上海行 泛民鬥快離場

泛民搞來搞去搞到部份人上上海，民主黨雖然未定，但估計都會有一兩個人去，不過雖然佢哋口話要求同阿爺單獨見面，實質最關心係點樣離場。

泛民一直唔表態，但社會輿論較多叫他們走上海，向阿爺爭取更好的普選方案，所以最後大部份泛民政黨都係「唔嫁又嫁」，雞雞地都會派啲人去。

不過而家個「趣位」係佢地唔係諗緊向阿爺爭取乜嘢，而係諗緊點樣離場。當中立場最鮮明的是長毛，佢話明去上海要阿爺放異見人士，叫完口號就走，佢唔係想聽大陸意見，只想表達佢自己的意見。呢個亦係長毛在立法會玩嘢的典型方式，無興趣問究竟三個鐘時間見面夠唔夠。長毛勝在定位清淅。

其他泛民就有少少在如何翻枱、何時離場上角力。好似民協基哥，就話如果中央態度不可接受，佢會拉隊離場。我估唔止基哥一個，民主黨都可能有人諗住玩walk out，總之係「走得魔無鼻哥」。

泛民未去已諗住點樣walk out，大家唔使期望成果啦！

Ariel

** 博客文章文責自負,不代表本公司立場 **

中聯辦前宣傳文體部部長郝鐵川，早前靜雞雞離咗職，未有公布去向，唔知係咪郝部長在港期間高調慣咗，走時就太低調太突然，傳聞就愈來愈多。

 

最新傳到涉及貪腐，甚至出賣國有資產咁誇張，有啲人仲被無啦啦傳埋有份㖭。

 

不過，政壇有個傳聞就指郝部長與剛停刊的《新晚報》行得好埋出事，Ariel就知道一件事，當初，夏萍女士在報刊註冊處註冊咗大公報旗下的《新晚報》品牌嚟用，《大公報》事前唔知情，只係有人趁著《大公報》一時忘記每半年要重新攞一份《新晚報》出版物去登記，就攝位登記咗人家個名來用。

 

《大公報》當時曾經諗過打官司，唔俾夏萍用《新晚報》個品牌，只係俾郝部長壓住，《大公報》好無奈地停止追究，可見郝部長幾咁出力，幫人家搞呢份新的《新晚報》喇。

 

有行內人話，《新晚報》呢個品牌本來屬於阿爺的《大公報》，有人未經同意攞咗嚟用，係咪涉嫌佔用國家無形資產呢？結果冇搞好，仲損害埋《新晚報》呢件國家無形資產的價值，咁亂搞真係有問題架！