零零發最近同一位十幾廿年無見嘅老best聚舊，佢喺超級大國度過嘅廿年人生，由初初落腳時嘅歧視、委屈、捱世界，到一步一步捱出頭，開埋自己嘅餐館，成家立室，擁有屬於自己嘅大屋同跑車。
佢喺可以享受成果之際，竟然選擇舉家回流香港，因為佢話喺超級大國越嚟越冇安全感，夜晚根本唔敢自己出入，俾人襲擊、老笠，聽落誇張，但喺嗰邊其實係日常。咁樣生活，幾多錢都換唔到個心安。唔似得喺香港，就算凌晨單獨落街拮串魚蛋，同老best喺公園吹水吹天光，都未驚過。
於是我零零發上網做下功課，發現原來香港嘅安全系數真係唔講得笑。根據數據平台Numbeo最新公佈嘅「2025全球安全指數」，香港喺全球排第7位，而超級大國，竟然只係排第91位，真係有啲諷刺。
講真，土生土長嘅香港人，可能真係冇乜留意「安全」呢樣嘢，因為根本未擔心過。但近年呢種安全感的確有啲動搖，尤其係2019年黑暴嗰陣，暴徒四圍搞破壞、縱火、襲擊無辜市民，嗰種混亂場面，相信任何一個正常人，都擔心過自己嘅人身安全。社會而家表面上叫做風平浪靜，但係係咪真係老奉安全？
我同老best講返2020年初嗰單「醫院口岸爆炸案」，香港竟然有人策劃無差別炸彈襲擊，目標包括醫院、港鐵站、屋邨停車場，完全唔理市民死活。好彩警方在千鈞一髮之際，成功阻止，否則後果真係不堪設想。
零零發仔細睇番案情，發現呢個團夥毫無人性，為咗一啲扭曲嘅政治理念，要脅政府、攬炒香港，拎全港市民嘅生命嚟較飛！炸醫院、港鐵、甚至公共屋邨設施，呢啲唔係示威，係恐怖主義。經過差唔多一年審訊，呢單案上個月終於裁定3名主腦「串謀導致爆炸」罪成，下星期就判刑，最高可判20年監禁。
睇番單case，係2020年1月，呢班人喺明愛醫院引爆咗第一個炸彈。爆炸聲響徹急症室，煙霧四散，現場一片混亂，病人、醫護、市民嚇到雞飛狗走。專家分析，現場濃煙含有高溫化學物質，吸入之後輕則感到不適，重則肺部灼傷。呢班狂徒根本係想攞命，想癱瘓醫院運作。
炸完醫院之後，恐襲行動再升級，佢哋就喺羅湖港鐵站落手。要知道羅湖站係連接內地同香港最繁忙嘅陸路交通樞紐，日均人流以萬計。佢哋竟然將「閃粉炸彈」放入列車車廂，好在清潔姐姐眼明手快，發現異樣，即時將炸彈搬離車廂，成功阻止咗呢場災難。「閃粉炸彈」燃燒溫度極高，破壞力驚人，濃煙足足可以籠罩6分鐘。如果真係喺密閉車廂爆炸，分分鐘成車人因窒息或者火燒慘死。
最恐怖嘅係第3單。呢班狂徒狼死到想喺將軍澳街頭引爆一個重達20公斤、偽裝成「祭壇」嘅炸彈，仲特登加入螺絲、鐵釘，打算喺「周同學」悼念活動中，進行無差別屠殺。如果炸彈喺繁忙時段爆，將軍澳分分鐘變成血海。
