搭飛機最驚遇到咩嘢？

大家坐開飛機都知，係唔准帶利器，槍械彈藥 、武器甚至樽裝汽體等物品上機。做咁多嘢，無非都係要保障乘客同埋機組人員嘅安全。 但係大家可能忽略咗飛行安全最重要嘅元素係飛機師！佢控制晒成架機人嘅性命安全，所以一個機師係咪適合揸飛機，先至係飛行安全重中之重！

2001年嘅911事件，都係因為駕駛艙被恐怖份子騎劫，揸住架飛機好似子彈咁，直撞建築物，引至成3000人罹難。

睇返1997到2015年有5宗空難，基本上都唔關天氣、機件問題，亦唔係班機師嘅技術唔得，似乎係佢哋心理上出現咗狀況，導致人為空難……

1997年12月19日一班從印尼去新加坡嘅航班，飛行期間突然超高速俯衝墜毁，機上104人喪生。美國一份調查報告指出，當時機長拒絕副機長進入駕駛室，並發現機上嘅黑盒、語音、飛行資料記錄器，喺飛機墜毁前可能被人閂咗，調查更發現機長事發前嘅工作表現差劣，並且喺股票市場蝕咗成100萬美元 ，加上冇發現機器故障導致墜機嘅證據，所以認為極有可能係機長蓄意自殺式令飛機墜毁。

1999年10月31日，一班從紐約飛往埃及嘅航班，起飛後由指定飛行高度降至1萬6千英尺，隨後爬升2萬4千英呎，然後又急速下降，墮入大西洋，導致217人罹難。美國調查小組發現當時只有副機長獨自一人在駕駛室，而駕駛室內控制箱引擎又被人閂咗。據了解，副機長之前曾經接受空軍訓練，但受到上司嚴厲訓斥，並且被軍隊除名，估計從而心生怨恨⋯⋯據悉出事當日，該名副機長遇見昔日訓斥佢嘅上司，可能因此令佢失去理智…… 所以調查小組認為副機長存在蓄意自殺行為，並導致空難。

2013年11月29日，一班由莫桑比克飛去安哥拉嘅航班墜毀，導致全機33人死亡。調查指機長改變自動駕駛設定，飛機係3萬8千英呎高空下降到592英呎，隨後更將高度set到低於地面，而錄音記錄顯示副機長係事發時一直被鎖在駕駛室外，所以機長有明確意圖令客機墜毁。

另一宗是更出名的馬航370神秘失蹤意外，2014年3月8號，一個從吉隆坡飛北京嘅航班起飛後失蹤，估計全機237人喪生。資料顯示，飛機爬升到1萬米之後就失去訊號，而根據衛星顯示，飛機喺「失蹤」後，繼續飛行咗6個鐘頭，直至燃料耗盡，相信直墜印度洋(與2015年發現墜機碎片嘅位置嗌吻合)。根據《大西洋月刊》資深記者梳理所有調查報告之後，推測機長可能長期患有抑鬱症，而婚姻破裂以及與異性不當嘅私生活而引至嘅情緒問題，亦可能喺事件嘅關鍵。另外，喺機長家中亦發現了一台精心設計嘅飛行模擬器，記錄顯示佢曾經模擬一條與失事航班實際路徑高度相似嘅航線，並且曾反覆練習去調整行程同燃料，所以並非單純嘅技術練習。因此，呢次空難推斷可能係一個蓄意自殺行動。

2015年3月24日，一班由西班牙飛去德國嘅航班，途經法國南部時墜毁，飛機上一共150人罹難。 調查估計事發前10分鐘，機長一直被鎖於駕駛室外，令到事發時只有副機長負責駕駛，記錄顯示佢一直冇發出過求救信號，又冇回應過地面控制塔人員嘅聯繫；而根據佢就診醫院發出嘅聲明，指佢係2015年3月接受抑鬱症治療之後，曾經建議佢暫停飛行工作，但佢就向航空公司隱瞞患病嘅情況……….

