最近，國安通緝犯「衣冠聰」由美國飛去新加坡參加一個美國智庫搞嘅活動，點知一落機就被拒絶入境，遣返原地。
呢單嘢引起唔少國際社會嘅討論，大家都好好奇，點解「衣冠聰」明知自己被通緝，都仲夠膽飛去新加坡呢？不如就由「衣冠聰」嘅反中亂港劣跡開始講起。
「衣冠聰」2014年讀大學嘅時候，就已經拉隊參加「佔中」，2016年仲同「黃痴瘋」一齊成立「香港衆志」，洗年輕人腦，宣揚「港獨」，佢兩個甚至明目張膽飛去台灣參加「台獨」論壇，擺明車馬想分裂國家。
2019年黑暴時期，「衣冠聰」勾結外國勢力賣國賣港、甘願做美國走狗嘅角色定位，就進一步呈現。當年佢同「黃痴瘋」喺金鐘密會美角駐港總領事政治部主任，而喺密會之後，「衣冠聰」同「黃痴瘋」就隨即發動罷課、煽動學生上街。佢哋仲透過「香港衆志」，喺長洲搞咗個暴徒特訓班，教啲學生點樣攻擊警察……跟著黑暴就愈演愈烈，汽油彈横飛嘅場面，亦越嚟越多。
「衣冠聰」喺煽動學生上街參與暴動嘅同時，亦忙住乞求外國對中港實施制裁。當時佢同「朱X民」等人成立咗個反華組織「香港民主委員會」，仲親身出席美國參議院聽證會，大肆抹黑中央同特區政府，並呼籲議員通過制裁中港官員嘅法案，過咗冇耐，美國議會就真係通過咗個制裁法案。
2020年喺《國安法》生效前夕，「衣冠聰」急急腳著草去英國。同年，時任美角國務卿係訪問英國期間，竟然專登單獨會見「衣冠聰」。獲得咁高規格嘅對待，「衣冠聰」自此心甘命扺為「主子」賣命，佢到而家都不停透過各種渠道，呼籲國際社會「對抗中共」。
香港警方係2023年懸紅100萬通緝「衣冠聰」，話佢涉嫌「煽動分裂國家」同埋「勾結外國勢力危害國家安全」，之後又將佢列為指明潛逃者，兼撤銷埋佢本特區護照。
「衣冠聰」嘅特區護照被撤銷咗，有啲黃人就話美英政府咁睇佢，實會送個公民身份俾佢啦！點知原來佢得張英國政府施捨嘅「難民證」，能唔能夠成為公民都係未知之數，當佢再冇利用價值嘅時候，隨時成為棄卒，連「難民」身份都冇埋。睇嚟佢都只有繼續對「主子」唯命是從，努力爭取有番少少生存空間。
今次「衣冠聰」明知新加坡同香港有移交逃犯協定，都冒險拎住張「難民證」飛去搏一搏，正正反映咗「主子」叫佢做乜，佢都無得say NO。點解呢個智庫咁勁，可以叫得郁「主子」落order，令一個香港國安通緝犯去犯險呢？
原來「衣冠聰」去新加坡出席一個由美國智庫「卡內基國際和平基金會」主辦、新加坡南洋理工大學「拉惹勒南國際關係學院」協辦嘅所謂「學術交流」。而呢個智庫嘅前主席「伯恩C」，係前美角情報局局長， 佢在位期間成立咗「中國任務中心」，講到明要搵班識中文嘅人做間諜，加強對華諜報工作。而呢個智庫嘅現任駐新加坡「中國政策中心」主任「華X強」，更曾任美國對華政策最高級別官員，兼副助理國務卿。 個智庫有咁強勁嘅反華政策及諜報背景，真係會純粹搞學術?佢哋真係唔知「衣冠聰」係國安通緝犯? 真係會唔知香港同新加坡有移交逃犯協定?
