郝部長突離職傳聞多

中聯辦前宣傳文體部部長郝鐵川，早前靜雞雞離咗職，未有公布去向，唔知係咪郝部長在港期間高調慣咗，走時就太低調太突然，傳聞就愈來愈多。

 

最新傳到涉及貪腐，甚至出賣國有資產咁誇張，有啲人仲被無啦啦傳埋有份㖭。

 

不過，政壇有個傳聞就指郝部長與剛停刊的《新晚報》行得好埋出事，Ariel就知道一件事，當初，夏萍女士在報刊註冊處註冊咗大公報旗下的《新晚報》品牌嚟用，《大公報》事前唔知情，只係有人趁著《大公報》一時忘記每半年要重新攞一份《新晚報》出版物去登記，就攝位登記咗人家個名來用。

 

《大公報》當時曾經諗過打官司，唔俾夏萍用《新晚報》個品牌，只係俾郝部長壓住，《大公報》好無奈地停止追究，可見郝部長幾咁出力，幫人家搞呢份新的《新晚報》喇。

 

有行內人話，《新晚報》呢個品牌本來屬於阿爺的《大公報》，有人未經同意攞咗嚟用，係咪涉嫌佔用國家無形資產呢？結果冇搞好，仲損害埋《新晚報》呢件國家無形資產的價值，咁亂搞真係有問題架！

Ariel

** 博客文章文責自負,不代表本公司立場 **

過埋今日，坐港鐵又要俾多少少錢，因為即日回程九折優惠聽日起就消失。港鐵上星期又預告咗六月會加價，即刻俾人鬧到飛起。

據知港鐵都覺得佢地係眾多公營機構當中的「箭靶」，皆因每日有超過五百萬人次坐港鐵，加上社交網絡發達，服務稍有延誤，訊息就會喺咁傳開，佢哋都要打醒十二分精神做人。講到加價，佢哋而家都諗緊計，睇吓點樣平息民怨，包括利用啲社交網絡。

早前政府開到聲，要港鐵諗計提高載客量，有個方向係引入「晨早乘車優惠」，即係early bird，不過港鐵就話要喺香港行呢套，真係唔容易。

  

佢哋計過數，而家搭程港鐵平均只係七蚊，究竟要俾幾多優惠，先吸引到大家肯瞓少啲，早啲返工呢？

  

如果有九折，即係平均平得七毫子，試問你又會唔會為咗區區七毫子，瞓少一個鐘頭呢？睇嚟都要再諗吓計，點樣先可以做少啲箭靶。