雖然呢幾個案例嘅調查結果仍有爭議性，但都明確提出咗空難有人為因素嘅疑點。個案分別都顯示墜機時，駕駛室入面得一個機師控制曬成架飛機，咁你話機師係咪好重要呢？所以自從2015年嗰單空難之後，世界各地民航當局，迅速實施新規定，要求在飛行的任何時候，一定要有兩名授權人員留喺駕駛艙內，以減低類似意外嘅發生。

呢啲案例令我零零發諗返起，之前有嗰單「35+顛覆國家」案嘅飛機師被告，唔知佢而家點呢？

呢位「飛機豪」， 50歲，已婚，有小朋友。佢2001至2019年係本地龍頭航空公司嘅機師；2016到2020年做過立法會議員；2020年3月開始做兼職飛行導師；跟住又開咗一間茶餐廳，不過2023年9月就執咗。聽聞佢而家仲有飛行員執照。

「飛機豪」2016年嘅時候，就簽署咗《香港前途決議文》，鼓吹推動香港前途自決。2019年黑暴嘅時候，佢多次發表針對警方政府言論，又喺旺角嘅大型衝突之中，阻礙警方執法，於是俾警察拉咗。2020年疫情期間，又支持「醫管局員工陣線」發起嘅罷工，想迫令政府全面封關。同年又參與「非法初選」，於是被控告「顛覆國家政權」罪，佢後來認罪, 判咗4年兩個月，今年４月放咗監。

我零零發翻查過資料，香港所有民航機師，除咗入職個時要做吓心理測驗之外，跟著就好似唔使再做任何心理評估，只要佢哋每年pass個体驗，即係包括心肝脾肺腎、有手有腳嘅檢查，同埋定期通過技術考核，就可以繼續揸飛機。 

「飛機豪」本來好人好姐都叫做「上等人」，但佢過去曾經參與過激烈嘅抗爭行動，又因為違反國安法坐咗4年幾監，與家人、子女長時期分離，佢有冇心理問題、仲有冇極端政治思想就真係冇人知……如果「飛機豪」做番機師，唔該「單聲」，我零零發一定唔會搭呢間航空公司嘅飛機囉！ 另外，佢坐監之前曾經係兼職飛行導師，你知啦，近朱者赤、近墨者黑，佢教出嚟嘅機師，都唔知會點㗎，諗起都有啲擔心！

其實過去幾年有好多違反咗國安法嘅罪犯，都曾經係唔同專業界別嘅人士，如果佢哋坐完監出嚟，為達到政治利益，繼續反中亂港，做出啲極端嘅行為，係會影響到你同我㗎喎！  好似醫生咁，佢嘅行為同醫德，都分分鐘影響住病患嘅健康；所以如果呢班犯咗國安法嘅「專業人士」繼續做做番老本行，都咪話唔得人驚呀！希望各位高人指點下迷津，我哋可以點樣避過呢啲劫數呢？！

鍾情局．零零發

鍾情局

** 博客文章文責自負,不代表本公司立場 **

12月2日，保安局局長根據《維護國家安全條例》將「香港議會」，同另一顛覆組織「香港民主建國聯盟」(「建國聯」) 列為「受禁組織」，禁止佢哋喺香港運作。任何人以受禁組織幹事或成員身份行事、參與組織活動或集會、煽惑他人成為組織成員、提供任何形式援助、或牟取會費或援助等，即屬犯法，最高刑罰為罰款100萬元及監禁14年。睇返資料，呢兩個海外顛覆組織19名核心成員，已被香港特區政府懸紅通緝，並刊憲列為「指明潛逃者」。

我零零發之前都有提過「香港議會」，係由國安通緝犯「袁X夷」、「何X懋」同「龔X夏」，喺2022年7月於海外成立嘅反中亂港組織。「袁X夷」喺黑暴期間，一早投靠西方國家，鋪定路吸金，據聞佢孖住美角前國務卿搞一場反中亂港講座，袋咗成100萬美金；另外又公然拍片要求「侵侵」制裁中國。2019年黑暴平息後，「袁X夷」知道已經無空間喺香港，繼續佢嘅反中亂港圖謀，所以就諗到喺海外成立所謂「香港議會」呢條「屎橋」，喺海外聚集一班黃人手足，延續抗爭情緒，繼續宣揚反中、顛覆國家政權嘅思想，企圖將反華意識形態持續倒灌返香港。

「袁X夷」成立「香港議會」之初，已經開宗明義要推動「自決」，又制定「香港憲法」同發表所謂《自由香港宣言》，揚言要「滅共」，目的好明顯係想用非法手段，去推翻國家政權同破壞國家憲法。佢亦搞咗個所謂選舉，聲稱要選啲「議員」代表香港人，但呢個選舉明顯係鬧劇一場，完全無代表性。「袁X夷」由2022年提出會搞選舉，但因無人參選及技術問題一拖再拖，到2025年5月先勉強搵到19個「候選人」去爭15個議席。後來其中5個「當選人」怕繼續參與所謂「議會」會犯法，於是急急跳船，剩返10個人宣誓就任。呢班所謂「議員」不但毫無議政經驗，而且個個都騎騎呢呢、骨格精奇，講個名、俾埋幅大頭相你睇，都唔會知道係乜水。