呢班狂徒計劃極之週詳，租咗兩個市區單位嚟囤積數以噸計嘅危險品。當中包括被稱為「撒旦之母」嘅炸藥，係一種極度唔穩定、輕輕摩擦都會爆嘅高危物質，係全球最致命嘅炸藥之一，連「拉登」都用佢。更加離譜嘅係，佢哋竟然喺單位入面試爆，測試炸藥威力。大家試諗下，如果你屋企隔籬就係咁嘅「火藥庫」加實驗室，狂徒萬一失手，你、屋企人、成棟大廈、甚至整條街都可能炸到變灰。
零零發覺得最令人心寒嘅係，呢啲並唔係電影情節，係真實發生喺香港嘅事，而香港人竟然好似視若無睹。係咪因為2019年大家成日見到汽油彈、火光四起呢啲所謂「大場面」，連炸彈都變得「唔出奇」？定係大家已經麻木到，連生命受威脅都唔夠震撼？
零零發記得2015年，曾經有幾個後生仔喺西貢蠔涌荒廢咗嘅亞視舊廠房整炸彈，呢單新聞轟動一時。呢班後生仔最後分別被裁定「管有炸藥」、「串謀製造炸藥」罪成，判監2年10個月至3年10個月。法官當時講得好清楚，「即使研究或搜尋製造爆炸品嘅資訊，都要受到懲罰，因為用以製造爆炸品嘅原料，都係容易喺日常生活環境中搵到」。當年喺英角，相關嘅最高刑罰更由14年拉高到終身監禁，就係要嚴打呢啲潛在威脅。
但而家呢單案咁嚴重嘅案情，8個狂徒組成嘅恐襲團夥，在陪審團判決中，只有3個人入罪。咁唔通負責運送炸彈、處理爆炸品原材料嗰啲關鍵角色，係「路人甲」？佢哋而家脫罪行返出嚟，分分鐘就住喺你樓上、你隔籬、同你小朋友搭同一部𨋢。大家真係覺得冇問題？真係可以瞓得安心？
呢啲唔係危言聳聽，係現實。大家不妨睇睇國際社會點樣處理同類型案件：2019年，超級大國一名23歲青年計劃炸白宮同自由神像，乜都未買就已經俾FBI拘捕，判監15年。2015年，一名女子只係上網查土製炸彈資料、喺零售店搵材料，未有行動就被捕還押，最終判囚15年。英角亦都有案例：19歲青年網上散播極右翼仇恨影片，鼓吹「光榮殺人」同模仿行兇，雖然未落手，法官都形容佢為「高度危險」，判監11年半。
反觀香港，唔止炸彈已經製成，仲試過爆炸，竟然仲有人可以脫罪。呢種落差，令人不寒而慄！
老best聽完我呻，佢講起超級大國早排有個「90後」侵粉網紅喺大學校園被槍殺，為咗呢一粒子彈、一個受害者，「侵侵」都下令政府為佢下半旗足足四日! 佢問，香港而家咁，係咪病咗？
鍾情局‧零零發
鍾情局
** 博客文章文責自負,不代表本公司立場 **
最近三色台有個真相「猜、情、尋」節目，方丈主持摷番啲陳年懸案出嚟，整合新線索去「重組案情」，用新角度去尋找真相，果然有另一番體會!
