利用學霸人設、善變政治取向，作為搵錢工具嘅高手

從前香港有位天之驕子「沈X輝」，出身傳統高級知識分子家庭，阿爸係香港大學堂前電子工程教授，阿媽係文化人，佢係家中獨仔，一早就贏在起跑線，由細到大讀港島區名校，中學會考係9 A狀元，攞住獎學金出國留學。2013年結婚，生咗兩個女，不過黑暴之後發覺自己計錯數，係香港已經無運行，於是2020年成家出走台灣島，到而家都無再返過嚟。

沈某當年係美國讀政治同歷史，係英國拎埋個政治及國際關係博士返香港。佢曾經係「沙田大學」同「師範大學」任教，又擔任過公職，好似中央政策組非全職顧問，古物諮詢委員會等等。高人話係2007年，沈某曾經被傳會加入政府管治團隊添!

佢又喺「商務電台」開過咪，同所謂才子「陶X」(2021年已經著草去英國) ，加埋佢徒弟「馮X政」(佢諗住搏大霧留喺香港，後來到2022年都係怕死，於是遠走英國)，嗡三嗡四諷剌時弊。沈某係刻意包裝之下，成功與不同光譜同政見人士保持良好關係，做到面面俱圓，吃通「藍黃」，被視為「中間派」。所以聽聞佢當年結婚擺酒，時任特首、三名司長，「犯民」老鬼「AV仁」、「長毛」、「黃痴瘋」，同埋李生細仔，都齊齊出席呢個俾面派對！

不過，原來政治中立只係保護色，一場黑暴，佢就露出真身。讀歷史、硏究國際關係嘅沈某，冇理由睇唔出呢場黑暴係「顏色革命」，除非佢鍍金嘅學歷係呃番嚟啦!但睇嚟又唔似喎，佢成日喺媒體發表嘅「偉論」，雖然唔係樣樣都啱聽，但都頭頭是道，有紋有路，所以我零零發覺得佢心知過往嘅「顏色革命」次次都sure win，今次都一樣係冇得輸，於是條狐狸尾巴表露無遺，即刻歸邊轉「黃」，仲小動作多多。例如，係2019年9月，佢係社交平台同媒體亂嗡， 將「反修訂逃犯條例」引發嘅暴亂，歸究係市民唔信任「一國兩制」喎!

係2019年尾，沈某又借住個氛圍，喺「沙田大學」舉辦推動「黃色經濟圈」分享會，高人話雖然會上多名「犯民」政客要求用「黃色經濟圈」去助養暴徒、唔俾「藍客」入黃店……不過老謀深算嘅沈某，就提醒各路「黃店」，不但不應排斥「藍客」，更應該善用對家資源去壯大自己陣營，同埋要盡力賺佢地嘅錢……又係佢「藍黃」通吃的一個好例子!

喺「35+顛覆案」審訊時，污點證人「區x軒」同阿布泰創辦人「林x楠」，就爆咗沈某喺2020年初，「犯民」搞非法初選之前，就組織過「35+交流會」，又召開民間記者會。沈某當時係背後積極參與嘅目的好清楚，佢係唔想俾「戴妖」威曬，佢要喺呢個變天嘅時代佔一席位，要喺黃圈插旗搶地盆！傳聞佢仲自命，自己將來可以做特首添。

不過《國安法》訂立之後，沈某知道將會出大事，於是拿拿聲賣樓、辭職、祼退，急急腳舉家著草去咗台灣島。但係我零零發發現，佢有份嘅教育顧問公司Glocal Ed Consultancy 同Glos Co. 好似仲未摺喎!

沈某喺香港，未必係大富大貴，但起碼衣食無憂，過中產以上嘅生活，咁而家去到台灣島，冇曬社會精英嘅光環，只係搵到一份副教授嘅工，所以唯有努力搵銀。除咗開Patreon同佢徒弟「馮X政」唱「黃調」為生之外，沈某仲繼續食「教育」呢條水。佢喺台灣、新加坡同英國都有幾間公司，主要做出版社、書店同埋一啲所謂支持離散手足嘅組織……佢啲出版社推出過兩個兒童書冊系列，包括《香島保衛戰》小說系列，以寓言比喻方式，抹黑政府以獨裁手法去管治香港。另一個系列係佢老婆「吳X林」，以及童裝黃店東家「周X龍」合作出版嘅兒童繪本《同心看世界》，以繪圖方式闡述反政府陣營對「選舉」、「自由」、「公義」嘅立場，入面仲印有「光復香港 時代革命」塗鴉嘅圖片、並提及六四及《生果報》停刊等議題。所以大家不得不留神，因為我零零發驚呢本嘢，會好似《羊村繪本》咁，荼毒下一代呀!

