美國國防部長哈格爾，上任以來首次訪華，一落機就跑去睇中國第一艘航空母艦「遼寧艦」，成為呢艘航母第一位接待的外賓，仲係一位「不請自來」的外賓。據聞中國並未提出邀請，美方臨時臨急話要加插呢個「睇航母」行程，客人就快到家門口囉，中國也只好接納。
隨著中國國力增強，要保護各種商業利益，遠航補給能力及遠洋戰鬥力，愈來愈顯得重要，無航母、又無在其他大洲的補給基地的話，中國軍事影響力根本出唔到東海、南海、黃海。1982年，劉華清做緊海軍司令員，已認為航母是戰略中的一環。可惜當時冇水又冇技術，只能望洋興嘆。到2012年「遼寧艦」正式服役，才打破呢個困局，但中國第一艘航母建設的曲折經過、期間引發的連場諜戰，延續了30幾年，關鍵的突破口，緣自前蘇聯解體。
「遼寧號」前身為蘇聯海軍航母「瓦良格號」，係紀念在1905年日俄戰爭中沉沒的瓦良格號裝甲艦。1991年聖誕，蘇聯解體，「瓦良格號」的建造，只完成了68%，其後成為分裂出來的烏克蘭的資產。對當時窮到燶嘅烏克蘭來說，「瓦良格號」可以講係一件燙手山芋，因為要完成剩低的32%工程，要花費2億美元，將她解體嗎？仲貴，預計要2.5億美元！拆散後的廢鋼卻只值500萬美元，對新立國根本無想過要有遠洋影響的烏克蘭來說，是一舊大雞肋。
烏克蘭政府試圖將「瓦良格號」賣俾俄羅斯，但價錢傾唔掂。其後鎖定潛在買家--中國。但美國知道中國想買，馬上提出干涉，講明如果賣俾中國，必須將艦載武器裝備全部拆除；否則，將對烏克蘭採取經濟制裁。
1997年，烏克蘭將艦上所有的機電設備拆除，將之變成一個空殼。然後公佈希望以2000萬美元的價錢，招攬解體「瓦良格號」的公司。從廣州軍區退役的香港創律集團有限公司主席徐增平，提出以創律公司名義購買航空母艦的構想，除了徐增平，法國也有財團想買來做海上酒店，最後徐增平以2000萬美元買了「瓦良格號」。
不過，所謂一波三折，提貨後要經土耳其博斯普魯斯海峽，但土耳其政府禁止「瓦良格號」通過，中國與土耳其足足傾咗年半，並且答應交付10億美元保證金，才將事件擺平。1999年7月，瓦良格號終於拖離黑海造船廠，啟程到中國。
令中國軍方欣喜的並不單係獲呢舊大鐵，而艦上一同拖回來超過30萬張，近20噸重的航母設計圖紙，呢啲先係真正的寶。2002年3月3日，瓦良格號抵達中國大連港，全力建造，並改名「遼寧艦航空母艦」，2011年8月進行首次出海航行試驗，2012年8月進行第十次海試。2012年9月正式服役。
一向視中國為假想敵的美國自然十分關注，國防部長哈格爾今次不請自來，要參觀遼寧艦，擺明係要睇睇中國航母技術究竟去到點樣的水準(或者睇睇中國有無抄到乜嘢美國技術)。相信佢喺艦上搞咗成兩粒鐘，實會帶埋航母專家上船參觀，以美國依家喺全球的超強軍事大國的人材實力，只要實地望望，中國航母實力水平去到邊度，已經掌握得七七八八啦。
不過睇還睇，估計美國應該心目有數，單睇航母實力，美國有現役航空母艦10艘，後備的有兩艘，現役的全部都係核動力航空母艦，最小型的尼米茲號，都有10萬噸級。「遼寧艦」只係常規動力航武，中國的軍事力量與美國比較，差距已經唔係以年計，而係以代計。戰鬥力同技術起碼落後兩、三代，即係有二、三十年的差距。美國唔使擔心啦。
深喉
** 博客文章文責自負,不代表本公司立場 **