好似2019年黑暴，有人話係民間自發嘅反政府運動，又有人話係有外國勢力嘅「顏色革命」，究竟邊樣先真？於是我零零發就學吓方丈主持咁，做個黑暴「猜、情、尋」去尋找真相。
為咗發掘真相，我零零發綜合當年嘅媒體報導、國安案件嘅法庭審訊證供，同埋睇咗兩位「顏色革命」元祖嘅天書:美國人Gene Sharp嘅The Method of Nonviolent Action，(講述推動大型「非暴力抗爭」嘅策略) ，以及Robert Helvey嘅 On Strategic Nonviolent Conflict : Thinking About the Fundamentals(成功推翻政權就必定要利用社會支柱，例如：媒體、警察、青少年、宗教同社區/專業組織)。
圖片來源:點新聞
自2000年起，世界各地一共發生過約10次「顏色革命」，而呢啲衝突事件，基本上都用咗兩位「顏色革命」元祖嘅策略，先借社會議題做切入點，以非暴力抗爭嘅手段，令到事件發酵，並且使用特定顏色或物件，作為抗議運動嘅象徵 (例如2004年烏克蘭嘅橙色革命，2010年突尼西亞嘅茉莉花革命)， 去表達不滿。跟著以假新聞、假消息等，再去利用社會支柱，煽動民眾進行暴力「革命」，推倒政權。不如大家玩吓配對，睇下當年發生嘅事，係咪有跡可尋、有路可套呢？
社會議題
2018年台灣發生一宗命案，命案受害人與疑犯同為香港居民，為咗維護法治同公義，香港政府打算將着草返香港嘅通緝犯陳同佳，交番俾台灣審訊，但基於兩地並無司法互助同移交疑犯機制，於是香港政府係2019年2月提出修訂「逃犯條例」，以方便合法移交陳同佳俾台灣。但反政府人士就借機抹黑呢條法例，話政府以後就可以任意將罪犯移交內地，為所欲為咁話，隨後就發生咗大半年嘅黑暴事件。
圖片來源:大公報
運動的象徵
由2019年6月12日開始嘅第一場示威衝突，好多示威者都係着黑衫黑褲，帶黑帽、黑口罩、黃頭盔，黑黃雨傘隨處可見。而最初示威者係針對《逃犯條例》，所以用「反送中」為主要口號。其後，示威者提出五大訴求，於是「五大訴求、缺一不可」，以及後來「光復香港」、「時代革命」、「香港自決」嘅口號，同埋黑/黃色嘅打扮，就成為呢場黑暴嘅象徵標記。
媒體助攻 發放假消息
當年嘅假消息真係荒謬到極，但大部份媒體竟然係冇查證之下，爭相報道，而最出格嘅，就非「生果報」莫屬！當時最離譜嘅假新聞包括「爆眼女」事件、警員新屋嶺性暴力女示威者、831太子站打死人、陳彥霖浮屍以及周梓樂墮樓事件。經死因庭同監警會客觀調查之後，所有事件都冇發現警察有非法嘅行為！
另外，當時嘅三色台就被人刻意標籤為親政府喉舌，於是就被有組織地針對，不但鼓動商戶抽起廣告，叫人罷睇，連採訪新聞嘅記者同車輛，都受到暴徒滋擾，攪到人心惶惶。無他嘅，都係想整個社會變成「單聲道」，操控市民接收資訊，咁就可以為整場暴亂保持熱度！
講返「生果報」班底，「生果佬」有前美角海軍情報局特工肥仔Mark做佢私人助理，又有前本地西報總編Mark Clifford做獨立非執董，外媒「華x街日報」編輯William McGurn更加係佢教父。佢哋全部都係幫「生果佬」串連美西方，利用「生果報」作為反政府嘅宣傳機器。喺黑暴期間，「生果佬」鼓吹「和勇不分」，想全面控制各派反對勢力，實行攬炒香港。睇番當時「生果報」搧風點火嘅標題:「西環亂放催淚彈居民開飯遭煙攻」、「旺角清場濫傷濫捕無辜」、「揭警涉輪姦女示威者醫生遭恐嚇滅口」……就知啦!