高人透露，成件事其實係一步精心策劃嘅棋。「衣冠聰」喺9月27日飛抵新加坡，呢個時間點其實極之敏感，因為10月3日就係中國與新加坡建交35周年嘅大日子。「衣冠聰」被安排喺中新建交紀念日前夕現身新加坡，擺明係想喺中新友好氣氛之下玩嘢，試圖製造政治噪音，挑戰新加坡對中國嘅外交立場。結果新加坡以入境及逗留不符合國家利益為由，拒絶「衣冠聰」入境，並將佢遣返。而中國就以「各國有權自主進行出入境管理」回應事件，不慌不忙，係搏奕之下顯示大國風範。面對新加坡同中國嘅反應， 唔知策劃呢單嘢嘅幕後黑手，下一步又有咩打算呢?
計我話，事件亦都反映咗，「衣冠聰」只係「主子」手上一隻可有可無嘅棋子；而佢喺今次呢個局入面，好明顯亦都只係一隻隨時可以被放棄嘅馬前卒，所以才會叫佢去冒險。
隨住中國發展愈嚟愈強大，得到世界各地嘅尊重及認同只會愈來愈多，而「衣冠聰」呢啲潛逃海外嘅國安逃犯，可以匿藏嘅地方只會愈來愈少，終將走投無路。 「衣冠聰」今年先32歲，仲有大半世人要過，與其未來50幾年繼續做逃犯、做棋子，倒不如鼓起勇氣回港自首，承擔責任喇！
鍾情局•零零發
鍾情局
** 博客文章文責自負,不代表本公司立場 **
香港人數口精，絕對唔會放過任何搵錢機會。睇番近10年嘅所謂「民主運動」，都唔知出咗幾多暴發戶。總之「金主」唔難搵，「手足」嘅錢又唔難賺，花款多到你唔信！ 有人賺咗第一桶金，逃之夭夭；有人越做越有，錢多到搵唔曬；當然都有人大貪得滯，見好唔識收，最後損手爛腳，衰收尾！
食佔中餘溫，搲公帑
自2015年起，就有一班名不經傳，來自唔同黨派嘅「犯民」新丁，甚至乎未讀完書嘅學生哥，食住當時嘅政治氣候，混水摸魚殺入區議會、立法會做議員，好似楊x盈、「青年新政」嘅梁x恆同游x禎，同埋「香港眾志」嘅羅x聰等等。佢哋每個月有成$10萬蚊人工，又有幾十萬開辦事處，仲有醫療福利加任滿酬金！後期有啲俾人D Q，就夾帶私逃，走咗成$180萬薪津數𠻹！
到2019年，犯民執咗380個區議會議席，其中超過80個更加係完全冇從政經驗嘅政治「黃素人」！其中一個最出格嘅，就係做散工都做唔成，考咩試都唔合格嘅「陳X維」。雖然讀書唔係求分數，但都唔係要求低到咁呀嘛？！我零零發計過，佢做咗一年半區議員(佢做得最長嘅一份工)，淨係月薪同非實報開支，平均每一個月有成四萬幾人工，仲未計70幾萬嘅實報實銷開支……呢啲筍工去邊度搵？嗰幾年都唔知有幾多呢啲人，口震震、腳䟴䟴咁，掏空我哋納稅人嘅錢！
2019年其中一名政府「黃素人」的手寫政綱
黃色經濟圈
當年食住黑暴個勢頭，唔少食店、書店、精品店，紛紛以「黃店」自居，有啲係真「黃」，有啲係扮「黃」，無他嘅，因為手足錢真係容易呃！其中以茶記掠水最犀利，只要周圍貼滿黑暴示威標語，大大幅「連儂牆」俾手足留言，唔使好食，佢哋就會圍爐幫襯！ 當時好多都話支援手足，例如「龍x冰店」咁，搞埋曬啲「和你宵(夜)」、「冬至飯」嘅籌款活動，不過佢啲員工爆料，話啲捐款俾其中一個冰室創辦人落咗格！
咁好搵，當時亦都吸引咗唔少新手入場，好似「揦渣哥」喺2020年2月就開「X渣哥」茶餐廳，「飛機豪」喺2020年12月就開咗「每日三餐」，不過呢啲茶記全部都係食黑暴噱頭，搵手足笨，唔俾心機做嘢，終於陸陸續續摺埋曬。
