喺回歸後到黑暴呢段期間，香港嘅政治圈亂象叢生，基建、民生樣樣議題都拖住晒郁唔到……
我零零發覺得，早期可能真係有啲有識之士，出來從政，想為社會帶來改變，但佢哋啲熱情，正正被美西方政府同政客利用，培育咗好多新晉反對勢力，而係呢個過程之中，造就咗好多機會俾人混水摸漁，撈政治油水。呢班人好多都唔係有意服務社會，佢哋不但無經驗、無歷練、有啲連字都唔識多個；不過佢哋一旦得到美西方或者個別組織加持，就可以即刻彈起上位，隨之而來嘅就係，有錢，有前途，有身份，有地位，有權力，仲可以無端端做埋區議員、立法會議員，接近政府權力中心，影響施政，不過佢哋唔係為香港建設，而係搞破壞。佢哋係議事廳大聲吵駡吓、瞓吓地、搶吓人嘢，咁就過一日，最辛苦都只係每個星期六、日，要拉住banner 係維園出發遊行，見到警察要推撞下，然後收工去飲啤酒，咁筍嘅「工」，去邊度搵？
所以，用我零零發嘅視角，去睇番嗰班參與「35 +顛覆國家政權案」嘅被告，除咗邪惡軸心戴妖之流，一開始就密謀打垮香港政府之外，其他好多個被告，都係撈政治油水嘅機會主義者，諗住跟大佬無蝕底，可以食大茶飯、威威食雞，盲舂舂跟埋人去癲，點知今次玩大咗！
不過「35+顛覆案」被判監嘅被告，今年4月陸續刑滿出獄，唔同人選擇唔同嘅方式，去繼續佢哋放監後嘅生活，但其中一個釋囚，岑X杰，選擇繼續喺媒體高調現身。
「他」今年38歲，讀完中七，就去做議員助理，不過冇耐就話份工唔適合，於是加入「民陣」、「Rainbow」等組織，所以由2008年「七一大遊行」、「佔中運動」，到「黑暴」，所有大型遊行示威，都有「他」的身影，實行全方位搞事。
喺2019年6月，佢同其他「犯民」煽動市民罷市、罷課同包圍立法會，逼當時特首撤回「逃犯修訂條例」，又叫特首落台，譴責警方暴力鎮壓等等。2020年新冠疫情，「他」多次支持醫護罷工，又反對政府設隔離中心。總之，樣樣都有佢份，唯恐天下不亂。
喺香港國安法訂立後無耐，「他」周圍同人講話比人跟蹤，又懷疑係內地國安咁話，但從來冇拎出任何証據，或者報警。有退隱江湖嘅「前犯民大佬」話，佢咁講無非都係想提升自己係「犯民」嘅地位，扮大哥！皇天不負黃心人，喺2020年尾，佢參加咗非法初選，終於可以同好多「犯民老鬼」平起平坐，一齊喺2021年6月被捕，並且成為訂立國安法之後，第一批被控「顛覆國家政權罪」嘅被告。出事之後，佢眼見咁多個老鬼都認罪，於是都嗱嗱聲認罪，所以佢只係判咗4年3個月，喺今年5月30號就放咗監。
「前犯民大佬」話，「他」出獄之後做嘅嘢，「騷」味甚濃！首先，佢一出獄之後6小時就去咗瀝源村，話曾經係沙田區區議員，要去履行「未完成的責任」喎，例如，睇下部升降機起好未、夜市上落貨既情況等等，一副關心社區嘅模樣，「前犯民大佬」話，佢只係想藉著舊議題，刷存在感，只係自我包裝嘅一場表演！
跟住，「他」又接受唔同媒體訪問：「我係一個極度困苦的環境走出來，我也很想自己不要忘記仍然在困逆當中的人，仍有很多人在受苦⋯⋯」。又話: 「我覺得要開始履行一個公眾人物的責任，去做可能在容許的情況下、去講應該容許講的說話...... 」。但之後佢又話驚、又話唔知咩講得，咩唔講得，講到香港好似好恐佈，冇曬言論自由咁！ 不過佢最老實係形容自己: 「有政棍的人格，(意思係)一個政治人是很在意自己的每一個言行表現、穿什麼衣服、每一件事都是在表達一件事」。不過去到尾，佢都露咗底:「住緊百多呎嘅劏房，又細又亂……不急於搵工，因為未太了解自己想做什麼，可以做什麼，俾啲時間成個社會，適合我去邊個位，咁我咪去邊個位囉…..可以去洗碗，掃地，我沒有很擔心工作，因為......如果真的不行，那就去攞綜援……」。
