特首CY今日坐船出海視察港珠澳大橋及香港口岸人工島工程。CY好重視呢個大橋落腳地起的人工島，未來會搞商業發展。
大家若不善忘，應會記得早前機場北商業區塊地起唔起商廈，早前已開過片，羅康瑞代表政府思維的一派想起商廈、商場，機管局主席張建東及管理層唔太同意，最後雖然一人行一步拆掂咗，但唔等如矛盾消失了。
其實機管局管理層一度反對在北商業區起商廈商場，就係怕同機場現有設施有競爭，現時機場第二航站樓比第一航站樓靜好多，聞說前者商舖租金只是後者十分之一，所以附近地方起嘢佢地都唔多鐘意，怕有競爭。而家政府打算在港珠澳大橋落腳地起人工島，大建商廈商場。了解機管局想法人士唔太睇好，也擔心人工島商廈會平租頂爛市，扯低埋機場航站樓的租金。
Ariel就覺得CY要大搞橋頭經濟，大力發展大嶼山作為一個新商業區，其勢難擋，點講都會大力去馬。3幾年後項目陸續落成，初時供應必多，租金難免插水。從政府來說也不一定是壞事，佢地正正係覺得商廈、商舖租金貴影響香港營商環境，所以平啲亦無壞。
兩方面睇的角度不同，意見自然相左。不過未來蘇澤光將會接張建東，做機管局主席，相信佢就會更明白政府的思維，在「積蘇」領導下，機管局可能就不再會對政府在大嶼山的搞作咁多意見了。
Ariel
** 博客文章文責自負,不代表本公司立場 **
一朝天子一朝臣，特首CY上台後，搵老友羅康瑞入機管局做董事，一睇就知為接機管局主席張建東個位鋪路。誰知世事如棋，康瑞哥因為機場北商業區地底用途，與機管局主席和管理層嗌晒大交，搞到CY要做和事佬，亦打亂咗搵康瑞哥做主席的部署。結果俾今年九月底卸任嘅貿發局主席蘇澤光，冷手執個熱煎堆，行將接機管局主席，真係「Jack So」晒！
啱啱睇完無記嘅《食為奴》，內容都係講清初嘅八王爭寵。成個局就好似康熙末年咁，大太子無得玩。八阿哥因為聰明醒目，又靚仔又打得，深得老父喜歡，有意傳位俾佢，無奈佢樣樣去盡，鋒芒太露，最終不慎墮馬，俾一向平易近人嘅四阿哥執到寶，坐正做皇帝。Ariel又覺得幾似機管局個局喎。
機管局繼位「慘劇」的成因，主要係康瑞哥挾住CY之威入機管局，想將機場北商業區地底改成商業城，打亂了以現任機管局主席張建東興建第三條跑道的原來部署。據場外人冷靜觀察，雙方的計劃本來唔係唔可以協調，只係「新人太猛，舊人太強」，各不相讓，結局就係不歡而散，而且兩敗俱傷。康瑞哥固然要暫時企埋一邊(又真係唔知過兩年會否翻生)，機管局亦醜聞纏身。機管局行政總裁許漢忠繼早前被指涉嫌修改機場舖位招標計分制度，近日又爆出佢涉嫌暗中協助香港航空攞地做訓練場。正所謂「無鬼唔死得人」，這些醜聞，都係兩派相爭嘅延續篇而已。
機管局打到亂咗籠，CY:只好搵番積蘇「挨義氣」入去做一排，先降降溫。佢九月卸任貿發局主席，隨即走馬上任機管局主席，又係一個可以玩幾年嘅威猛公職，又一次證明佢做人圓滑有「Jack So」。