「香港議會」呢班國安通緝犯，除咗不斷喺網上搞直播講廢話、唱衰中國同香港特區政府之外，仲成日「鬼打鬼」。其中一個匿喺澳洲嘅當選人「黃X和」，近日拍咗幾條片，唱大檔話「香港議會」班人唔做嘢兼無能、運作不透明、搞小圈子。 「黃X和」話自己因為加入「香港議會」而被通緝感到不值，覺得被拖累。不過大家都咪咁天真信佢(哋)，好明顯成班人都只係利用所謂「香港議會」平台，拎政治名氣，呃金主泵水，氹黃人科水支持佢哋咋!！

其實，早前有位19歲女生，因為幫「香港議會」拍攝宣傳影片，煽動他人參與非法選舉而做咗炮灰被拘捕，最終判囚一年。喺求情時，佢提到跟咗前男友「香港議會」成員「林X淦」潛逃至楓葉角生活，但去到無人無物，又唔識英文，要靠向家人借錢渡日都不特止，「林X淦」更以佢名義向友人借取巨款，搞到佢負債纍纍，所以唯有返嚟香港，點知又被「林X淦」唆擺，為「香港議會」助選拍攝影片招至刑責。最慘係當佢被捕之後，一班「香港議會」骨幹成員以及「林X淦」都從未為佢發聲，好明顯，由始至終，佢哋都只係當個女生係一件「工具」。

「香港議會」害人害物嘅例子又點止咁少吖！「香港議會」另一著草骨幹，假牧師「姜X偉」，早前肆意抹黑香港立法會選舉，更喺網上煽動他人投白票或者唔投票而觸犯《選舉條例》。佢被廉政公署通緝係咎由自取，不過就「關照」咗轉載佢帖文嘅網民被人拉咗，「姜X偉」名符其實係「叫人衝、自己鬆」，真係害人不淺。

其實呢個「姜X偉」黑暴走咗去台灣之後，係2024年11月成立咗一個「港獨」組織，叫做「香港民主建國聯盟」(「建國聯」)，當中6名成員同時都係「香港議會」嘅成員，所以兩個組織嘅關係可謂千絲萬縷。

翻查資料，「建國聯」以推動「香港獨立」及「香港議會」為宗旨，聲言要制定所謂「香港憲法」、創立臨時國旗國歌、建立軍事力量，並計劃培訓海外港人「重返香港」從事顛覆活動。呢個組織喺今年年頭，更曾經喺台北舉行「快閃升黑旗」活動，期間更加踐踏國旗及區旗、升起「黑洋紫荊旗」、播放有「港獨」意味嘅歌曲，大肆宣揚反中亂港訊息。

「建國聯」自成立以來，於網上大肆鼓吹分裂國家思想，發佈「港獨」帖文向年輕人進行洗腦，煽動佢哋做出違法行為。早前就有4名呢個組織嘅在港成員，受到網上煽動帖文所影響，參與「建國聯」嘅活動，因而涉嫌違反顛覆、分裂國家罪而被捕。當中包括一名犯案時得15歲嘅學生，計下數，呢個同學仔喺2019年黑暴時只得10歲，好難想像一個本應天真瀾漫嘅小朋友，被人荼毒產生極端思想而走上歪路，佢12月15號就因為呢單《串謀分裂國家罪》判刑42個月。大家唔好諗住未夠秤(不足16歲) 犯咗國安法嘅罪行可以警司警誡 ，或者上兒童法庭受審，國安case係冇呢支歌仔唱㗎！而呢班身在境外嘅亂港分子就置身事外，隔岸觀火，不斷喺網上大放厥詞，繼續煽動本地年輕人犯法，為佢地政治圖謀付出代價。
雖然「香港議會」及「建國聯」核心成員已被公開懸紅通緝及列為「指明潛逃者」，但呢班人未有收斂，自恃喺海外就可以肆無忌憚搞亂香港。佢地持續倡議推翻國家政權，又公開呼籲國際社會制裁特區官員，近日更借立法會選舉同宏福苑大火大搞抹黑煽動，可謂無所不用其極咁去危害香港社會安定繁榮。特區政府今次將呢兩個組織列為「受禁組織」，切斷其對香港嘅影響，可謂有絕對必要！

我零零發都唔止一次提醒大家唔好信佢哋講嘅嘢，更加唔好轉載佢哋嘅文章，或者以任何方式支持、參與、資助佢哋搞嘅活動，否則，隨時會成為下一個國安罪犯！

所以大家與其擔心條紅線係邊，不如小心唔好踩到條黃線仲緊要喇！

鍾情局•零零發