「前犯民大佬」話，「他」出獄後的言行，同佢形容自己係「政棍」一樣，睇得出係充滿機心。我零零發就認為，「他」試圖以受害者姿態，去掩飾犯法嘅真相，以悲情去掩飾違法責任。倒帶睇番2020年，「他」因為參與非法初選，去意圖癱瘓政府運作而被告上法庭，再經過嚴謹嘅司法程序先至被定罪。喺法治社會，違法就必定會被追究，絕對唔係無辜，同「政治逼害」亦都完全扯不上關係！「他」的「受苦論」，只不過係扭曲現實，搏大家同情，但「他」從來無反思自己做錯嘅事！
「前犯民大佬」話，別小看了「他」的手段，佢除咗沉醉於過往嘅光環，仲巧妙地將自己包裝成敢於發聲嘅弱者，就喺外界揣測佢打算做咩嘅時候，佢已經悄無聲息完成咗佈局。咁佢玩呢啲小把戲為乜，「前犯民大佬」一語道破，「他」日後以什麼為生呢？所以「他」是真正的迷失，抑或是刻意作此表達，藉住「高調示弱」，去尋找「新契機」？
今時唔同往日呀，我零零發希望「他」真係可以停一停，諗一諗，係咪仲唔捨得個光環？係咪仲想行返以前條路？ 不過如果佢真係咁而再「衰」咗，都可能係件好事，因為佢咁様做，就可以完美示範俾其他出獄嘅「35+顛覆案」犯人同國安罪犯睇，「死人尋舊路」有乜嘢後果！
鍾情局‧零零發
鍾情局
** 博客文章文責自負,不代表本公司立場 **
話說前立法會議員「陳師奶」，喺2021年靜靜雞去台灣島，自稱入廚只得3年，就開咗間私房菜，最近仲攞埋個美食獎，好似好叻叻咁！不過大師傅「頂爺」講過，烹飪係一門學問，係要經驗累積嘅，所以我零零發覺得「陳師奶」可能連把刀都未真正舞得掂……不過都唔使太認真，講白啲，如果佢唔係有呢個「黃政棍」嘅人設，台灣島又點會捧佢上天呢？大家就當連續劇咁睇吓就得㗎啦！
咁「陳師奶」究竟點樣從大律師、「尊貴」嘅立法會議員淪落到要敗走，喺台灣島揸鑊鏟搵食呢？
「陳師奶」喺香港出生，日日都發明星夢，喺1992年，21歲未夠，大學都未讀完，就走去參加「香江小姐」選舉，希望一夜成名。 但以佢嘅「美貌與智慧」，同埋據佢自己講當年130磅嘅師奶look，又點會跑出呢？咁佢之後唯有柄埋，寄情讀law，做住假髮大狀先。但愛出鋒頭同強烈表演慾嘅DNA，係從來都冇離開過佢，於是喺2003年，佢就參與政治舞台劇演出，亦都因為咁，而認識咗行家「白頭李」、余x薇等人。「陳師奶」咁鍾意出風頭，咁鍾意做「偽人」，絕對啱晒係政治圈混水摸魚，於是呢兩個老油條就招攬呢個「舞台舊人、政治新丁」加入咗工民黨，從此就踏上政棍呢條不歸路。
初初入政圈時，「陳師奶」自知冇乜料到，所以扮晒乖巧，日日以老成行政look示人，於是呃咗個山頂區區議員嚟做，2008年又同余x薇行孖beat，當選立法會議員。但好景不常，2011年佢不但連任區議員失敗，第二年連立法會選舉都輸埋，變咗雙失議員。為咗突圍，於是把心一橫，將一頭長髮剪短，染埋綠色，化行妝， 丟晒啲「老西」，換上奇裝異服去扮年青搶眼球，再搏一鋪！