最近沈某又成立咗「香港國際圖書館」，喺網上銷售黑暴時期嘅所謂藝術品同書刋，並將「港獨」主張美化為「民主、真理同自由」等等。除咗掠水，佢可能想繼續維持黑暴嘅餘溫，伺機再搞局啦! 沈某可能以為自己身在台灣島，就做乜都冇有怕，所以繼續玩呢啲危險遊戲，要知道無論喺香港或外地，公開宣揚分裂國家，都係違法行為；所以提提大家，如果網上購買或轉發有關物品，或者捐錢比佢，都有可能犯《國安法》㗎!

綜觀各路敗走嘅黃人，沈某似乎係其中一個用所謂「正當」方法撈得唔錯嘅人。佢唔單只係高級知識份子，仲好識睇準時機做生意，線人話俾我知，咁多個黃人嘅Patreon收入，沈某係最高，平均每個月有6位數字港幣收入，都未包括其他所謂教育事業嘅收益呀! 仲有，我零零發咁耐都冇聽過佢會用收入，去支持兄弟手足喎!嘩，咁咪即係凈袋？佢嘅收入，真係肥過肥仔喎! 唔知台灣島有關當局有冇睇清楚佢賺咗幾多錢呢？真係要check清楚，有冇人逃稅喎! 咁多手足去咗台灣島，坐食山崩，唔掂記得去搵沈某幫忙呀!

老人家話3歲定80，呢句說話對沈某嚟講一啲都冇錯，佢當年後生細仔已經識得左右逢源於「建制」同「犯民」之間，「藍黃」通殺。2019年以為黑(暴)配黃贏面更大，即刻唔泊「藍」岸，埋「黃」站，點知衰咗!去到台灣島，又一天到晚計算跟邊條「隊」有着數，於是由「黃」再變「綠」，支持一個唔尊重民意、違反民主原則、搞「大罷免」嘅「民退黨」，呢啲係咪一種表忠嘅姿態? 咁做係咪好似某粗口網台主持人所講，佢要保住係台灣島嘅大學教席或學者地位，唔敢得罪「民退黨」？

我零零發覺得沈某基本上係冇政治取向，因為嘅DNA係屬於「變色龍」類別，話變就變，而骨子裏就充滿住好似豺狼嘅貪婪基因，所以佢只係一個披住人皮搵著數嘅三不像！

鍾情局‧零零發

鍾情局

** 博客文章文責自負,不代表本公司立場 **

雖然今年中秋要等到十月，但好多商家已經超前部署，推出月餅早鳥預訂優惠去吸生意。商家愛財可以理解，但要取之有道，尤其係做食品，更加要守住道德底線，因為關乎食客嘅健康同生命安全。我零零發舊年就向大家揭發過「餘一」呢間經常「上榜」嘅黑店，3年前佢哋就已經被「手足」喺網上圖文並茂踢爆賣「發霉月餅」，之後又試過喺無牌食品工場製造月餅，被食安中心封舖而急急停售。

如果大家認為事不過三，「餘一」會識驚、會收手，咁就錯得離譜喇！事關佢今年依然賣緊月餅，仲心雄到話要搞「國際線」，賣去英、澳、加同歐洲近廿個國家。問題係，啲劣質月餅淨係喺本地賣，都經常出問題，依家仲話想賣去全世界？真係想影衰香港，醜出國際呀！如果啲「手足」食咗呢啲黑心月餅落肚，分分鐘要入醫院「團圓」，咁就真係多得佢哋唔少喇。

