗9個月，建築成本多咗差唔多成90億啦！ 而家高鐵班班爆滿、港珠澳大橋成日排晒長龍、三跑又加強咗機場嘅流量，令到旅遊、經濟、民生全部受惠。你想睇吓身邊有邊個無用過呢啲基建，我諗你都未必搵到。如果當年聽咗佢地支笛，今日大家出行外遊，邊會有依家咁便捷同咁多選擇呀！
除咗反發展，「本港土地研究社」最出位嘅，莫過於2015年搞咗間「香港人民學院」，以「興趣班」名義，提供各類專上學院形式嘅課程，平均每個課程收25個學員，位位收幾佰。後來教育局出警告信，話佢哋違反《教育條例》，屬於無牌辦學。點知呢位「層生」就無限上綱，話教育局打壓佢哋，因為「興趣班」唔使申請辦學牌照喎！ 咦，又話「層生」做嘅研究好高水示平嘅，點解一條咁簡單嘅《教育條例》都唔識解讀？ 抑或佢只係斷章取義？如果係咁，「層生」個啲研究報告，會唔會都淨係得一啲佢想大家知嘅嘢？！ 咁大家會唔會被誤導㗎？
我零零發對呢件事都好好奇，於是向行內人請教。高人話，做學校註冊，要通過消防同埋教育條例嘅規範，當年成本都起碼要成50、60萬，所以佢哋咪走精面唔註冊囉。哦，原來又係「錢作怪」！ 另外，係註冊之後，會受到教育局規管，可能唔方便佢哋「做嘢」！高人仲話，所謂「辦學」，實情係打住教育旗號，向市民灌輸「反政府」思想，利用呢啲所謂「課程」收「靚」，為日後嘅「計劃」鋪路。
最近，「本港土地研究社」喺網上嗌無錢，成日叫人訂閱。不過，佢地租緊嘅單位，每個月都要至少五5至6萬蚊租金，再加埋啲「研究員」嘅人工、水電煤等等嘅雜費，一年至少要用成200萬去維持運作。最吊詭係，佢哋仲可以做研究、出報告，甚至有時免費派發刊物。又話窮，咁點解一個所謂「民間組織」會有咁多資源？啲錢係邊度嚟㗎？
不過，我零零發聽聞自從海外條鹹水喉閂咗，亂港金主唔係坐監就着咗草，所以好多死唔斷氣嘅黃色組織都要週圍撲水。高人話呢啲自稱係民間智庫或者研究機構，而家都開始向一啲慈善基金埋手攞經費。好似呢個「本港土地研究社」，而家都唔單止做環保嘅題目，佢哋將一啲社會專題，包裝為正統嘅社會政策研究；高人仲話，「層生」好似想趁「鍾氏民調」摺埋，乘機搶埋佢哋呢瓣民調嚟做喎……佢哋透過地區發展、社會民生議題，政府施政嘅研究，去拉攏社會上中立人士嘅支持，提升佢哋嘅影響力同名氣，然後公然去爭取慈善組織嘅金錢援助。表面上佢哋會迴避一啲國家安全、政治嘅議題，但實際上，佢哋個啲研究報告，往往都隱藏好多負面資訊，伺機抹黑政府嘅管治。
可惜有啲電視台、電台，甚至連社福機構都走去同呢啲組織合作，請佢哋出鏡扮專家、搞活動開講座，仲幫手宣傳佢哋啲「研究」…… 唉，大家分分鐘自己做咗亂港幫兇都唔知，又或者你哋熱心公益嘅捐款，會被利用作為反中亂港嘅資金！
其實，如果真係關心環保，想令香港發展得嚟又宜居宜旅，解決城市發展同氣候變化嘅矛盾，就應該著眼喺碳排放。你睇下國際社會，個個都話要碳中和、推動綠色能源，大家都知減排先至係大方向。香港如果仲係圍繞住啲小話題內耗，唔積極諗吓點樣減排、推動創科、提升城市競爭力，到頭來輸蝕都係自己。與其成日用小事拖住發展，不如將資源、精力擺返去真正對社會有貢獻、對環境有長遠增值嘅地方，先係大家要認真討論嘅重點！
鍾情局．零零發
鍾情局
** 博客文章文責自負,不代表本公司立場 **
12月2日，保安局局長根據《維護國家安全條例》將「香港議會」，同另一顛覆組織「香港民主建國聯盟」(「建國聯」) 列為「受禁組織」，禁止佢哋喺香港運作。任何人以受禁組織幹事或成員身份行事、參與組織活動或集會、煽惑他人成為組織成員、提供任何形式援助、或牟取會費或援助等，即屬犯法，最高刑罰為罰款100萬元及監禁14年。睇返資料，呢兩個海外顛覆組織19名核心成員，已被香港特區政府懸紅通緝，並刊憲列為「指明潛逃者」。
我零零發之前都有提過「香港議會」，係由國安通緝犯「袁X夷」、「何X懋」同「龔X夏」，喺2022年7月於海外成立嘅反中亂港組織。「袁X夷」喺黑暴期間，一早投靠西方國家，鋪定路吸金，據聞佢孖住美角前國務卿搞一場反中亂港講座，袋咗成100萬美金；另外又公然拍片要求「侵侵」制裁中國。2019年黑暴平息後，「袁X夷」知道已經無空間喺香港，繼續佢嘅反中亂港圖謀，所以就諗到喺海外成立所謂「香港議會」呢條「屎橋」，喺海外聚集一班黃人手足，延續抗爭情緒，繼續宣揚反中、顛覆國家政權嘅思想，企圖將反華意識形態持續倒灌返香港。