呢個全新形象，成功幫「陳師奶」搶fo，喺2016年得以重返立法會，不過佢做立法會議員嗰幾年又無咩建樹，仲比媒體爆出佢喺「議會缺席王」排名，高居第二位，缺席率高達兩成，白支議員高薪，浪費公帑。而過咗冇耐，佢又因為「佔中」期間，與邵x臻等人煽惑他人作出公眾妨擾而被控，經審判後喺2019年被裁定有罪。喺呢一個「生死存亡」嘅時刻，佢嘅「偽人」本色即刻上身，滿面病容話個腦部生咗個腫瘤，要切除同接受放射性治療，希望法庭輕判。結果佢被判監8個月但緩刑兩年，成功過關，而邵x臻就要坐足8個月。
係開腦切除腫瘤呢個大手術之後，「陳師奶」奇蹟地神速復原，仲喺2020年4月新冠肺炎爆發期間，被媒體影到佢違反「限聚令」，去咗深水埗一間酒吧吃喝玩樂。當時酒吧擠滿人，氣氛非常熱鬧，但「陳師奶」竟然砌詞話係以立法會議員身份，同酒吧業界開會咁話，佢更聲稱酒吧係落半閘閂咗門喎。不愧係「偽人」，講大話真係唔眨眼！之不過後來有網民篤爆，話酒吧嗰晚喺偷偷地開門做生意，而「陳師奶」就劈酒劈到12點幾，腳步浮浮、醉醉地咁離開。「陳師奶」之後都有被傳票控告，但係又俾佢走得甩。
呢幾單嘢之後，「陳師奶」知道誠信破產，基本上無辦法參選下一屆立法會選舉，好難再喺政壇呃到飯食，所以喺2020年9月立法會會期完之前，佢就話因個人健康同家庭理由，正式退出政壇，係記者會上更哽咽，講到自己經歷生死邊緣，又話愧對母親，所以趁健康，陪多啲老人家等等，又寄語各位手足要繼續支持所謂「民主運動」同「黃色經濟圈」……而家睇返轉頭，原來係鋪定條後路比自己！
雖然過咗緩刑期兩年，呢個唔知仲做過咩嘅「陳師奶」係《國安法》嘅震懾力之下，就狠心拋低「相依為命」嘅年邁母親，神神秘秘咁竄走咗去台灣島。有用時就攞阿媽出嚟扮孝順女，冇用嘅時候，就嫌舵手掕腳丟低個老人家，不過佢咁嘅表現，都係一貫反中亂港份子「自己鬆」嘅做法。我零零發以為佢走咗佬，就唔諗住返香港，不過線人話「陳師奶」臨走前，特登喺一間大律師行掛名，似乎想留條後路俾自己。其實「陳師奶」身為一個律師，被判「煽動他人犯法」罪成，大律師公會係咪要慎重考慮吊銷佢嘅專業資格呢！
去到台灣島，為咗賺盡「黃色經濟圈」嘅錢，「陳師奶」於是就用佢嘅政治人設，以「延續服務他人，回饋社會嘅初心」做噱頭，學人開設私房菜餐廳，仲以天價每位成千蚊港紙嘅價錢，俾啲幾餸飯人食，食水深到呢！聽聞「教怯」餘孽葉x源、「黃偽人」杜x澤都幫襯過。而開張頭幾個月，的確生意唔錯，而且仲攞咗個台灣島美食獎，所以「黃氣」急升，豬籠入水！一個之前喺香港淨係識得用微波爐叮嘢食，從來冇煮過餸嘅人，真係三年就可以變廚神？ 咪玩喇！！！ 不過又係唔使咁認真喎，「生果佬」都可以提名「落背耳」和平獎，盲字都唔識多個嘅人，都可以入讀英美最高學府，只要你係黃人，有咩係唔得㗎？！
不過「陳師奶」都知自己斤兩有限，所以餐廳攞獎之後，就高調接受媒體訪問，大灑溫情牌，話好多謝台灣島嘅照顧，又話期待一班坐緊監嘅「貴賓手足」，可以日後嚟享用一場如在家中嘅盛宴，回味過去嘅溫情、家嘅感覺咁話喎……(即係四餸一湯，白飯任裝嗰類嘅住家飯，唔好諗住有鮑參翅肚或者花巧嘢食囉！) 如果「陳師奶」真係咁有心，不如拎賺賺埋埋嘅錢，煮啲兩餸飯派俾「手足」仲好喇！「偽人」即係「偽人」，咁七情上面、打冷震嘅對白，係佢先嗡得出囉！
「陳師奶」已經年過半百，唔知係「黃色經濟圈」揸鑊鏟搵食嘅「美夢」可以發到幾時呢？「黃色經濟圈」喺香港已經衰到貼地，而「黃友們」多數只會口講支持，唔知呢種俾面嘅衝動消費，又可以維持幾耐？
鍾情局●零零發
