香港人數口精，絕對唔會放過任何搵錢機會。睇番近10年嘅所謂「民主運動」，都唔知出咗幾多暴發戶。總之「金主」唔難搵，「手足」嘅錢又唔難賺，花款多到你唔信！ 有人賺咗第一桶金，逃之夭夭；有人越做越有，錢多到搵唔曬；當然都有人大貪得滯，見好唔識收，最後損手爛腳，衰收尾！
食佔中餘溫，搲公帑
自2015年起，就有一班名不經傳，來自唔同黨派嘅「犯民」新丁，甚至乎未讀完書嘅學生哥，食住當時嘅政治氣候，混水摸魚殺入區議會、立法會做議員，好似楊x盈、「青年新政」嘅梁x恆同游x禎，同埋「香港眾志」嘅羅x聰等等。佢哋每個月有成$10萬蚊人工，又有幾十萬開辦事處，仲有醫療福利加任滿酬金！後期有啲俾人D Q，就夾帶私逃，走咗成$180萬薪津數𠻹！
到2019年，犯民執咗380個區議會議席，其中超過80個更加係完全冇從政經驗嘅政治「黃素人」！其中一個最出格嘅，就係做散工都做唔成，考咩試都唔合格嘅「陳X維」。雖然讀書唔係求分數，但都唔係要求低到咁呀嘛？！我零零發計過，佢做咗一年半區議員(佢做得最長嘅一份工)，淨係月薪同非實報開支，平均每一個月有成四萬幾人工，仲未計70幾萬嘅實報實銷開支……呢啲筍工去邊度搵？嗰幾年都唔知有幾多呢啲人，口震震、腳䟴䟴咁，掏空我哋納稅人嘅錢！
2019年其中一名政府「黃素人」的手寫政綱
黃色經濟圈
當年食住黑暴個勢頭，唔少食店、書店、精品店，紛紛以「黃店」自居，有啲係真「黃」，有啲係扮「黃」，無他嘅，因為手足錢真係容易呃！其中以茶記掠水最犀利，只要周圍貼滿黑暴示威標語，大大幅「連儂牆」俾手足留言，唔使好食，佢哋就會圍爐幫襯！ 當時好多都話支援手足，例如「龍x冰店」咁，搞埋曬啲「和你宵(夜)」、「冬至飯」嘅籌款活動，不過佢啲員工爆料，話啲捐款俾其中一個冰室創辦人落咗格！
咁好搵，當時亦都吸引咗唔少新手入場，好似「揦渣哥」喺2020年2月就開「X渣哥」茶餐廳，「飛機豪」喺2020年12月就開咗「每日三餐」，不過呢啲茶記全部都係食黑暴噱頭，搵手足笨，唔俾心機做嘢，終於陸陸續續摺埋曬。
而靠所謂「民主運動」起朵，個腦有事嗰個「陳X莊」，走咗佬去台灣島開私房菜，佢張菜單最平都成千蚊港紙一位，但係就俾一百幾十嘅飯餸人食，食水深到呢…… 台灣島稅局真係要好好睇住佢！
另外，前區議員「朱x瑋」就賣劣質「月餅」、「囚犯平安包」、「黃人二手書」，仲無牌sell 強積金……佢賺嘅錢究竟去咗幫邊啲「手足」呀？
專業「犯法師」
呢段時間有好多新興嘅工種出現，包括「火魔法師」、「水魔法師」、「裝修師」、「雷射師」、「旁聽師」、「送車師」同「探監師」等等。唔好以為有個「師」字就好專業，其實全部都係改個「名」去犯法！ 線人話我知，有部份小黃人係受朋輩影響，傻更更加入呢個「就業大軍」，但實際係有人科水攪「大龍鳳」，亦有人收錢接job 做嘢。聽聞做蛇頭參加遊行賺$4,000，齋行就袋$2,000，搞破壞、打交就醒多$5,000，如果夠膽擲汽油彈，仲可以收$1,000美金！
回帶睇番當時暴徒所投擲汽油彈，同埋警察檢取汽油彈同化學品嘅數量，數以萬計，成個軍火庫咁多，大家唔會天真到，以為係班後生仔自己扲荷包掛？
「政治迷惑」發財伎倆
當時好多人都係社交媒體發表「偉論」，扮曬同路人，引黃人關注，之後就話幫「手足」去延續「民主運動」搞眾籌，之後咪私有化啲錢，袋袋平安囉！我零零發從來未見過眾籌有交過盤數俾手足睇，你見過未？好似早排講過嘅奀星「阮x安」，就作古仔眾籌，呃咗成165萬去賭、俾老婆去歐州買名牌包包。係「屠龍小隊」同「醫院口岸爆炸案」嘅審訊，都揭露咗暴徒利用眾籌番嚟嘅錢去賭、去玩啦！而「沈x輝」、「羅x聰」、「許x峰」之流，更開埋Patreon戶口，比黃人訂閱，賺取暴利；之前講過沈某嘅Patreon，每月平均就有六位數字嘅港幣收入！