「袁X夷」成立「香港議會」之初，已經開宗明義要推動「自決」，又制定「香港憲法」同發表所謂《自由香港宣言》，揚言要「滅共」，目的好明顯係想用非法手段，去推翻國家政權同破壞國家憲法。佢亦搞咗個所謂選舉，聲稱要選啲「議員」代表香港人，但呢個選舉明顯係鬧劇一場，完全無代表性。「袁X夷」由2022年提出會搞選舉，但因無人參選及技術問題一拖再拖，到2025年5月先勉強搵到19個「候選人」去爭15個議席。後來其中5個「當選人」怕繼續參與所謂「議會」會犯法，於是急急跳船，剩返10個人宣誓就任。呢班所謂「議員」不但毫無議政經驗，而且個個都騎騎呢呢、骨格精奇，講個名、俾埋幅大頭相你睇，都唔會知道係乜水。
「香港議會」呢班國安通緝犯，除咗不斷喺網上搞直播講廢話、唱衰中國同香港特區政府之外，仲成日「鬼打鬼」。其中一個匿喺澳洲嘅當選人「黃X和」，近日拍咗幾條片，唱大檔話「香港議會」班人唔做嘢兼無能、運作不透明、搞小圈子。 「黃X和」話自己因為加入「香港議會」而被通緝感到不值，覺得被拖累。不過大家都咪咁天真信佢(哋)，好明顯成班人都只係利用所謂「香港議會」平台，拎政治名氣，呃金主泵水，氹黃人科水支持佢哋咋!！
其實，早前有位19歲女生，因為幫「香港議會」拍攝宣傳影片，煽動他人參與非法選舉而做咗炮灰被拘捕，最終判囚一年。喺求情時，佢提到跟咗前男友「香港議會」成員「林X淦」潛逃至楓葉角生活，但去到無人無物，又唔識英文，要靠向家人借錢渡日都不特止，「林X淦」更以佢名義向友人借取巨款，搞到佢負債纍纍，所以唯有返嚟香港，點知又被「林X淦」唆擺，為「香港議會」助選拍攝影片招至刑責。最慘係當佢被捕之後，一班「香港議會」骨幹成員以及「林X淦」都從未為佢發聲，好明顯，由始至終，佢哋都只係當個女生係一件「工具」。
「香港議會」害人害物嘅例子又點止咁少吖！「香港議會」另一著草骨幹，假牧師「姜X偉」，早前肆意抹黑香港立法會選舉，更喺網上煽動他人投白票或者唔投票而觸犯《選舉條例》。佢被廉政公署通緝係咎由自取，不過就「關照」咗轉載佢帖文嘅網民被人拉咗，「姜X偉」名符其實係「叫人衝、自己鬆」，真係害人不淺。
其實呢個「姜X偉」黑暴走咗去台灣之後，係2024年11月成立咗一個「港獨」組織，叫做「香港民主建國聯盟」(「建國聯」)，當中6名成員同時都係「香港議會」嘅成員，所以兩個組織嘅關係可謂千絲萬縷。
翻查資料，「建國聯」以推動「香港獨立」及「香港議會」為宗旨，聲言要制定所謂「香港憲法」、創立臨時國旗國歌、建立軍事力量，並計劃培訓海外港人「重返香港」從事顛覆活動。呢個組織喺今年年頭，更曾經喺台北舉行「快閃升黑旗」活動，期間更加踐踏國旗及區旗、升起「黑洋紫荊旗」、播放有「港獨」意味嘅歌曲，大肆宣揚反中亂港訊息。
「建國聯」自成立以來，於網上大肆鼓吹分裂國家思想，發佈「港獨」帖文向年輕人進行洗腦，煽動佢哋做出違法行為。早前就有4名呢個組織嘅在港成員，受到網上煽動帖文所影響，參與「建國聯」嘅活動，因而涉嫌違反顛覆、分裂國家罪而被捕。當中包括一名犯案時得15歲嘅學生，計下數，呢個同學仔喺2019年黑暴時只得10歲，好難想像一個本應天真瀾漫嘅小朋友，被人荼毒產生極端思想而走上歪路，佢12月15號就因為呢單《串謀分裂國家罪》判刑42個月。大家唔好諗住未夠秤(不足16歲) 犯咗國安法嘅罪行可以警司警誡 ，或者上兒童法庭受審，國安case係冇呢支歌仔唱㗎！而呢班身在境外嘅亂港分子就置身事外，隔岸觀火，不斷喺網上大放厥詞，繼續煽動本地年輕人犯法，為佢地政治圖謀付出代價。
雖然「香港議會」及「建國聯」核心成員已被公開懸紅通緝及列為「指明潛逃者」，但呢班人未有收斂，自恃喺海外就可以肆無忌憚搞亂香港。佢地持續倡議推翻國家政權，又公開呼籲國際社會制裁特區官員，近日更借立法會選舉同宏福苑大火大搞抹黑煽動，可謂無所不用其極咁去危害香港社會安定繁榮。特區政府今次將呢兩個組織列為「受禁組織」，切斷其對香港嘅影響，可謂有絕對必要！
我零零發都唔止一次提醒大家唔好信佢哋講嘅嘢，更加唔好轉載佢哋嘅文章，或者以任何方式支持、參與、資助佢哋搞嘅活動，否則，隨時會成為下一個國安罪犯！
所以大家與其擔心條紅線係邊，不如小心唔好踩到條黃線仲緊要喇！
鍾情局•零零發