圖片來源:文匯報
打擊警察公信力
喺黑暴期間，媒體除咗有偏頗報道之外，係網絡更加無底線咁發放假資訊、抹黑警察濫用暴力、性侵示威者、濫捕，以圖激起仇警情緒。
另一方面，暴徒仲向警察家人埋手，去佢哋住嘅宿舍投擲汽油彈，係網上將家人起底，去學校騷擾啲仔女，製造恐慌。加上當年兩度包圍警察總部、多次攻擊不同警署，目的都係想動搖警方執法嘅推動力同信念，打跨呢條保護社會嘅支柱！
圖片來源:文匯報
摧毀青少年
黑暴期間嘅青少年，甚至係佢哋嘅老師，好多由細到大都係受到「犯民」同「生果報」嘅影響，潛藏著反政府嘅思維。當時每間大學都有反政府示威，但其中以理工大學、中文大學同浸會大學嘅暴力情況，簡直超乎想像! 喺這些大學檢獲汽油彈數以萬計，成個軍火庫咁!高人點醒零零發，話呢啲係有心人嘅策略性部署，因為呢3間大學所處嘅地理位置，全部都係交通要道，可以直接癱瘓整個香港，理工大學嘅暴亂就攪到紅隧火光紅紅，去九龍同香港各區交通即時停頓；中文大學二號橋嘅堵塞，就令到去新界北嘅吐露港公路交通停滯；浸會大學就位近獅子山隧道，係另一條新界去九龍、港島嘅主要幹道。部署到好似打仗咁，我零零發唔信係咁啱囉! 不過吊詭嘅事係，大部份喺大學被捕嘅人，根本就唔係大學生！
另外，唔少中學生都被鼓動以所謂和平抗爭去參與呢場動亂，例如9月開學之後，去「築人鏈」、靜坐、罷課，其中更有11間名校號召黎明行動，塞爆全港，企圖堵路癱瘓交通!
線人話比零零發知，黑暴期間拉咗3600幾個學生，有超過一半係大學生；另外亦有過百名老師同社工被補；加上當時有「在位」教育界議員，不斷包庇失德教師、對問題教材，黑暴問題又視而不見，令到好多青年人犯法，斷送前程，長遠亦都動搖咗香港幾代社會棟樑，令社會人材斷層，你話呢啲人幾惡毒呢!
圖片來源:維基百科
利用宗教 蠱惑信徒
無論媒體同法庭審訊，都揭露咗陳x君當上主教後，高調同「犯民」、「生果佬」埋堆，參加所有大大小小嘅遊行示威，又收「生果佬」成2000幾萬，要知道天主教係香港主流宗教，信徒眾多，咁樣嘅所謂宗教領袖，究竟蠱惑咗幾多人心？
黑暴期間，好多宗教團體，除咗以唱聖詩為名舉行集會，阻撓警方執法，又曾發起過「和你拖＋和你唱詩歌祈禱」人鏈活動，包圍聖約翰座堂，大聲唱黑暴歌，向座堂內教徒施壓。而係灣仔遊行熱點嘅「循道會」教堂，就俾暴徒係度換衫同儲存物資；天水圍「宣道會」幼兒學校同黃大仙天主教小學內教堂，就公然開放作為暴徒休息站…… 宗教唔係應該導人向善㗎咩? 點解佢哋不單止唔譴責、制止暴力，仲參與其中去延續暴亂？究竟班教徒收咗咩訊息會咁樣做？
圖片來源:星島日報
運用社區/專業組織 煽動民眾
社區組織本來係提供服務比基層市民，但黑暴期間，好多社區組織，好似「香港社會服務聯會」、「香港社區組織協會」、「香港失明人協進會」等等，除咗借出服務處比暴徒休息，更係面書同新聞稿，無理指摘政府同警方。
而其他嘅專業組織，好似「教協」，就組織教育界集會及煽動學生參與暴動，而「香港社會工作者總工會」，就組織業界到現場支援暴徒，「國泰航空公司空中服務員工會」及「職工盟」，就動員大罷工，總之就營造到社會各階層及不同行業，都參與反政府嘅現象，為暴亂做勢！
黑暴初期嘅主旋律，都聲稱係「非暴力抗爭」，但之後嘅暴力破壞，完全係跟住「顏色革命」嘅劇本走，而且真係「五大支柱、缺一不可」!大家真係相信2019黑暴係因為修訂「逃犯條例」而自發嘅所謂「社會運動」？冇大台？冇幕後黑手？大家不妨自己去 「猜、情、尋」，去尋找下真相喇！
鍾情局•零零發