而靠所謂「民主運動」起朵，個腦有事嗰個「陳X莊」，走咗佬去台灣島開私房菜，佢張菜單最平都成千蚊港紙一位，但係就俾一百幾十嘅飯餸人食，食水深到呢…… 台灣島稅局真係要好好睇住佢！
另外，前區議員「朱x瑋」就賣劣質「月餅」、「囚犯平安包」、「黃人二手書」，仲無牌sell 強積金……佢賺嘅錢究竟去咗幫邊啲「手足」呀？
專業「犯法師」
呢段時間有好多新興嘅工種出現，包括「火魔法師」、「水魔法師」、「裝修師」、「雷射師」、「旁聽師」、「送車師」同「探監師」等等。唔好以為有個「師」字就好專業，其實全部都係改個「名」去犯法！ 線人話我知，有部份小黃人係受朋輩影響，傻更更加入呢個「就業大軍」，但實際係有人科水攪「大龍鳳」，亦有人收錢接job 做嘢。聽聞做蛇頭參加遊行賺$4,000，齋行就袋$2,000，搞破壞、打交就醒多$5,000，如果夠膽擲汽油彈，仲可以收$1,000美金！
回帶睇番當時暴徒所投擲汽油彈，同埋警察檢取汽油彈同化學品嘅數量，數以萬計，成個軍火庫咁多，大家唔會天真到，以為係班後生仔自己扲荷包掛？
「政治迷惑」發財伎倆
當時好多人都係社交媒體發表「偉論」，扮曬同路人，引黃人關注，之後就話幫「手足」去延續「民主運動」搞眾籌，之後咪私有化啲錢，袋袋平安囉！我零零發從來未見過眾籌有交過盤數俾手足睇，你見過未？好似早排講過嘅奀星「阮x安」，就作古仔眾籌，呃咗成165萬去賭、俾老婆去歐州買名牌包包。係「屠龍小隊」同「醫院口岸爆炸案」嘅審訊，都揭露咗暴徒利用眾籌番嚟嘅錢去賭、去玩啦！而「沈x輝」、「羅x聰」、「許x峰」之流，更開埋Patreon戶口，比黃人訂閱，賺取暴利；之前講過沈某嘅Patreon，每月平均就有六位數字嘅港幣收入！
越亂越賺
「犯民大主教」「陳x君」同假髮律師「吳x儀」等人成立嘅「碌柚葉基金」，聲稱提供人道同法律支援比暴徒，收收埋埋過億港元捐款。唔通佢哋一早知有暴亂，會有唔少暴徒被警方拘捕要請律師打官司？呢個基金將暴徒嘅case，全部益曬啲「黃律師」，佢哋個個開行turbo接case，賺到盆滿砵滿！
延後利益
而一班著咗草嘅學生哥，只要係「佔中」或「黑暴」期間向外力表忠，有過「出色」表現嘅話，「金主」都會安排佢哋入讀著名學府，好似「羅x聰」就入讀「耶魯大學」、「周x康」讀「加州大學柏克萊分校」、「張x陽」、「黃x仰」同「梁x琦」，就分別入讀「約翰霍普金斯大學」、「牛津大學」同「哈佛大學」……以佢哋嘅成績同素質可以入讀名校，好明顯就係政治酬庸同安家費囉！ 至於嗰班無名無性nobody出嚟撐所謂「民主」嘅細路，又唔見得有份讀呢啲名牌大學？有啲唔好彩嘅，仲要拉埋、坐監，書都冇得讀！
我終於明白點解有班人仆心仆命去推動所謂「民主運動」喇，總之就人工高、福利好！只要肯搏同爭出位，條條都係財路。不過，佢哋都係靠大家，先至可以「錢途」無限！
唉，又係個句，俾人呃咗錢事少，最怕你唔知佢哋做緊啲乜嘢勾當，盲舂舂黐理去，踩咗地雷，犯埋法就神仙都打救你唔到喇！
鍾情局●零零發