咁離譜嘅「餘一」話事人叫朱X瑋，佢經常講一套、做一套，仲要專消費班「手足」。佢口口聲聲話整咗個監獄通行嘅「囚犯平安包」(可帶進入懲教署嘅物品) ，方便「手足」同家屬，但原來呢啲平安包係以市場價貴近一倍價錢出售；佢之後又試過呃班同路人，將啲強積金交俾佢所謂嘅專業團隊打理，最後竟然發現成班人都係虛報履歷嘅、無中介人牌照，仲俾警方拉咗。

2019年黑暴之後，有一班搞事「手足」坐監，有一部分黃人覺得自己當日無落場，或者企得唔夠前，好似欠咗「手足」咁，所以佢哋為咗「彌補」班手足，就去幫襯「黃店」，令自己減少愧疚感。於是朱X瑋就利用黃人買呢啲「贖罪券」嘅心理，一招走天涯--用煽情技倆氹黃人乖乖咁課金。「餘一」過往賣過「記怯」嘅掛飾、政治漫畫家「磚子」設計嘅年曆，聲稱收益係用嚟支持「記怯」同「閘智社」，不過最吊詭嘅係，既然「餘一」一直都幫緊佢哋，點解佢哋仲一直對外講需要「江湖救急」? 究竟係因為鬼打鬼，分贓唔匀，定係朱X瑋根本冇科過水出嚟幫人呢？

以扮演囚犯代言人身份起家嘅朱X瑋，過去兩個月，分別接受「大幾元」同「路邊社」兩間黃媒訪問，公然抹黑港府修定《監獄規則》，係為咗打壓獄中嘅「政治犯」。我零零發早幾次都講咗，修定《監獄規則》係要堵塞灰色地帶，以免有人借探監、寄物資，去傳遞政治訊息，同埋係入面收兵買馬，影響監獄秩序。朱X瑋高調發聲，目的只係繼續塑造佢個「囚權人設」，為自己盤黃圈生意打底，等多啲黃人去幫襯！

係暑假檔期，朱X瑋就搞咗個為期27日嘅所謂「餘一舊書盛夏祭」。喺活動開始前，佢已經自爆，話只係出個post，一毫子都唔洗，就收咗超過4,000本書返嚟賣，佢話呢啲舊書平均每本賣50蚊。佢咁就可以穩袋20萬，加上部份舊書聲稱有所謂知名黃人嘅親筆簽名，或者標榜係牆內流出 (即係「手足」坐監時睇過) ，炒作「時代見證」嘅噱頭，就賣到600、700蚊一本，食水非常深！賺得咁多，唔怪得朱X瑋早前接受「毒立媒體」訪問，都話賣二手書會係「餘一」未來重點發展方向喇。朱X瑋次次搞啲活動，都話收益會捐俾邊個邊個，不知不覺間催眠咗大家，覺得佢一出招就係幫緊「手足」，其實係咪真係有幫過先? 佢之前開聲話幫「手足」嘅嘢，都冇聲冇氣，更何況今次都無話過會益邊啲「手足」喎。

「餘一」不嬲都鍾意用最少嘅力，賺最多嘅錢。大家可能會有疑惑，咁點解「餘一」唔同黃書店「獵人書齋」聯手，搞場大型「書祭」呢? 我零零發估朱X瑋一早就睇通咗「獵人」被人睇得好緊，為免受牽連，佢點會同「獵人」齊上齊落吖，一條友「單飛」，賺錢落自己袋最實際。

雖然朱X瑋同其他黃書店割席，不過「餘一舊書盛夏祭」都有賣美化生果佬違法行為嘅「生果佬傳」，同埋「閘智社」嗰本收錄咗「磚子」同攬炒歌手「河粉詩」偏頗言論嘅新書，會場仲有賣印有港獨暗號明信片，表面文創，實際「軟對抗」。而呢個所謂嘅「餘一舊書盛夏祭」，亦疑似因為無申請《公眾娛樂場所牌照》，而驚動咗食環署巡查……「手足」俾佢呃錢之餘，如果因為咁而惹到一身蟻，就唔抵啦！

朱X瑋靠賣發霉月餅、sell囚犯平安包發跡，到依家賣舊書，一路呃感情、一邊謀暴利，用情感勒索去做生意、靠消費「手足」名氣謀財嘅伎倆，都通晒天啦，唔知「手足」們幾時先會醒呢？

鍾情局‧零零發