一朝天子一朝臣，特首CY上台後，搵老友羅康瑞入機管局做董事，一睇就知為接機管局主席張建東個位鋪路。誰知世事如棋，康瑞哥因為機場北商業區地底用途，與機管局主席和管理層嗌晒大交，搞到CY要做和事佬，亦打亂咗搵康瑞哥做主席的部署。結果俾今年九月底卸任嘅貿發局主席蘇澤光，冷手執個熱煎堆，行將接機管局主席，真係「Jack So」晒！
啱啱睇完無記嘅《食為奴》，內容都係講清初嘅八王爭寵。成個局就好似康熙末年咁，大太子無得玩。八阿哥因為聰明醒目，又靚仔又打得，深得老父喜歡，有意傳位俾佢，無奈佢樣樣去盡，鋒芒太露，最終不慎墮馬，俾一向平易近人嘅四阿哥執到寶，坐正做皇帝。Ariel又覺得幾似機管局個局喎。
機管局繼位「慘劇」的成因，主要係康瑞哥挾住CY之威入機管局，想將機場北商業區地底改成商業城，打亂了以現任機管局主席張建東興建第三條跑道的原來部署。據場外人冷靜觀察，雙方的計劃本來唔係唔可以協調，只係「新人太猛，舊人太強」，各不相讓，結局就係不歡而散，而且兩敗俱傷。康瑞哥固然要暫時企埋一邊(又真係唔知過兩年會否翻生)，機管局亦醜聞纏身。機管局行政總裁許漢忠繼早前被指涉嫌修改機場舖位招標計分制度，近日又爆出佢涉嫌暗中協助香港航空攞地做訓練場。正所謂「無鬼唔死得人」，這些醜聞，都係兩派相爭嘅延續篇而已。
機管局打到亂咗籠，CY:只好搵番積蘇「挨義氣」入去做一排，先降降溫。佢九月卸任貿發局主席，隨即走馬上任機管局主席，又係一個可以玩幾年嘅威猛公職，又一次證明佢做人圓滑有「Jack So」。
Ariel
** 博客文章文責自負,不代表本公司立場 **
泛民搞來搞去搞到部份人上上海，民主黨雖然未定，但估計都會有一兩個人去，不過雖然佢哋口話要求同阿爺單獨見面，實質最關心係點樣離場。
泛民一直唔表態，但社會輿論較多叫他們走上海，向阿爺爭取更好的普選方案，所以最後大部份泛民政黨都係「唔嫁又嫁」，雞雞地都會派啲人去。
不過而家個「趣位」係佢地唔係諗緊向阿爺爭取乜嘢，而係諗緊點樣離場。當中立場最鮮明的是長毛，佢話明去上海要阿爺放異見人士，叫完口號就走，佢唔係想聽大陸意見，只想表達佢自己的意見。呢個亦係長毛在立法會玩嘢的典型方式，無興趣問究竟三個鐘時間見面夠唔夠。長毛勝在定位清淅。
其他泛民就有少少在如何翻枱、何時離場上角力。好似民協基哥，就話如果中央態度不可接受，佢會拉隊離場。我估唔止基哥一個，民主黨都可能有人諗住玩walk out，總之係「走得魔無鼻哥」。
泛民未去已諗住點樣walk out，大家唔使期望成果啦！