越亂越賺
「犯民大主教」「陳x君」同假髮律師「吳x儀」等人成立嘅「碌柚葉基金」，聲稱提供人道同法律支援比暴徒，收收埋埋過億港元捐款。唔通佢哋一早知有暴亂，會有唔少暴徒被警方拘捕要請律師打官司？呢個基金將暴徒嘅case，全部益曬啲「黃律師」，佢哋個個開行turbo接case，賺到盆滿砵滿！
延後利益
而一班著咗草嘅學生哥，只要係「佔中」或「黑暴」期間向外力表忠，有過「出色」表現嘅話，「金主」都會安排佢哋入讀著名學府，好似「羅x聰」就入讀「耶魯大學」、「周x康」讀「加州大學柏克萊分校」、「張x陽」、「黃x仰」同「梁x琦」，就分別入讀「約翰霍普金斯大學」、「牛津大學」同「哈佛大學」……以佢哋嘅成績同素質可以入讀名校，好明顯就係政治酬庸同安家費囉！ 至於嗰班無名無性nobody出嚟撐所謂「民主」嘅細路，又唔見得有份讀呢啲名牌大學？有啲唔好彩嘅，仲要拉埋、坐監，書都冇得讀！
我終於明白點解有班人仆心仆命去推動所謂「民主運動」喇，總之就人工高、福利好！只要肯搏同爭出位，條條都係財路。不過，佢哋都係靠大家，先至可以「錢途」無限！
唉，又係個句，俾人呃咗錢事少，最怕你唔知佢哋做緊啲乜嘢勾當，盲舂舂黐理去，踩咗地雷，犯埋法就神仙都打救你唔到喇！
鍾情局●零零發
鍾情局
** 博客文章文責自負,不代表本公司立場 **
12月2日，保安局局長根據《維護國家安全條例》將「香港議會」，同另一顛覆組織「香港民主建國聯盟」(「建國聯」) 列為「受禁組織」，禁止佢哋喺香港運作。任何人以受禁組織幹事或成員身份行事、參與組織活動或集會、煽惑他人成為組織成員、提供任何形式援助、或牟取會費或援助等，即屬犯法，最高刑罰為罰款100萬元及監禁14年。睇返資料，呢兩個海外顛覆組織19名核心成員，已被香港特區政府懸紅通緝，並刊憲列為「指明潛逃者」。
我零零發之前都有提過「香港議會」，係由國安通緝犯「袁X夷」、「何X懋」同「龔X夏」，喺2022年7月於海外成立嘅反中亂港組織。「袁X夷」喺黑暴期間，一早投靠西方國家，鋪定路吸金，據聞佢孖住美角前國務卿搞一場反中亂港講座，袋咗成100萬美金；另外又公然拍片要求「侵侵」制裁中國。2019年黑暴平息後，「袁X夷」知道已經無空間喺香港，繼續佢嘅反中亂港圖謀，所以就諗到喺海外成立所謂「香港議會」呢條「屎橋」，喺海外聚集一班黃人手足，延續抗爭情緒，繼續宣揚反中、顛覆國家政權嘅思想，企圖將反華意識形態持續倒灌返香港。
「袁X夷」成立「香港議會」之初，已經開宗明義要推動「自決」，又制定「香港憲法」同發表所謂《自由香港宣言》，揚言要「滅共」，目的好明顯係想用非法手段，去推翻國家政權同破壞國家憲法。佢亦搞咗個所謂選舉，聲稱要選啲「議員」代表香港人，但呢個選舉明顯係鬧劇一場，完全無代表性。「袁X夷」由2022年提出會搞選舉，但因無人參選及技術問題一拖再拖，到2025年5月先勉強搵到19個「候選人」去爭15個議席。後來其中5個「當選人」怕繼續參與所謂「議會」會犯法，於是急急跳船，剩返10個人宣誓就任。呢班所謂「議員」不但毫無議政經驗，而且個個都騎騎呢呢、骨格精奇，講個名、俾埋幅大頭相你睇，都唔會知道係乜水。
