台灣佔領立法院的學生有草草收場之勢，昨日立法院院長王金平探望學生一番，今日學生乘勢傾撤離，雖然馬總統指揮的國民黨唔太承認同黨的王金平探學生的行為，但表面看好似王院長的「誠意感動了學生」喎。
Ariel同熟悉國際政治的高人講起呢個「誠意論」，俾佢笑我係傻女，問我有無留意美國點睇呀?
Ariel顧得睇李馬丁和陳四萬訪美，又真係無睇美國點樣對台灣變局的表態。幾日前民進黨美女立委蕭美琴向美國發出公開信，話台灣目前面臨民主發展重要關頭，需要更多國際關注，蕭美女此舉意在爭取美國支持學生佔據立法院。
怎料適得其反，美國駐台機構「美國在台協會」理事卜道維隨即撰文回應，直指不論台灣學生霸佔立法院，或是民進黨霸佔立法院發言台，都是非法行為，這些行為如果發生在美國，是不會容許的。他更指民進黨幕後操控這次佔領行動，主要為了在11月底的「七合一」選舉舖路云云。
唔睇真仲以為係大陸的評論。另外美國國務院亞太事務助理國務卿羅素在美國參議院上，亦籲請抗議的台灣學生「負責地運用自由」，並「採取文明與平和的手段」，充分反映了美國對此次學運的不支持態度。
高人話，美國唔一定支持學生運動，支不支持主要看學運針對邊個政府，針對乜事。馬英九政府和美國關係良好，聽話過民進黨，美國無必要支持人推翻佢。更重要是美國支持台灣和大陸搞服貿協議。美國又要玩，同時又要和大陸做生意，佢唔想只靠香港做，想港台雙翼齊飛入大陸。反服貿，No way。台灣學生無美國撐，玩兩玩無晒氣勢就要收場咯。
Ariel
** 博客文章文責自負,不代表本公司立場 **
特首CY今日坐船出海視察港珠澳大橋及香港口岸人工島工程。CY好重視呢個大橋落腳地起的人工島，未來會搞商業發展。
大家若不善忘，應會記得早前機場北商業區塊地起唔起商廈，早前已開過片，羅康瑞代表政府思維的一派想起商廈、商場，機管局主席張建東及管理層唔太同意，最後雖然一人行一步拆掂咗，但唔等如矛盾消失了。
其實機管局管理層一度反對在北商業區起商廈商場，就係怕同機場現有設施有競爭，現時機場第二航站樓比第一航站樓靜好多，聞說前者商舖租金只是後者十分之一，所以附近地方起嘢佢地都唔多鐘意，怕有競爭。而家政府打算在港珠澳大橋落腳地起人工島，大建商廈商場。了解機管局想法人士唔太睇好，也擔心人工島商廈會平租頂爛市，扯低埋機場航站樓的租金。
Ariel就覺得CY要大搞橋頭經濟，大力發展大嶼山作為一個新商業區，其勢難擋，點講都會大力去馬。3幾年後項目陸續落成，初時供應必多，租金難免插水。從政府來說也不一定是壞事，佢地正正係覺得商廈、商舖租金貴影響香港營商環境，所以平啲亦無壞。
兩方面睇的角度不同，意見自然相左。不過未來蘇澤光將會接張建東，做機管局主席，相信佢就會更明白政府的思維，在「積蘇」領導下，機管局可能就不再會對政府在大嶼山的搞作咁多意見了。