「香港議會」呢班國安通緝犯，除咗不斷喺網上搞直播講廢話、唱衰中國同香港特區政府之外，仲成日「鬼打鬼」。其中一個匿喺澳洲嘅當選人「黃X和」，近日拍咗幾條片，唱大檔話「香港議會」班人唔做嘢兼無能、運作不透明、搞小圈子。 「黃X和」話自己因為加入「香港議會」而被通緝感到不值，覺得被拖累。不過大家都咪咁天真信佢(哋)，好明顯成班人都只係利用所謂「香港議會」平台，拎政治名氣，呃金主泵水，氹黃人科水支持佢哋咋!！
其實，早前有位19歲女生，因為幫「香港議會」拍攝宣傳影片，煽動他人參與非法選舉而做咗炮灰被拘捕，最終判囚一年。喺求情時，佢提到跟咗前男友「香港議會」成員「林X淦」潛逃至楓葉角生活，但去到無人無物，又唔識英文，要靠向家人借錢渡日都不特止，「林X淦」更以佢名義向友人借取巨款，搞到佢負債纍纍，所以唯有返嚟香港，點知又被「林X淦」唆擺，為「香港議會」助選拍攝影片招至刑責。最慘係當佢被捕之後，一班「香港議會」骨幹成員以及「林X淦」都從未為佢發聲，好明顯，由始至終，佢哋都只係當個女生係一件「工具」。
「香港議會」害人害物嘅例子又點止咁少吖！「香港議會」另一著草骨幹，假牧師「姜X偉」，早前肆意抹黑香港立法會選舉，更喺網上煽動他人投白票或者唔投票而觸犯《選舉條例》。佢被廉政公署通緝係咎由自取，不過就「關照」咗轉載佢帖文嘅網民被人拉咗，「姜X偉」名符其實係「叫人衝、自己鬆」，真係害人不淺。
其實呢個「姜X偉」黑暴走咗去台灣之後，係2024年11月成立咗一個「港獨」組織，叫做「香港民主建國聯盟」(「建國聯」)，當中6名成員同時都係「香港議會」嘅成員，所以兩個組織嘅關係可謂千絲萬縷。
翻查資料，「建國聯」以推動「香港獨立」及「香港議會」為宗旨，聲言要制定所謂「香港憲法」、創立臨時國旗國歌、建立軍事力量，並計劃培訓海外港人「重返香港」從事顛覆活動。呢個組織喺今年年頭，更曾經喺台北舉行「快閃升黑旗」活動，期間更加踐踏國旗及區旗、升起「黑洋紫荊旗」、播放有「港獨」意味嘅歌曲，大肆宣揚反中亂港訊息。
「建國聯」自成立以來，於網上大肆鼓吹分裂國家思想，發佈「港獨」帖文向年輕人進行洗腦，煽動佢哋做出違法行為。早前就有4名呢個組織嘅在港成員，受到網上煽動帖文所影響，參與「建國聯」嘅活動，因而涉嫌違反顛覆、分裂國家罪而被捕。當中包括一名犯案時得15歲嘅學生，計下數，呢個同學仔喺2019年黑暴時只得10歲，好難想像一個本應天真瀾漫嘅小朋友，被人荼毒產生極端思想而走上歪路，佢12月15號就因為呢單《串謀分裂國家罪》判刑42個月。大家唔好諗住未夠秤(不足16歲) 犯咗國安法嘅罪行可以警司警誡 ，或者上兒童法庭受審，國安case係冇呢支歌仔唱㗎！而呢班身在境外嘅亂港分子就置身事外，隔岸觀火，不斷喺網上大放厥詞，繼續煽動本地年輕人犯法，為佢地政治圖謀付出代價。
雖然「香港議會」及「建國聯」核心成員已被公開懸紅通緝及列為「指明潛逃者」，但呢班人未有收斂，自恃喺海外就可以肆無忌憚搞亂香港。佢地持續倡議推翻國家政權，又公開呼籲國際社會制裁特區官員，近日更借立法會選舉同宏福苑大火大搞抹黑煽動，可謂無所不用其極咁去危害香港社會安定繁榮。特區政府今次將呢兩個組織列為「受禁組織」，切斷其對香港嘅影響，可謂有絕對必要！
我零零發都唔止一次提醒大家唔好信佢哋講嘅嘢，更加唔好轉載佢哋嘅文章，或者以任何方式支持、參與、資助佢哋搞嘅活動，否則，隨時會成為下一個國安罪犯！
所以大家與其擔心條紅線係邊，不如小心唔好踩到條黃線仲緊要喇！
鍾情局•零零發
